ਭਾਜਪਾ ਨੂੰ ਸੱਤਾ ’ਚ ਲਿਆ ਕੇ ਪਛਤਾ ਰਹੇ ਹਨ ਦਿੱਲੀ ਵਾਸੀ: ਭਾਰਦਵਾਜ
ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 11 ਜੁਲਾਈ
ਆਮ ਆਦਮੀ ਪਾਰਟੀ ਦੇ ਦਿੱਲੀ ਪ੍ਰਦੇਸ਼ ਪ੍ਰਧਾਨ ਸੌਰਭ ਭਾਰਦਵਾਜ ਨੇ ਕਿਹਾ ਕਿ ਦਿੱਲੀ ਦੇ ਲੋਕਾਂ ਨੇ ਬਹੁਤ ਉਮੀਦਾਂ ਨਾਲ ਭਾਜਪਾ ਨੂੰ ਸੱਤਾ ਸੌਂਪੀ ਸੀ ਪਰ ਪੰਜ ਮਹੀਨਿਆਂ ਦੇ ਅੰਦਰ-ਅੰਦਰ ਉਹ ਆਪਣੇ ਫ਼ੈਸਲੇ ‘ਤੇ ਪਛਤਾ ਰਹੇ ਹਨ। ਥੋੜ੍ਹੇ ਜਿਹੇ ਮੀਂਹ ਤੋਂ ਬਾਅਦ ਸੜਕਾਂ ਤੋਂ ਲੈ ਕੇ ਗਲੀਆਂ ਤੱਕ ਭਾਰੀ ਪਾਣੀ ਭਰ ਜਾਣਾ, ਸਾਫ਼ ਪਾਣੀ ਦੀ ਘਾਟ ਅਤੇ ਬਿਜਲੀ ਕੱਟਾਂ ਨੇ ਦਿੱਲੀ ਵਾਸੀਆਂ ਨੂੰ ਇਹ ਸੋਚਣ ਲਈ ਮਜਬੂਰ ਕਰ ਦਿੱਤਾ ਹੈ ਕਿ ਉਨ੍ਹਾਂ ਦਾ ਫ਼ੈਸਲਾ ਗ਼ਲਤ ਸੀ। ਹੁਣ ਭਾਜਪਾ ਸਰਕਾਰ ਦੀ ਨਾਕਾਮੀ ਦੀ ਚਰਚਾ ਸਮਾਜ ਦੇ ਵਟਸਐਪ ਗਰੁੱਪਾਂ ਅਤੇ ਡਰਾਇੰਗ ਰੂਮਾਂ ਵਿੱਚ ਵੀ ਹੋ ਰਹੀ ਹੈ। ਸੌਰਭ ਭਾਰਦਵਾਜ ਨੇ ਦਿੱਲੀ ਤੋਂ ਗੁਰੂਗ੍ਰਾਮ ਤੱਕ ਭਾਰੀ ਪਾਣੀ ਭਰਨ ਦੇ ਮਾਮਲੇ ’ਤੇ ਕਿਹਾ ਕਿ ਲੋਕਾਂ ਨੂੰ ਉਮੀਦ ਸੀ ਕਿ ਭਾਜਪਾ ਚੰਗਾ ਕੰਮ ਕਰੇਗੀ ਕਿਉਂਕਿ ਉਹ 27 ਸਾਲਾਂ ਬਾਅਦ ਇਸ ਪਾਰਟੀ ਨੂੰ ਮੌਕਾ ਦੇ ਰਹੇ ਹਨ ਪਰ ਇਹ ਪਾਰਟੀ ਪੂਰੀ ਤਰ੍ਹਾਂ ਅਸਫਲ ਸਾਬਤ ਹੋਈ ਹੈ। ਸੜਕਾਂ ’ਤੇ ਪਾਣੀ ਭਰਨ ਦੇ ਮੁੱਦੇ ’ਤੇ ‘ਆਪ’ ਦੇ ਦਿੱਲੀ ਪ੍ਰਦੇਸ਼ ਪ੍ਰਧਾਨ ਸੌਰਭ ਭਾਰਦਵਾਜ ਨੇ ਕਿਹਾ ਕਿ ਅੱਜ ਲੋਕਾਂ ਵਿੱਚ ਚਰਚਾ ਇਹ ਹੈ ਕਿ ਉਹ ਇਹ ਮੰਨ ਰਹੇ ਹਨ ਕਿ ਭਾਜਪਾ ਨੂੰ ਦਿੱਲੀ ਲਿਆਉਣਾ ਇੱਕ ਵੱਡੀ ਗ਼ਲਤੀ ਸੀ। ਲੋਕ ਭੁੱਲ ਗਏ ਹਨ ਕਿ ਉਹੀ ਭਾਜਪਾ ਜੋ ਪਿਛਲੇ 12-14 ਸਾਲਾਂ ਤੋਂ ਹਰਿਆਣਾ ਵਿੱਚ ਸਰਕਾਰ ਚਲਾ ਰਹੀ ਹੈ ਅਤੇ ਹਰ ਵਾਰ ਗੁੜਗਾਓਂ ਨਗਰ ਨਿਗਮ ਵਿੱਚ ਜਿੱਤਦੀ ਹੈ, ਇਸਦੇ ਬਾਵਜੂਦ, ਉੱਥੇ ਫਲੈਟਾਂ ਵਿੱਚ ਰਹਿਣ ਵਾਲੇ ਲੋਕਾਂ ਦੀਆਂ ਕਰੋੜਾਂ ਰੁਪਏ ਦੀਆਂ ਗੱਡੀਆਂ ਪਾਣੀ ਵਿੱਚ ਡੁੱਬ ਰਹੀਆਂ ਹਨ। ਇਹ ਹਰ ਸਾਲ ਹੀ ਹੁੰਦਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਸਭ ਜਾਣਨ ਦੇ ਬਾਵਜੂਦ ਦਿੱਲੀ ਦੇ ਲੋਕਾਂ ਨੇ ਭਾਜਪਾ ਨੂੰ ਇਹ ਸੋਚ ਕੇ ਮੌਕਾ ਦਿੱਤਾ ਕਿ ਦਿੱਲੀ ਦੀ ਲੀਡਰਸ਼ਿਪ ਕੁਝ ਕਰੇਗੀ ਪਰ ਪਹਿਲੇ ਮੌਨਸੂਨ ਵਿੱਚ ਹੀ ਭਾਜਪਾ ਦੇ ਚਾਰਾਂ ਇੰਜਣਾਂ ਦੀ ਅਸਲੀਅਤ ਸਾਹਮਣੇ ਆਈ ਹੈ। ਜੇਕਰ ਅੱਜ ‘ਆਪ’ ਕੋਲ ਐਮਸੀਡੀ ਹੁੰਦੀ ਤਾਂ ਮੁੱਖ ਮੰਤਰੀ, ਮੰਤਰੀ, ਉਪ ਰਾਜਪਾਲ ਅਤੇ ਇਹ ਸਾਰੇ ਭਾਜਪਾ ਵਾਲੇ ਸਾਰਾ ਦੋਸ਼ ‘ਆਪ’ ‘ਤੇ ਮੜ੍ਹ ਦਿੰਦੇ ਕਿ ਇਹ ਗੜਬੜ ਕਰ ਰਹੀ ਹੈ ਪਰ ਅੱਜ ਦਿੱਲੀ ਵਾਲੇ ਦੇਖ ਰਹੇ ਹਨ ਕਿ ਭਾਵੇਂ ਉਹ ਐਨਡੀਐਮਸੀ, ਡੀਡੀਏ, ਐਮਸੀਡੀ ਜਾਂ ਪੀਡਬਲਿਊਡੀ ਸੜਕਾਂ ਹੋਣ, ਚਾਰੇ ਇੰਜਣ ਉਨ੍ਹਾਂ ਦੇ ਨਾਲ ਹਨ। ਫਿਰ ਵੀ ਹਰ ਸੜਕ ਪਾਣੀ ਨਾਲ ਭਰੀ ਹੋਈ ਹੈ ਜੋ ਕਿ ਦਿੱਲੀ ਲਈ ਇੱਕ ਵੱਡੀ ਬਦਕਿਸਮਤੀ ਹੈ।
