ਸ਼ੋਰਟਸ ਪਾ ਕੇ ਆਏ ਐਕਸੀਅਨ ਨੂੰ ਕਲੱਬ ’ਚ ਦਾਖਲ ਹੋਣ ਤੋਂ ਰੋਕਿਆ; ਬਦਲਾਖੋਰੀ ’ਚ ਬਿਜਲੀ ਕੱਟਣ ’ਤੇ ਮੰਤਰੀ ਨੇ ਕੀਤਾ ਮੁਅੱਤਲ
ਸਰਬਜੀਤ ਸਿੰਘ ਭੱਟੀ
ਅੰਬਾਲਾ , 1 ਜੁਲਾਈ
ਅੰਬਾਲਾ ਛਾਉਣੀ ਦੇ ਇੱਕ ਮਸ਼ਹੂਲ ਕਲੱਬ ਨਾਲ ਬਦਲਾਖੋਰੀ ਦੌਰਾਨ ਵਿਭਾਗੀ ਅਹੁਦੇ ਦਾ ਫਾਇਦਾ ਉਠਾਉਣਾ ਬਿਜਲੀ ਵਿਭਾਗ ਦੇ ਐਕਸੀਐਨ ਨੂੰ ਮਹਿੰਗਾ ਪੈ ਗਿਆ। ਬਿਜਲੀ ਮੰਤਰੀ ਅਨਿਲ ਵਿੱਜ ਨੇ ਗੰਭੀਰ ਦੁਰਵਿਵਹਾਰ ਅਤੇ ਅਧਿਕਾਰਾਂ ਦੇ ਦੁਰ ਵਰਤੋਂ ਦੇ ਦੋਸਾਂ ਹੇਠ ਐਕਸੀਐਨ ਹਰੀਸ਼ ਗੋਇਲ ਨੂੰ ਤੁਰੰਤ ਪ੍ਰਭਾਵ ਨਾਲ ਮੁਅੱਤਲ ਕਰ ਦਿੱਤਾ ਹੈ।
ਪ੍ਰਾਪਤ ਜਾਣਕਾਰੀ ਅਨੁਸਾਰ 30 ਜੂਨ ਦੀ ਸ਼ਾਮ ਨੂੰ ਗੋਇਲ ਫੀਨਿਕਸ ਕਲੱਬ ਦੇ ਬਾਰ ’ਚ ਸ਼ੌਰਟਸ ਪਾ ਕੇ ਆਏ, ਪਰ ਕਲੱਬ ਦੇ ਨਿਯਮਾਂ ਅਨੁਸਾਰ ਅਜਿਹੀ ਪੋਸ਼ਾਕ ’ਚ ਦਾਖਲੇ ’ਤੇ ਮਨਾਹੀ ਹੈ। ਇਸ ਦੌਰਾਨ ਦੋ ਕਰਮਚਾਰੀਆਂ ਨੇ ਉਨ੍ਹਾਂ ਨੂੰ ਨਿਯਮ ਦੱਸੇ ਤੇ ਅੰਦਰ ਜਾਣ ਤੋਂ ਰੋਕ ਦਿੱਤਾ। ਪਰ ਗੋਇਲ ਨੇ ਇੱਥੇ ਗ਼ੁੱਸੇ ’ਚ ਆ ਕੇ ਗ਼ਲਤ ਵਿਹਾਰ ਕੀਤਾ ਤੇ ਨਿਯਮਾਂ ਦੀ ਉਲੰਘਣਾ ਕਰਨ ਲਈ ਸਟਾਫ ’ਤੇ ਹੀ ਨਰਾਜ਼ਗੀ ਜ਼ਾਹਰ ਕੀਤੀ। ਜਾਣਕਾਰੀ ਅਨੁਸਾਰ ਇੰਇਸ ਘਟਨਾ ਤੋਂ ਕੁਝ ਸਮੇਂ ਬਾਅਦ ਉਨ੍ਹਾਂ ਨੇ ਕਲੱਬ ਦੀ ਬਿਜਲੀ ਸਪਲਾਈ ਵੀ ਕੱਟ ਦਿੱਤੀ।
ਇਸ ਬਾਰੇ ਕਲੱਬ ਪ੍ਰਧਾਨ ਸ਼ੈਲੇਂਦਰ ਖੰਨਾ (ਸ਼ੈਲੀ) ਵੱਲੋਂ ਬਿਜਲੀ ਮੰਤਰੀ ਨੂੰ ਦਿੱਤੀ ਸ਼ਿਕਾਇਤ ’ਚ ਦੱਸਿਆ ਹੈ ਕਿ ਐਕਸੀਅਨ ਨੇ ਬਿਜਲੀ ਕੱਟਣ ਉਪਰੰਤ ਕਲੱਬ ਮੈਨੇਜਰ ਬਲਿੰਦਰ ਸਿੰਘ ਨੂੰ ਫ਼ੋਨ ’ਤੇ ਕਿਹਾ ‘‘ ਕੀ ਗੱਲ, ਤੁਹਾਡੀ ਲਾਈਟ ਚਲੀ ਗਈ ਅਤੇ ਜਨਰੇਟਰ ਚੱਲ ਰਿਹਾ, ਕਿਵੇਂ ਲੱਗ ਰਿਹੈ?’’
ਇਸ ’ਤੇ ਕਾਰਵਾਈ ਕਰਦਿਆਂ ਬਿਜਲੀ ਮੰਤਰੀ ਸ੍ਰੀ ਅਨਿੱਲ ਵਿੱਜ ਨੇ ਐਕਸੀਅਨ ਹਰੀਸ਼ ਗੋਇਲ ਨੂੰ ਤੁਰੰਤ ਪ੍ਰਭਾਵ ਨਾਲ ਮੁਅੱਤਲ ਕਰਦਿਆਂ ਜਵਾਬ ਤਲਬ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਇੱਕ ਲੋਕ ਸੇਵਕ ਵੱਲੋਂ ਅਜਿਹਾ ਵਿਹਾਰ ਬਰਦਾਸ਼ਤ ਨਹੀਂ ਕੀਤਾ ਜਾ ਸਕਦਾ।
