ਵੈਟਰਨਰੀ ’ਵਰਸਿਟੀ ਦੀਆਂ ਖੋਜਾਰਥਣਾਂ ਨੂੰ ਕੌਮੀ ਪੱਧਰ ਦੇ ਥੀਸਿਸ ਐਵਾਰਡ
ਖੇਤਰੀ ਪ੍ਰਤੀਨਿਧ
ਲੁਧਿਆਣਾ, 12 ਮਈ
ਗੁਰੂ ਅੰਗਦ ਦੇਵ ਵੈਟਰਨਰੀ ਅਤੇ ਐਨੀਮਲ ਸਾਇੰਸਿਜ਼ ਯੂਨੀਵਰਸਿਟੀ ਦੇ 10 ਪੀਐੱਚਡੀ ਅਤੇ 2 ਐੱਮਵੀਐੱਸਸੀ ਖੋਜਾਰਥੀਆਂ ਨੂੰ ਸਰਵਉੱਤਮ ਐੱਮਵੀਐੱਸਸੀ ਤੇ ਪੀਐੱਚਡੀ ਥੀਸਿਸ ਪੁਰਸਕਾਰ ਪ੍ਰਾਪਤ ਹੋਏ ਹਨ। ਇੰਡੀਅਨ ਵੈਟਰਨਰੀ ਐਸੋਸੀਏਸ਼ਨ ਦੇ ਨਾਰੀ ਵੈਟਰਨਰੀ ਵਿੰਗ ਵੱਲੋਂ ਸਰਵਉੱਤਮ ਐੱਮਵੀਐੱਸਸੀ ਅਤੇ ਪੀਐੱਚਡੀ ਥੀਸਿਸ ਐਵਾਰਡ ਸਮਾਰੋਹ ਬਿਹਾਰ ਐਨੀਮਲ ਸਾਇੰਸਿਜ਼ ਯੂਨੀਵਰਸਿਟੀ ਦੇ ਸਹਿਯੋਗ ਨਾਲ ਪਟਨਾ ਵਿੱਚ ਕਰਵਾਇਆ ਗਿਆ। ਅਪਾਣੀ ਕਿਸਮ ਦੇ ਕਰਵਾਏ ਗਏ ਇਸ ਪਹਿਲੇ ਸਮਾਰੋਹ ਵਿੱਚ ਕੌਮੀ ਪੱਧਰ ’ਤੇ ਵੈਟਰਨਰੀ ਅਤੇ ਪਸ਼ੂ ਵਿਗਿਆਨ ਦੇ 18 ਅਨੁਸ਼ਾਸਨਾਂ ਦੇ ਖੋਜਾਰਥੀਆਂ ਨੂੰ ਆਪਣੇ ਥੀਸਿਸ ਪ੍ਰਸਤੁਤ ਕਰਨ ਲਈ ਸੱਦਾ ਦਿੱਤਾ ਗਿਆ ਸੀ।
ਇਸ ਮੁਕਾਬਲੇ ਵਿੱਚ ਮੁਲਕ ਦੀਆਂ ਨਾਮੀ ਸੰਸਥਾਵਾਂ ਤੋਂ ਕੁੱਲ 347 ਥੀਸਿਸ ਪ੍ਰਾਪਤ ਹੋਏ ਸਨ ਜਿਨ੍ਹਾਂ ਵਿੱਚ 224 ਐੱਮਵੀਐੱਸਸੀ ਅਤੇ 123 ਪੀਐੱਚਡੀ ਦੇ ਸਨ। ਉੱਚ ਪੱਧਰ ਦੇ 40 ਮਾਹਿਰਾਂ ਨੇ ਇਨ੍ਹਾਂ ਥੀਸਿਸਾਂ ਦੀ ਪੜਚੋਲ ਕੀਤੀ ਅਤੇ ਇਕ ਪਾਰਦਰਸ਼ੀ ਨੀਤੀ ਰਾਹੀਂ 2019 ਤੋਂ 2024 ਦੌਰਾਨ ਪੇਸ਼ ਹੋਏ 67 ਪੀਐੱਚਡੀ ਅਤੇ 78 ਐੱਮਵੀਐੱਸਸੀ ਥੀਸਿਸਾਂ ਨੂੰ ਸਰਵਉੱਤਮ ਜਾਣਿਆ ਗਿਆ। ਇਸ ਸਮਾਰੋਹ ਵਿੱਚ ਵੈਟਰਨਰੀ ਵਿਗਿਆਨ ਦੀ ਵਿਦਿਆ ਅਤੇ ਇਸ ਪੇਸ਼ੇ ਦੀ ਵਿਭਿੰਨਤਾ ਨੂੰ ਉਜਾਗਰ ਕਰਦੀ ਹੋਈ ਔਰਤ ਸ਼ਕਤੀਕਰਨ ਦੀ ਝਲਕ ਵੀ ਪ੍ਰਾਪਤ ਹੋਈ। ਯੂਨੀਵਰਸਿਟੀ ਵਿੱਚੋਂ ਪੀਐੱਚਡੀ ਥੀਸਿਸ ਲਈ ਡਾ. ਗੁਰਜੋਤ ਕੌਰ ਮਾਵੀ, ਡਾ. ਮੋਨਿਕਾ ਠਾਕੁਰ, ਡਾ. ਰਸ਼ਮੀ ਠਾਕੁਰ, ਡਾ. ਸ਼੍ਰੀਕਲਾ, ਡਾ. ਨਿੰਬਾਲਕਰ ਵਿਦਿਆ, ਡਾ. ਸਮੀਕਸ਼ਿਆ ਸਾਰੰਗੀ, ਡਾ. ਸੁੰਦਸ ਗ਼ਜ਼ਲ, ਡਾ. ਅਕਸ਼ਿਤਾ ਚੱਢਾ, ਡਾ. ਸ਼ਿਖਾ ਚੌਧਰੀ ਅਤੇ ਡਾ. ਤੁਲੁਮੋਨੀ ਸੀਲ ਨੇ ਅਵਾਰਡ ਪ੍ਰਾਪਤ ਕੀਤਾ। ਐੱਮਵੀਐੱਸਸੀ ਥੀਸਿਸ ਲਈ ਡਾ. ਹਬੂ ਐਸ਼ਵਰਿਆ ਅਤੇ ਡਾ. ਏਨਾਮੀਕਾ ਰਾਣੀ ਨੂੰ ਸਨਮਾਨਿਤ ਕੀਤਾ ਗਿਆ। ਉਪ-ਕੁਲਪਤੀ ਡਾ. ਜਤਿੰਦਰ ਪਾਲ ਸਿੰਘ ਗਿੱਲ ਨੇ ਸਾਰੇ ਜੇਤੂਆਂ ਨੂੰ ਮੁਬਾਰਕਬਾਦ ਦਿੱਤੀ ਕਿ ਉਨ੍ਹਾਂ ਨੇ ਬਿਹਤਰ ਖੋਜ ਪ੍ਰਬੰਧ ਤਿਆਰ ਕਰਕੇ ਅਤੇ ਸਨਮਾਨ ਹਾਸਿਲ ਕਰਕੇ ਯੂਨੀਵਰਸਿਟੀ ਦਾ ਨਾਮ ਉੱਚਾ ਕੀਤਾ ਹੈ। ਨਿਰਦੇਸ਼ਕ ਖੋਜ ਡਾ. ਪਰਕਾਸ਼ ਸਿੰਘ ਬਰਾੜ ਨੇ ਸਾਰੇ ਸਨਮਾਨਿਤ ਖੋਜਾਰਥੀਆਂ ਦੀ ਉਨ੍ਹਾਂ ਦੀ ਖੋਜ ਪ੍ਰਤੀ ਰੁਚੀ ਲਈ ਸਰਾਹਨਾ ਕੀਤੀ। ਡੀਨ ਪੋਸਟ ਗ੍ਰੈਜੂਏਟ ਸਟੱਡੀਜ਼ ਡਾ. ਸੰਜੀਵ ਕੁਮਾਰ ਉੱਪਲ ਨੇ ਕਿਹਾ ਕਿ ਇਨ੍ਹਾਂ ਖੋਜਾਰਥੀਆਂ ਨੇ ਬਹੁਤ ਮਿਹਨਤ ਅਤੇ ਸਮਰਪਣ ਭਾਵ ਨਾਲ ਆਪਣਾ ਕੰਮ ਸੰਪੂਰਨ ਕੀਤਾ ਹੈ।
