ਕੇ ਪੀ ਸਿੰਘ
ਦੀਨਾਨਗਰ, 7 ਜੁਲਾਈ
ਇੱਥੋਂ ਦੀ ਮਗਰਾਲਾ ਰੋਡ ’ਤੇ ਸੋਮਵਾਰ ਤੜਕਸਾਰ ਚੋਰਾਂ ਨੇ ਅੱਠ ਦੁਕਾਨ ਦੇ ਤਾਲੇ ਤੋੜੇ ਅਤੇ ਹਜ਼ਾਰਾਂ ਦੀ ਨਕਦੀ ਲੈ ਕੇ ਫ਼ਰਾਰ ਹੋ ਗਏ। ਚੋਰੀ ਦੀ ਘਟਨਾ ਸੀਸੀਟੀਵੀ ਕੈਮਰੇ ’ਚ ਕੈਦ ਹੋ ਗਈ ਹੈ। ਡੈਂਟਿਸਟ ਚਰਨਜੀਤ ਨੇ ਦੱਸਿਆ ਕਿ ਉਹ ਆਪਣਾ ਕਲੀਨਿਕ ਰਾਤ ਨੂੰ ਬੰਦ ਕਰਕੇ ਗਏ ਸਨ। ਜਦੋਂ ਉਨ੍ਹਾਂ ਸਵੇਰੇ ਆ ਕੇ ਦੇਖਿਆ ਉਨ੍ਹਾਂ ਦੀ ਦੁਕਾਨ ਦੇ ਤਾਲੇ ਟੁੱਟੇ ਹੋਏ ਸਨ ਅਤੇ ਸਾਮਾਨ ਖਿੱਲਰਿਆ ਹੋਇਆ ਸੀ। ਉਨ੍ਹਾਂ ਆਪਣੇ ਗੱਲੇ ਦੀ ਜਾਂਚ ਕੀਤੀ ਤਾਂ ਉਸ ਵਿੱਚ ਪਏ 500 ਰੁਪਏ ਗਾਇਬ ਸਨ। ਇਸੇ ਤਰ੍ਹਾਂ ਹੀ ਉਨ੍ਹਾਂ ਦੇ ਨਾਲ ਦੀ ਬੰਟੀ ਸਲੂਨ ਵਾਲੇ ਦੀ ਦੁਕਾਨ ਦੇ ਤਾਲੇ ਤੋੜੇ। ਦੁਕਾਨ ਅੰਦਰ ਮੋਟਰਸਾਈਕਲ ਖੜ੍ਹਾ ਸੀ ਜੋ ਚੋਰ ਲੈ ਗਏ ਪਰ ਥੋੜ੍ਹੀ ਅੱਗੇ ਜਾ ਕੇ ਜਦੋਂ ਉਹ ਸਟਾਰਟ ਨਹੀਂ ਹੋਇਆ ਤਾਂ ਸੜਕ ਕਿਨਾਰੇ ਉਹ ਝਾੜੀਆਂ ਵਿੱਚ ਸੁੱਟ ਗਏ। ਇਸੇ ਰੋਡ ’ਤੇ ਇਕ ਹੋਰ ਸੋਨੂੰ ਸਲੂਨ ਵਾਲੇ ਦੀ ਦੁਕਾਨ ਵਿੱਚੋਂ ਚੋਰ ਗੱਲੇ ਵਿੱਚ ਪਿਆ 5 ਹਜ਼ਾਰ ਰੁਪਏ ਚੋਰੀ ਕਰਕੇ ਲੈ ਗਏ। ਸੋਨੂੰ ਨੇ ਦੱਸਿਆ ਕਿ ਇਹ ਪੈਸੇ ਉਨ੍ਹਾਂ ਆਪਣੀ ਬੇਟੀ ਦੀ ਫ਼ੀਸ ਵਾਸਤੇ ਰੱਖੇ ਹੋਏ ਸਨ।
ਮਨਿਆਰੀ ਦੀ ਦੁਕਾਨ ਦੇ ਮਾਲਕ ਬਲਦੇਵ ਰਾਜ ਨੇ ਦੱਸਿਆ ਕਿ ਉਨ੍ਹਾਂ ਦੀ ਦੁਕਾਨ ਦੇ ਵੀ ਤਾਲੇ ਤੋੜ ਕੇ ਚੋਰ 2500 ਰੁਪਏ ਚੋਰੀ ਕਰਕੇ ਲੈ ਗਏ ਅਤੇ ਦੁਕਾਨ ਦੇ ਵਿੱਚ ਲੱਗੇ ਫ਼ਰਿਜ ਵਿੱਚੋਂ ਕੁਝ ਖਾਣ ਪੀਣ ਦਾ ਸਮਾਂ ਲੈ ਗਏ। ਚੋਰਾ ਵੱਲੋਂ ਸੋਢੀ ਇਲੈਕਟ੍ਰੀਸ਼ੀਅਨ ਦੀ ਦੁਕਾਨ, ਸਤਨਾਮ ਡੇਅਰੀ, ਹੰਸ ਰਾਜ ਦੀ ਦੁਕਾਨ ਅਤੇ ਡੈਂਟਿਸਟ ਨੇਹਾ ਕਰਲੂਪੀਆ ਦੀ ਦੁਕਾਨਾਂ ਦੇ ਵੀ ਤਾਲੇ ਤੋੜੇ ਗਏ ਪਰ ਚੋਰਾਂ ਵੱਲੋਂ ਇਨ੍ਹਾਂ ਦੁਕਾਨਾਂ ਵਿੱਚ ਕੁਝ ਵੀ ਸਾਮਾਨ ਚੋਰੀ ਨਹੀਂ ਕੀਤਾ ਗਿਆ। ਦੋ ਚੋਰਾਂ ਦੀ ਫ਼ੋਟੋ ਸੀਸੀ ਟੀਵੀ ਕੈਮਰੇ ’ਚ ਕੈਦ ਹੋਈ ਹੈ ਜਿਸ ਵਿੱਚ ਉਨ੍ਹਾਂ ਕੱਪੜੇ ਨਾਲ ਆਪਣਾ ਮੂੰਹ ਸਿਰ ਲਪੇਟਿਆ ਹੋਇਆ ਹੈ। ਦੁਕਾਨਦਾਰਾਂ ਮੰਗ ਕੀਤੀ ਕਿ ਜਲਦ ਤੋਂ ਜਲਦ ਉਕਤ ਚੋਰਾਂ ਨੂੰ ਫੜ ਕੇ ਸਲਾਖ਼ਾਂ ਪਿੱਛੇ ਬੰਦ ਕੀਤਾ ਜਾਵੇ ਅਤੇ ਦੁਕਾਨ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਇਆ ਜਾਵੇ।
