ਸੈਕਟਰ 89 ਦੇ ਵਸਨੀਕਾਂ ਵੱਲੋਂ ਕੰਗ ਨਾਲ ਮੁਲਾਕਾਤ

ਗੁਰਦੁਆਰਾ ਸਾਹਿਬ ਲਈ ਰਾਖਵਾਂ ਪਲਾਂਟ ਸਿੰਘ ਸਭਾ ਸੁਸਾਇਟੀ ਨੂੰ ਅਲਾਟ ਕਰਾਉਣ ਦੀ ਮੰਗ

ਖੇਤਰੀ ਪ੍ਰਤੀਨਿਧ

ਐੱਸਏਐੱਸ ਨਗਰ (ਮੁਹਾਲੀ), 05:44 AM Jul 27, 2025 IST

ਸੰਸਦ ਮੈਂਬਰ ਮਾਲਵਿੰਦਰ ਸਿੰਘ ਕੰਗ ਨੂੰ ਮੰਗ ਪੱਤਰ ਸੌਂਪਦੇ ਹੋਏ ਮੁਹਾਲੀ ਦੇ ਸੈਕਟਰ 89 ਦੇ ਵਸਨੀਕ।

ਗੁਰਦੁਆਰਾ ਸਿੰਘ ਸਭਾ ਸੁਸਾਇਟੀ ਸੈਕਟਰ 89 ਦੇ ਅਹੁਦੇਦਾਰਾਂ ਅਤੇ ਸਮੂਹ ਸੈਕਟਰ ਵਾਸੀਆਂ ਦਾ ਇੱਕ ਵਫ਼ਦ ਪ੍ਰਧਾਨ ਗੁਰਮੁਖ ਸਿੰਘ ਅਤੇ ਸਕੱਤਰ ਦੀਦਾਰ ਸਿੰਘ ਸੋਨੀ ਦੀ ਅਗਵਾਈ ਵਿੱਚ ਸ੍ਰੀ ਆਨੰਦਪੁਰ ਸਾਹਿਬ ਤੋਂ ਸੰਸਦ ਮੈਂਬਰ ਮਾਲਵਿੰਦਰ ਸਿੰਘ ਕੰਗ ਨੂੰ ਮਿਲਿਆ। ਵਫ਼ਦ ਨੇ ਸ੍ਰੀ ਕੰਗ ਕੋਲੋਂ ਮੰਗ ਕੀਤੀ ਕਿ ਸੈਕਟਰ 89 ਵਿੱਚ ਗੁਰਦੁਆਰਾ ਸਾਹਿਬ ਬਣਾਉਣ ਲਈ ਰਾਖਵਾਂ ਪਲਾਟ ਗੁਰਦੁਆਰਾ ਸਿੰਘ ਸਭਾ ਸੋਸਾਇਟੀ ਸੈਕਟਰ 89 ਮੁਹਾਲੀ ਨੂੰ ਦਿਵਾਇਆ ਜਾਵੇ।

ਸੁਸਾਇਟੀ ਦੇ ਪ੍ਰਧਾਨ ਗੁਰਮੁਖ ਸਿੰਘ ਨੇ ਦੱਸਿਆ ਕਿ ਇਸ ਸੈਕਟਰ ਵਿੱਚ ਕੋਈ ਗੁਰਦੁਆਰਾ ਸਾਹਿਬ ਨਹੀਂ ਹੈ ਅਤੇ ਧਾਰਮਿਕ ਸਥਾਨ ਲਈ ਇੱਥੇ ਇੱਕ ਪਲਾਟ ਦੀ ਨਿਸ਼ਾਨਦੇਹੀ ਗਮਾਡਾ ਵੱਲੋਂ ਪਹਿਲੋਂ ਹੀ ਕੀਤੀ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਸ੍ਰੀ ਕੰਗ ਨੇ ਉਨ੍ਹਾਂ ਦੀ ਬੇਨਤੀ ਨੂੰ ਬੜੇ ਧਿਆਨ ਨਾਲ ਸੁਣਿਆ ਅਤੇ ਮੌਕੇ’ ਤੇ ਹੀ ਗਮਾਡਾ ਦੇ ਮੁੱਖ ਪ੍ਰਸ਼ਾਸਕ ਤੋਂ ਸਾਰੀ ਜਾਣਕਾਰੀ ਲੈਣ ਉਪਰੰਤ ਵਫ਼ਦ ਨੂੰ ਭਰੋਸਾ ਦਿਵਾਇਆ ਕਿ ਗੁਰਦੁਆਰਾ ਸਾਹਿਬ ਦੇ ਪਲਾਟ ਤੇ ਪਹਿਲਾ ਹੱਕ ਇਸੇ ਸੁਸਾਇਟੀ ਦਾ ਬਣਦਾ ਹੈ। ਸੁਸਾਇਟੀ ਨੇ ਮੰਗ ਕੀਤੀ ਕਿ ਇਹ ਪਲਾਟ ਇਸ ਸੁਸਾਇਟੀ ਨੂੰ ਤੁਰੰਤ ਦਿਵਾਇਆ ਜਾਵੇ।