ਬਾਜਵਾ ਕਲਾਂ ਤੇ ਢੰਡੋਵਾਲ ’ਚ ਨਾਜਾਇਜ਼ ਨਸ਼ਾ ਛੁਡਾਊ ਕੇਂਦਰਾਂ ’ਤੇ ਛਾਪੇ
ਪੱਤਰ ਪ੍ਰੇਰਕ
ਸ਼ਾਹਕੋਟ, 13 ਮਈ
ਸਿਵਲ ਤੇ ਪੁਲੀਸ ਅਧਿਕਾਰੀਆਂ ਨੇ ਸਿਹਤ ਵਿਭਾਗ ਦੀ ਟੀਮ ਨੂੰ ਨਾਲ ਲੈ ਕੇ ਅੱਜ ਪਿੰਡ ਬਾਜਵਾ ਕਲਾਂ ਤੇ ਢੰਡੋਵਾਲ ਵਿਚ ਚਲਾਏ ਜਾ ਰਹੇ ਗੈਰਕਾਨੂੰਨੀ ਨਸ਼ਾ ਛੁਡਾਊ ਕੇਂਦਰਾਂ ’ਤੇ ਛਾਪੇ ਮਾਰ ਕੇ 76 ਨੌਜਵਾਨਾਂ ਨੂੰ ਆਜ਼ਾਦ ਕਰਵਾ ਕੇ ਇਲਾਜ ਲਈ ਸਿਵਲ ਹਸਪਤਾਲ ਜਲੰਧਰ ਭੇਜ ਦਿੱਤਾ ਹੈ। ਪ੍ਰਾਪਤ ਹੋਈ ਜਾਣਕਾਰੀ ਮੁਤਾਬਿਕ ਐੱਸਪੀ (ਡੀ) ਜਲੰਧਰ ਸਰਬਜੀਤ ਰਾਏ, ਡੀਐੱਸਪੀ ਸ਼ਾਹਕੋਟ ਉਂਕਾਰ ਸਿੰਘ ਬਰਾੜ, ਐੱਸਐੱਚਓ ਸ਼ਾਹਕੋਟ ਬਲਵਿੰਦਰ ਸਿੰਘ ਭੁੱਲਰ,ਐੱਸਐੱਚਓ ਲੋਹੀਆਂ ਖਾਸ ਲਾਭ ਸਿੰਘ ਨੇ ਭਾਰੀ ਪੁਲੀਸ ਫੋਰਸ ਨਾਲ ਟਰਨਿੰਗ ਪੁਆਇੰਟ ਫਾਊਂਡੇਸ਼ਨ ਅਤੇ ਰੀਹੈਬਿਲੀਟੇਸ਼ਨ ਸੈਂਟਰ ਬਾਜਵਾ ਕਲਾਂ ’ਚ ਛਾਪਾ ਮਾਰਿਆ। ਇਹ ਸੈਂਟਰ ਮੋਗਾ ਰੋਡ ਨੂੰ ਜਾਂਦੇ ਰਾਸ਼ਟਰੀ ਹਾਈਵੇਅ ਉੱਪਰ ਸਥਿਤ ਹੈ ਜਿਸ ਦੀ ਇਮਾਰਤ ਨੂੰ ਹਮੇਸ਼ਾ ਬਾਹਰੋਂ ਜਿੰਦਾ ਲੱਗਾ ਰਹਿੰਦਾ ਸੀ। ਇਹ ਇਮਾਰਤ ਪੰਜਾਬ ਪੁਲੀਸ ਦੇ ਇਕ ਏ.ਐੱਸ.ਆਈ ਦੀ ਦੱਸੀ ਜਾ ਰਹੀ ਹੈ ਜੋ ਇਸ ਸਮੇਂ ਵਿਦੇਸ਼ ਵਿੱਚ ਰਹਿ ਰਿਹਾ ਹੈ। ਏ.ਐੱਸ.ਆਈ ਉੱਪਰ ਕਈ ਮੁਕੱਦਮੇ ਵੀ ਚੱਲ ਰਹੇ ਹਨ। ਇਸੇ ਕਰਕੇ ਅਦਾਲਤ ਵੱਲੋਂ ਏ.ਐੱਸ.ਆਈ ਨੂੰ ਭਗੌੜਾ ਕਰਾਰ ਦਿੱਤਾ ਹੋਇਆ ਹੈ।
