ਹੋਦ ਚਿੱਲੜ ਕਾਂਡ: ਇਨਸਾਫ਼ ਕਮੇਟੀ ਵੱਲੋਂ ਜ਼ਮੀਨ ਦੀ ਨਿਸ਼ਾਨਦੇਹੀ
ਰਾਜਵਿੰਦਰ ਰੌਂਤਾ
ਨਿਹਾਲ ਸਿੰਘ ਵਾਲਾ, 18 ਮਈ
ਹੋਦ ਚਿੱਲੜ ਇਨਸਾਫ਼ ਕਮੇਟੀ ਨੇ ਹਰਿਆਣਾ ਸਰਕਾਰ ਦੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਦੀ ਮੌਜੂਦਗੀ ਵਿੱਚ ਸੱਤ ਏਕੜ ਜ਼ਮੀਨ ਨਾਲ ਲੱਗਦੇ ਰਸਤੇ ਅਤੇ ਪੁਰਾਤਨ ਅਤੇ ਇਤਿਹਾਸਕ ਖੂਹ ਨੂੰ ਮਾਲਕਾਂ ਹਵਾਲੇ ਕਰਵਾ ਦਿੱਤਾ ਹੈ। ਇਹ ਜਾਣਕਾਰੀ ਦਿੰਦਿਆਂ ਦਰਸ਼ਨ ਸਿੰਘ ਘੋਲੀਆ ਨੇ ਦੱਸਿਆ ਕਿ 2 ਨਵੰਬਰ, 1984 ਨੂੰ ਸੋਚੀ ਸਮਝੀ ਸਾਜ਼ਿਸ਼ ਤਹਿਤ ਭੜਕੀ ਭੀੜ ਨੇ ਹੋਂਦ ਚਿੱਲੜ ਵਿੱਚ 32 ਸਿੱਖਾਂ ਨੂੰ ਸ਼ਹੀਦ ਕਰ ਦਿੱਤਾ ਸੀ ਅਤੇ ਲਾਸ਼ਾਂ ਨੂੰ ਖੁਰਦ-ਬੁਰਦ ਕਰਨ ਲਈ ਉੱਥੇ ਨੇੜੇ ਹੀ ਖੂਹ ਵਿੱਚ ਸੁੱਟ ਕੇ ਉਪਰ ਮਿੱਟੀ ਦਾ ਤੇਲ ਪਾ ਕੇ ਸਾੜ ਦਿੱਤਾ ਸੀ। ਸਿੱਖ ਕਤਲੇਆਮ ਤੋਂ ਬਾਅਦ ਪੀੜਤ ਪਰਿਵਾਰ ਸਹਿਮੇ ਹੋਏ ਅਤੇ ਸਦਮੇ ਵਿੱਚ ਸਨ, ਜੋ ਵੱਖ-ਵੱਖ ਸੂਬਿਆਂ ਵਿੱਚ ਆਪਣੇ ਰਿਸ਼ਤੇਦਾਰਾਂ ਕੋਲ ਚਲੇ ਗਏ ਸਨ। ਉਨ੍ਹਾਂ ਦੱਸਿਆ ਕਿ ਇਲਾਕੇ ਦੇ ਧਨਾਢ ਬੰਦਿਆਂ ਨੇ ਹਵੇਲੀਆਂ ਨੂੰ ਢਾਹ ਕੇ ਪਿੰਡ ਦੀ ਇਤਿਹਾਸਕ ਸ਼ਹੀਦੀ ਹੋਂਦ ਮਿਟਾਉਣ ਲਈ ਪੀੜਤ ਪਰਿਵਾਰਾਂ ਦੀਆਂ ਜ਼ਮੀਨਾਂ ਨੂੰ ਆਪਣੀਆਂ ਵਾਹੀਯੋਗ ਜ਼ਮੀਨਾਂ ’ਚ ਰਲਾ ਲਿਆ ਸੀ।
ਭਾਈ ਘੋਲੀਆ ਨੇ ਦੱਸਿਆ ਕਿ ਪ੍ਰਸ਼ਾਸਨਿਕ ਅਧਿਕਾਰੀਆਂ ਦੀ ਮੌਜੂਦਗੀ ’ਚ ਹੋਈ ਨਿਸ਼ਾਨਦੇਹੀ ਵਿੱਚ ਸੱਤ ਏਕੜ ਜ਼ਮੀਨ ਸਣੇ 3 ਤੋਂ 4 ਰਸਤੇ, ਗੁਰਦੁਆਰਾ ਸਿੰਘ ਸਭਾ ਦੀ ਜ਼ਮੀਨ ਅਤੇ ਸ਼ਹੀਦੀ ਖੂਹ ਵੀ ਨਿਕਲਿਆ ਹੈ। ਨਿਸ਼ਾਨਦੇਹੀ ਲਈ ਸੱਤ ਫੁੱਟ ਲੰਬੇ ਪੱਥਰ ਵੀ ਲਾਏ ਗਏ ਹਨ। ਇਸ ਮੌਕੇ ਸਰਪੰਚ ਰਵੀ ਕੁਮਾਰ, ਲੇਖ ਰਾਮ, ਮਨਮੋਹਨ ਸਿੰਘ ਮੱਕੜ, ਪੀੜਤ ਗੋਪਾਲ ਸਿੰਘ, ਪੀੜਤ ਸੁਰਜੀਤ ਕੌਰ, ਪੀੜਤ ਹਰਭਜਨ ਸਿੰਘ ਪੀਲੀ ਬੰਗਾ, ਗੁਰਜੀਤ ਸਿੰਘ ਪਟੌਦੀ ਖਾਪ ਪੰਚਾਇਤ ਦੇ ਆਗੂ ਲਾਲਦੇਵ ਚੌਧਰੀ ਤੇ ਭੀਮ ਚੰਦ, ਸ਼੍ਰੋਮਣੀ ਕਮੇਟੀ ਦੇ ਅਧਿਕਾਰੀ ਗੁਰਦਿਆਲ ਸਿੰਘ ਅ੍ਰੰਮਿਤਸਰ ਵੀ ਹਾਜ਼ਰ ਸਨ। ਭਾਈ ਘੋਲੀਆ ਨੇ ਮਾਲ ਵਿਭਾਗ ਦੇ ਅਧਿਕਾਰੀਆਂ, ਸਰਪੰਚ ਰਵੀ ਕੁਮਾਰ ਤੇ ਮੌਜੂਦ ਪਤਵੰਤਿਆਂ ਦਾ ਧੰਨਵਾਦ ਕੀਤਾ।
