Kerala ragging case: ਨਰਸਿੰਗ ਕਾਲਜ ਰੈਗਿੰਗ ਮਾਮਲਾ: ਕੇਰਲ ’ਚ ਪ੍ਰਿੰਸੀਪਲ ਤੇ ਸਹਾਇਕ ਪ੍ਰੋਫੈਸਰ ਮੁਅੱਤਲ
ਕੋਟਾਯਮ (ਕੇਰਲ), 15 ਫਰਵਰੀ
ਸਰਕਾਰੀ ਕਾਲਜ ਆਫ਼ ਨਰਸਿੰਗ ਕੋਟਾਯਮ ਦੇ ਪ੍ਰਿੰਸੀਪਲ ਅਤੇ ਇੱਕ ਸਹਾਇਕ ਪ੍ਰੋਫੈਸਰ ਨੂੰ ਇੱਕ ਵਿਦਿਆਰਥੀਆਂ ਦੇ ਹੋਸਟਲ ਵਿੱਚ ਬੇਰਹਿਮੀ ਨਾਲ ਰੈਗਿੰਗ ਦੀ ਘਟਨਾ ਦੇ ਮਾਮਲੇ ਵਿੱਚ ਮੁਅੱਤਲ ਕਰ ਦਿੱਤਾ ਗਿਆ ਹੈ। ਸ਼ੁੱਕਰਵਾਰ ਦੇਰ ਰਾਤ ਸਿਹਤ ਮੰਤਰੀ ਦੇ ਦਫ਼ਤਰ ਵੱਲੋਂ ਜਾਰੀ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਕਾਲਜ ਦੇ ਵਿਦਿਆਰਥੀਆਂ ਦੇ ਹੋਸਟਲ ਦੇ ਪ੍ਰਿੰਸੀਪਲ ਸੁਲੇਖਾ ਏਟੀ ਅਤੇ ਸਹਾਇਕ ਪ੍ਰੋਫੈਸਰ/ਸਹਾਇਕ ਵਾਰਡਨ ਇੰਚਾਰਜ ਅਜੀਸ਼ ਪੀ ਮਨੀ ਨੂੰ ਰੈਗਿੰਗ ਨੂੰ ਰੋਕਣ ਵਿੱਚ ਕਥਿਤ ਤੌਰ ’ਤੇ ਅਸਫਲ ਰਹਿਣ ਅਤੇ ਮਾਮਲੇ ਵਿੱਚ ਮੁਅੱਤਲ ਕਰ ਦਿੱਤਾ ਗਿਆ ਹੈ।
ਇਸ ਵਿਚ ਕਿਹਾ ਗਿਆ ਹੈ ਕਿ ਹੋਸਟਲ ਦੇ ਹਾਊਸਕੀਪਰ-ਕਮ-ਸੁਰੱਖਿਆ ਨੂੰ ਵੀ ਤੁਰੰਤ ਹਟਾਉਣ ਦੇ ਆਦੇਸ਼ ਦਿੱਤੇ ਗਏ ਹਨ। ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਸਿਹਤ ਮੰਤਰੀ ਵੀਨਾ ਜਾਰਜ ਦੀਆਂ ਹਦਾਇਤਾਂ ਅਨੁਸਾਰ ਮੈਡੀਕਲ ਸਿੱਖਿਆ ਦੇ ਡਾਇਰੈਕਟਰ ਵੱਲੋਂ ਕੀਤੀ ਗਈ ਜਾਂਚ ਤੋਂ ਬਾਅਦ ਇਹ ਕਾਰਵਾਈ ਕੀਤੀ ਗਈ ਹੈ।
ਰੈਗਿੰਗ ਦੇ ਨਾਂ ’ਤੇ ਅਣਮਨੁੱਖੀ ਵਤੀਰਾ ਸਾਹਮਣੇ ਆਇਆ
ਕਾਲਜ ਵਿਚ ਇਕ ਜੂਨੀਅਰ ਵਿਦਿਆਰਥੀ ਦੀ ਬੇਰਹਿਮੀ ਨਾਲ ਰੈਗਿੰਗ ਦੇ ਪਰੇਸ਼ਾਨ ਕਰਨ ਵਾਲੇ ਦ੍ਰਿਸ਼ ਵੀਰਵਾਰ ਨੂੰ ਸਾਹਮਣੇ ਆਏ ਸਨ, ਜਿਸ ਵਿਚ ਪੀੜਤ ਨੂੰ ਇਕ ਮੰਜੇ ਨਾਲ ਬੰਨ੍ਹਿਆ ਗਿਆ ਅਤੇ ਕੰਪਾਸ ਨਾਲ ਵਾਰ-ਵਾਰ ਵਿੰਨ੍ਹਿਆ ਗਿਆ।