ਪੁਲੀਸ ਸੂਤਰਾਂ ਮੁਤਾਬਿਕ ਪੁਲੀਸ ਵੱਲੋਂ ਮਾਰੇ ਛਾਪੇ ਮੌਕੇ ਇੱਥੋਂ 29 ਨੌਜਵਾਨ ਮਿਲੇ ਜਿਨ੍ਹਾਂ ਨੂੰ ਨਸ਼ਾ ਛੁਡਾਉਣ ਦੀ ਆੜ ਵਿੱਚ ਬੰਦੀ ਬਣਾਇਆ ਹੋਇਆ ਸੀ। ਇਸ ਮੌਕੇ ਪੁਲੀਸ ਨੂੰ ਸੈਂਟਰ ਚਲਾਉਣ ਵਾਲਾ ਗੁਰਵਿੰਦਰ ਸਿੰਘ ਪੁੱਤਰ ਸ਼ਿੰਗਰਾ ਸਿੰਘ ਵਾਸੀ ਕੋਟ ਈਸੇਖਾਂਤਾਂ ਨਹੀਂ ਮਿਲਿਆ। ਪੁਲੀਸ ਨੇ ਮੌਕੇ ’ਤੇ ਸੈਂਟਰ ਦੇ ਕਰਿੰਦੇ ਕਰਮਜੀਤ ਸਿੰਘ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ।
ਪਿੰਡ ਢੰਡੋਵਾਲ ਵਿੱਚ ਇੰਦਰਜੀਤ ਸਿੰਘ ਵਾਸੀ ਢੰਡੋਵਾਲ ਵੱਲੋਂ ਆਪਣੇ ਘਰ ਵਿੱਚ ਹੀ ਗੈਰਕਾਨੂੰਨੀ ਨਸ਼ਾ ਛੁਡਾਊ ਕੇਂਦਰ ਚਲਾਇਆ ਰਿਹਾ ਸੀ। ਉਕਤ ਸਾਰੀ ਟੀਮ ਵੱਲੋਂ ਅੱਜ ਇਸ ਕੇਂਦਰ ਵਿੱਚ ਛਾਪਾਮਾਰੀ ਕਰਕੇ ਨਸ਼ਾ ਛੁਡਾਉਣ ਦੀ ਆੜ ਵਿਚ ਬੰਦੀ ਬਣਾਏ 47 ਨੌਜਵਾਨਾਂ ਨੂੰ ਰਿਹਾਅ ਕਰਵਾਇਆ ਗਿਆ। ਇਸ ਸੈਂਟਰ ਦਾ ਮਾਲਕ ਵੀ ਪੁਲੀਸ ਦੀ ਗ੍ਰਿਫਤ ’ਚੋਂ ਬਾਹਰ ਹੈ। ਸੈਂਟਰ ਦੇ ਕਰਿੰਦੇ ਮਨਪ੍ਰੀਤ ਸਿੰਘ ਨੂੰ ਪੁਲੀਸ ਨੇ ਗ੍ਰਿਫਤਾਰ ਕਰ ਲਿਆ ਹੈ। ਪੁਲੀਸ ਇਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ ਤਾਂ ਕਿ ਪਤਾ ਲਗਾਇਆ ਜਾ ਸਕੇ ਕਿ ਇਸਦੀਆਂ ਤਾਰਾਂ ਕਿੱਥੇ-ਕਿੱਥੇ ਜੁੜੀਆਂ ਹੋਈਆਂਹਨ।
