ਪਾਕਿਸਤਾਨ: ਬਲੋਚਿਸਤਾਨ ਸੂਬੇ ਵਿਚ ਧਮਾਕੇ ਕਾਰਨ 4 ਮੌਤਾਂ, 20 ਜ਼ਖਮੀ

ਕਰਾਚੀ, 19 ਮਈ

ਪਾਕਿਸਤਾਨ ਦੇ ਬਲੋਚਿਸਤਾਨ ਸੂਬੇ ਵਿਚ ਇਕ ਬਾਜ਼ਾਰ ਨੇੜੇ ਹੋਏ ਬੰਬ ਧਮਾਕੇ ਵਿਚ ਚਾਰ ਲੋਕ ਮਾਰੇ ਗਏ ਅਤੇ 20 ਹੋਰ ਜ਼ਖਮੀ ਹੋ ਗਏ। ਇਕ ਮੀਡੀਆ ਰਿਪੋਰਟ ਦੇ ਅਨੁਸਾਰ ਇਹ ਧਮਾਕਾ ਐਤਵਾਰ ਨੂੰ ਬਲੋਚਿਸਤਾਨ ਦੇ ਕਿਲਾ ਅਬਦੁੱਲਾ ਜ਼ਿਲ੍ਹੇ ਵਿਚ ਜੱਬਾਰ ਮਾਰਕੀਟ ਨੇੜੇ ਹੋਇਆ, ਜਿਸ ਨਾਲ ਇਮਾਰਤ ਨੂੰ ਭਾਰੀ ਨੁਕਸਾਨ ਪਹੁੰਚਿਆ ਅਤੇ ਵਿਆਪਕ ਦਹਿਸ਼ਤ ਫੈਲ ਗਈ।

ਐਕਸਪ੍ਰੈਸ ਟ੍ਰਿਬਿਊਨ ਅਖਬਾਰ ਦੀ ਰਿਪੋਰਟ ਅਨੁਸਾਰ ਧਮਾਕੇ ਤੋਂ ਬਾਅਦ ਕਈ ਦੁਕਾਨਾਂ ਢਹਿ ਗਈਆਂ ਅਤੇ ਕਈ ਅਦਾਰਿਆਂ ਵਿਚ ਅੱਗ ਲੱਗ ਗਈ। ਕਿਲਾ ਅਬਦੁੱਲਾ ਦੇ ਡਿਪਟੀ ਕਮਿਸ਼ਨਰ ਰਿਆਜ਼ ਖਾਨ ਨੇ ਦੱਸਿਆ ਕਿ ਧਮਾਕੇ ਵਿਚ ਚਾਰ ਲੋਕ ਮਾਰੇ ਗਏ ਅਤੇ 20 ਹੋਰ ਜ਼ਖਮੀ ਹੋ ਗਏ। ਉਨ੍ਹਾਂ ਕਿਹਾ ਕਿ ਬਾਜ਼ਾਰ ਫਰੰਟੀਅਰ ਕੋਰ (ਐੱਫਸੀ) ਕਿਲ੍ਹੇ ਦੀ ਪਿਛਲੀ ਕੰਧ ਦੇ ਨਾਲ ਸਥਿਤ ਸੀ ਅਤੇ ਧਮਾਕੇ ਤੋਂ ਬਾਅਦ ਅਣਪਛਾਤੇ ਹਮਲਾਵਰਾਂ ਅਤੇ ਐੱਫਸੀ ਕਰਮਚਾਰੀਆਂ ਵਿਚਕਾਰ ਗੋਲੀਬਾਰੀ ਵੀ ਹੋਈ।

ਕਾਨੂੰਨ ਲਾਗੂ ਕਰਨ ਵਾਲੇ ਅਧਿਕਾਰੀਆਂ ਨੇ ਇਲਾਕੇ ਨੂੰ ਸੀਲ ਕਰ ਦਿੱਤਾ ਅਤੇ ਇਕ ਵਿਆਪਕ ਖੋਜ ਅਤੇ ਸਫਾਈ ਮੁਹਿੰਮ ਸ਼ੁਰੂ ਕੀਤੀ। ਕਿਸੇ ਵੀ ਸਮੂਹ ਨੇ ਤੁਰੰਤ ਹਮਲੇ ਦੀ ਜ਼ਿੰਮੇਵਾਰੀ ਨਹੀਂ ਲਈ। ਜ਼ਖਮੀਆਂ ਵਿਚ ਕਬਾਇਲੀ ਬਜ਼ੁਰਗ ਹਾਜੀ ਫੈਜ਼ਉੱਲਾ ਖਾਨ ਗਾਬੀਜ਼ਾਈ ਦਾ ਇੱਕ ਸੁਰੱਖਿਆ ਗਾਰਡ ਅਤੇ ਕਈ ਰਾਹਗੀਰ ਸ਼ਾਮਲ ਸਨ। ਇਹ ਧਮਾਕਾ ਖੁਜ਼ਦਾਰ ਜ਼ਿਲ੍ਹੇ ਦੇ ਨਲ ਖੇਤਰ ਵਿਚ ਇਕ ਚੈੱਕ ਪੋਸਟ ’ਤੇ ਅਣਪਛਾਤੇ ਹਥਿਆਰਬੰਦ ਵਿਅਕਤੀਆਂ ਦੁਆਰਾ ਕੀਤੇ ਗਏ ਘਾਤਕ ਬੰਦੂਕ ਹਮਲੇ ਵਿੱਚ ਚਾਰ ਲੇਵੀ ਕਰਮਚਾਰੀਆਂ ਦੀ ਮੌਤ ਤੋਂ ਕੁਝ ਦਿਨ ਬਾਅਦ ਹੋਇਆ ਹੈ। -ਪੀਟੀਆਈ