ਗਾਂਧੀਨਗਰ ਪੁਲੀਸ ਵੱਲੋਂ ਪ੍ਰਾਪਤ ਕੀਤੀ ਫੁਟੇਜ ਦੇ ਅਨੁਸਾਰ ਪੀੜਤ ਨੂੰ ਅੱਧਨੰਗਾ ਕੀਤਾ ਗਿਆ ਸੀ ਅਤੇ ਉਸ ਨਾਲ ਭਿਆਨਕ ਹਰਕਤਾਂ ਕੀਤੀਆਂ ਗਈਆਂ ਸਨ, ਜਿਸ ਵਿੱਚ ਇੱਕ ਮੰਜੇ ਨਾਲ ਬੰਨ੍ਹਣ ਤੋਂ ਬਾਅਦ ਉਸਦੇ ਗੁਪਤ ਅੰਗਾਂ ’ਤੇ ਡੰਬਲ ਰੱਖੇ ਗਏ ਸਨ ਅਤੇ ਉਸਦੇ ਮੂੰਹ ਵਿੱਚ ਫੇਸ਼ੀਅਲ ਕਰੀਮ ਪਾਈ ਗਈ ਸੀ।
ਇਹ ਦੁਰਵਿਵਹਾਰ ਦੀ ਘਟਨਾ ਲੜਕਿਆਂ ਦੇ ਹੋਸਟਲ ਵਿਚ ਵਾਪਰੀ, ਜਿਸ ਵਿੱਚ ਨਰਸਿੰਗ ਦੇ ਪਹਿਲੇ ਸਾਲ ਦੇ ਵਿਦਿਆਰਥੀਆਂ ਨੂੰ ਨਿਸ਼ਾਨਾ ਬਣਾਇਆ ਗਿਆ।
ਘਟਨਾ ਨੂੰ ਅੰਜਾਮ ਦੇਣ ਵਾਲੇ ਪੰਜ ਵਿਦਿਆਰਥੀ ਗ੍ਰਿਫ਼ਤਾਰ
ਤੀਜੇ ਸਾਲ ਦੇ ਪੰਜ ਵਿਦਿਆਰਥੀਆਂ ਸੈਮੂਅਲ ਜੌਹਨਸਨ (20), ਰਾਹੁਲ ਰਾਜ (22), ਜੀਵ (18), ਰਿਜਿਲ ਜਿਥ (20) ਅਤੇ ਵਿਵੇਕ (21) ਨੂੰ ਮਾਮਲੇ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਸਰਕਾਰੀ ਮੈਡੀਕਲ ਕਾਲਜ ਅਧੀਨ ਚੱਲ ਰਹੇ ਨਰਸਿੰਗ ਕਾਲਜ ਵਿੱਚ ਪਿਛਲੇ ਕਰੀਬ ਤਿੰਨ ਮਹੀਨਿਆਂ ਤੋਂ ਰੈਗਿੰਗ ਚੱਲ ਰਹੀ ਸੀ, ਇਸ ਸ਼ਿਕਾਇਤ ਤੋਂ ਬਾਅਦ ਰੈਗਿੰਗ ਰੋਕੂ ਐਕਟ ਤਹਿਤ ਕੇਸ ਦਰਜ ਕਰਕੇ ਇਨ੍ਹਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ।
ਗ੍ਰਿਫਤਾਰ ਵਿਦਿਆਰਥੀ ਇਸ ਸਮੇਂ ਅਦਾਲਤ ਤੋਂ ਰਿਮਾਂਡ ਲੈਣ ਤੋਂ ਬਾਅਦ ਜ਼ਿਲ੍ਹਾ ਜੇਲ੍ਹ ’ਚ ਬੰਦ ਹਨ। ਕਾਂਗਰਸ ਦੀ ਅਗਵਾਈ ਵਾਲੀ ਵਿਰੋਧੀ ਧਿਰ ਯੂਡੀਐੱਫ ਨੇ ਸ਼ੁੱਕਰਵਾਰ ਨੂੰ ਦਾਅਵਾ ਕੀਤਾ ਕਿ ਕੋਟਾਯਮ ਸਰਕਾਰੀ ਨਰਸਿੰਗ ਕਾਲਜ ਰੈਗਿੰਗ ਮਾਮਲੇ ਦੇ ਦੋਸ਼ੀਆਂ ਦੇ ਖੱਬੇ ਪੱਖੀ ਵਿਦਿਆਰਥੀ ਸੰਗਠਨ, SFI ਨਾਲ ਸਬੰਧਤ ਹਨ। -ਪੀਟੀਆਈ
