ਕਾਂਗਰਸ ਨੇ National Herald ਅਖ਼ਬਾਰ ਨੂੰ ATM ਵਜੋਂ ਵਰਤਿਆ: ਭਾਜਪਾ
ਨਵੀਂ ਦਿੱਲੀ, 18 ਅਪਰੈਲ
Sonia, Rahul eyed Rs 2,000 cr properties without investing a penny: BJP ਭਾਜਪਾ ਨੇ ਦੋਸ਼ ਲਾਇਆ ਕਿ ਕਾਂਗਰਸ ਨੇ ਨੈਸ਼ਨਲ ਹੈਰਾਲਡ ਅਖ਼ਬਾਰ ਨੂੰ ਏਟੀਐੱਮ ਵਜੋਂ ਵਰਤਿਆ ਹੈ। ਭਾਜਪਾ ਆਗੂ ਅਨੁਰਾਗ ਠਾਕੁਰ ਨੇ ਦੋਸ਼ ਲਾਇਆ ਕਿ ਗਾਂਧੀ ਪਰਿਵਾਰ ਨੇ ਆਪਣੀ ਜੇਬ ’ਚੋਂ ਇੱਕ ਵੀ ਪੈਸਾ ਨਿਵੇਸ਼ ਕੀਤੇ ਬਿਨਾਂ ਨੈਸ਼ਨਲ ਹੈਰਾਲਡ ਦੀਆਂ 2,000 ਕਰੋੜ ਰੁਪਏ ਦੀਆਂ ਜਾਇਦਾਦਾਂ ਹੜੱਪਣ ਦੀ ਕੋਸ਼ਿਸ਼ ਕੀਤੀ।
ਉਨ੍ਹਾਂ ਭ੍ਰਿਸ਼ਟਾਚਾਰ ਦੇ ਦੋਸ਼ਾਂ ਦਾ ਸਾਹਮਣਾ ਕਰ ਰਹੇ ਕਾਂਗਰਸੀ ਆਗੂਆਂ ਨੂੰ ਮਾਮਲੇ ਦੇ ਜਲਦੀ ਅਤੇ ਸਮਾਂਬੱਧ ਨਿਪਟਾਰੇ ਦੀ ਮੰਗ ਕਰਨ ਦੀ ਚੁਣੌਤੀ ਵੀ ਦਿੱਤੀ। ਉਂਝ ਪਾਰਟੀ ਨੇ ਸੋਨੀਆ ਗਾਂਧੀ ਅਤੇ ਰਾਹੁਲ ਗਾਂਧੀ ਖਿਲਾਫ਼ ਈਡੀ ਦੀ ਕਾਰਵਾਈ ਪਿੱਛੇ ਰਾਜਨੀਤੀ ਦਾ ਹਵਾਲਾ ਦੇਣ ਲਈ ਕਾਂਗਰਸ ਦੀ ਨਿੰਦਾ ਵੀ ਕੀਤੀ। ਸਾਬਕਾ ਕੇਂਦਰੀ ਮੰਤਰੀ ਅਨੁਰਾਗ ਠਾਕੁਰ ਨੇ ਮੰਗ ਕੀਤੀ ਕਿ ਕਾਂਗਰਸ ਸ਼ਾਸਿਤ ਰਾਜਾਂ ਵੱਲੋਂ ਅਖ਼ਬਾਰ, ਜੋ ਹਫਤਾਵਾਰੀ ਛਪਦਾ ਹੈ ਅਤੇ ਇੱਕ ਡਿਜੀਟਲ ਪਲੇਟਫਾਰਮ ਵੀ ਚਲਾਉਂਦਾ ਹੈ, ਵਿੱਚ ਇਸ਼ਤਿਹਾਰਾਂ ’ਤੇ ਖਰਚ ਕੀਤੇ ਗਏ ਪੈਸੇ ਦੇ ਵੇਰਵੇ ਜਨਤਕ ਕੀਤੇ ਜਾਣ।
ਭਾਜਪਾ ਆਗੂ ਨੇ ਦਾਅਵਾ ਕੀਤਾ ਕਿ ਕਾਂਗਰਸ ਨੇ ਅਖ਼ਬਾਰ ਨੂੰ ਆਪਣੇ ਏਟੀਐਮ ਵਜੋਂ ਵਰਤਿਆ। ਠਾਕੁਰ ਨੇ ਕਿਹਾ ਕਿ ਸੋਨੀਆ ਗਾਂਧੀ ਅਤੇ ਰਾਹੁਲ ਗਾਂਧੀ ਯੰਗ ਇੰਡੀਅਨ ਕੰਪਨੀ ਦੇ 76 ਫੀਸਦ ਦੇ ਮਾਲਕ ਸਨ, ਜਿਸ ਨੂੰ ਕਾਂਗਰਸ ਨੇ 50 ਲੱਖ ਰੁਪਏ ਦਾ ਕਰਜ਼ਾ ਦਿੱਤਾ ਸੀ। ਕੰਪਨੀ ਨੇ ਮਗਰੋਂ ਐਸੋਸੀਏਟਿਡ ਜਰਨਲਜ਼ ਲਿਮਟਿਡ ’ਤੇ ਕਬਜ਼ਾ ਕਰ ਲਿਆ, ਜਿਸ ਕੋਲ ਕਾਂਗਰਸ ਨਾਲ ਸਬੰਧਤ ਅਖ਼ਬਾਰ ਦੀ ਮਾਲਕੀ ਸੀ। ਅਖ਼ਬਾਰ ਵਿਰੋਧੀ ਪਾਰਟੀ ਨੂੰ 90 ਕਰੋੜ ਰੁਪਏ ਦਾ ਦੇਣਦਾਰ ਸੀ।
ਠਾਕੁਰ ਨੇ ਸਵਾਲ ਕੀਤਾ ਕਿ ਕੀ ਕੋਈ ਸਿਆਸੀ ਪਾਰਟੀ ਕਰਜ਼ਾ ਦੇ ਸਕਦੀ ਹੈ। ਠਾਕੁਰ ਨੇ ਕਿਹਾ, ‘‘ਇਹ ਭ੍ਰਿਸ਼ਟਾਚਾਰ ਦਾ ਕਾਂਗਰਸ ਮਾਡਲ ਹੈ। ਕਾਂਗਰਸ ਸ਼ਾਸਿਤ ਰਾਜਾਂ ਦੇ ਮੁੱਖ ਮੰਤਰੀ ਨੈਸ਼ਨਲ ਹੈਰਾਲਡ ਨੂੰ ਦਾਨ ਨਹੀਂ ਦਿੰਦੇ, ਸਗੋਂ ਇਸ਼ਤਿਹਾਰਾਂ ਰਾਹੀਂ ਇਸ ਨੂੰ ਪੈਸਾ ਦਿੰਦੇ ਹਨ। ਇਹ ਇਸ਼ਤਿਹਾਰ ਕਿਸ ਆਧਾਰ ’ਤੇ ਦਿੱਤੇ ਜਾ ਰਹੇ ਹਨ।’’ -ਪੀਟੀਆਈ
