ਜਥੇਦਾਰ ਗੰਡਾ ਸਿੰਘ ਦੀ ਯਾਦਗਾਰ ਲਈ ਫੰਡ ਰਿਲੀਜ਼ ਕਰਨ ਦੀ ਮੰਗ
ਸਰਬਜੀਤ ਸਿੰਘ ਭੱਟੀ
ਲਾਲੜੂ , 7 ਜੁਲਾਈ
ਲਾਲੜੂ ਖੇਤਰ ਨਾਲ ਸਬੰਧਤ ਆਜ਼ਾਦੀ ਘੁਲਾਟੀਏ ਅਤੇ ਅਕਾਲੀ ਆਗੂ , ਜਥੇਦਾਰ ਗੰਡਾ ਸਿੰਘ ਸਾਧਾਂਪੁਰ ਦੀ ਯਾਦਗਾਰ ਬਣਾਉਣ ਲਈ ਫੰਡ ਜਾਰੀ ਕਰਨ ਦੀ ਮੰਗ ਕੀਤੀ ਗਈ ਹੈ। ਇਸ ਸਬੰਧੀ ਗਰਾਮ ਪੰਚਾਇਤ ਅਤੇ ਪਿੰਡ ਸਾਂਧਾਪੁਰ ਦੇ ਆਗੂਆਂ ਵੱਲੋਂ ਮਤਾ ਪਾਇਆ ਗਿਆ। ਇਸ ਮਤੇ ਵਿੱਚ ਜਥੇਦਾਰ ਗੰਡਾ ਸਿੰਘ ਵੱਲੋਂ ਦੇਸ਼ ਦੀ ਅਜ਼ਾਦੀ ਅਤੇ ਪੰਜਾਬੀ ਸੂਬੇ ਮੋਰਚੇ ਵਿੱਚ ਕੀਤੀ ਸ਼ਮੂਲੀਅਤ ਬਾਰੇ ਜਾਣਕਾਰੀ ਦਿੱਤੀ ਕਿ ਜਥੇਦਾਰ ਗੰਡਾ ਸਿੰਘ ਨੇ 1940 ਤੋਂ ਲੈ ਕੇ 1947 ਤੱਕ ਕਾਲੇ ਪਾਣੀ ਦੀ ਸਜ਼ਾ ਭੁਗਤੀ ਸੀ ਅਤੇ ਦੇਸ਼ ਅਜ਼ਾਦ ਹੋਣ ਤੋਂ ਬਾਅਦ ਜਦੋਂ ਪੰਜਾਬ ਵਿੱਚ ਪੰਜਾਬੀ ਸੂਬੇ ਮੋਰਚੇ ਦੀ ਮੰਗ ਉਠ ਗਈ ਸੀ ਤਾਂ ਉਹ ਪੰਜਾਬੀ ਸੂਬੇ ਦੀ ਮੰਗ ਨੂੰ ਲੈ ਕੇ 1959 ਤੋਂ ਲੈ ਕੇ 1960 ਤੱਕ ਅੰਬਾਲਾ ਜੇਲ੍ਹ ਵਿੱਚ ਰਹੇ। ਆਗੂਆਂ ਨੇ ਰੋਸ ਪ੍ਰਗਟਾਇਆ ਕਿ ਲਾਲੜੂ ਖੇਤਰ ਹਮੇਸ਼ਾ ਸਰਕਾਰੀ ਇਮਦਾਦ ਪੱਖੋਂ ਫਾਡੀ ਰਿਹਾ ਹੈ। ਜਥੇਦਾਰ ਸਾਹਿਬ ਪੰਜਾਬੀ ਸੂਬੇ ਦੀ ਚਾਹਤ ਨੂੰ ਆਪਣੇ ਦਿਲ ਵਿੱਚ ਲੈ ਕੇ 1983 ਨੂੰ ਇਸ ਦੁਨੀਆ ਨੂੰ ਅਲਵਿਦਾ ਆਖ ਗਏ ਸਨ ਤੇ ਇਸ ਸਮੇਂ ਉਨ੍ਹਾਂ ਦਾ ਪੋਤਰਾ ਲੱਕੀ ਸਾਧਾਂਪੁਰ ਤੇ ਪਰਿਵਾਰ ਵੀ ਸਮਾਜ ਸੇਵਾ ਵਿੱਚ ਸਰਗਰਮ ਹੈ।
