ਏਅਰ ਕੈਨੇਡਾ ਤੇ ਹੜਤਾਲੀ ਕਾਮਿਆਂ ’ਚ ਸਮਝੌਤਾ, ਅੱਜ ਸ਼ੁਰੂ ਹੋਣਗੀਆਂ ਉਡਾਣਾਂ

ਏਅਰਲਾਈਨ ਨੇ ਯਾਤਰੀਆਂ ਨੂੰ ਹੋਈ ਖੱਜਲ-ਖੁਆਰੀ ਲਈ ਮੁਆਫ਼ੀ ਮੰਗੀ

Gurmalkiat Singh Kahlon

ਵੈਨਕੂਵਰ, 09:15 PM Aug 19, 2025 IST

ਫਾਈਲ ਫੋਟੋ: ਰਾਇਟਰਜ਼

ਏਅਰ ਕੈਨੇਡਾ ਦਾ ਆਪਣੇ ਹੜਤਾਲੀ ਕਾਮਿਆਂ ਨਾਲ ਉਨ੍ਹਾਂ ਦੀਆਂ ਮੰਗਾਂ ਨੂੰ ਲੈ ਕੇ ਸਮਝੌਤਾ ਹੋ ਗਿਆ ਹੈ। ਏਅਰ ਲਾਈਨ ਨੇ ਕਿਹਾ ਹੈ ਕਿ ਉਹ ਅੱਜ ਤੋਂ ਤਰਤੀਬਵਾਰ ਆਪਣੀਆਂ ਉਡਾਣਾਂ ਸ਼ੁਰੂ ਕਰ ਦੇਵੇਗੀ ਤੇ ਰਾਤ ਤੱਕ ਸਾਰੀਆਂ ਉਡਾਣਾਂ ਆਪਣੀ ਸਮਾਂ ਸੂਚੀ ਅਨੁਸਾਰ ਚੱਲ ਪੈਣਗੀਆਂ। ਏਅਰ ਲਾਈਨ ਦੇ 10 ਹਜ਼ਾਰ ਤੋਂ ਵੱਧ ਹੜਤਾਲੀ ਕਾਮਿਆਂ ਦੀ ਯੂਨੀਅਨ ਨੇ ਕਿਹਾ ਕਿ ਲੰਘੀ ਰਾਤ ਸਰਕਾਰ ਵਲੋਂ ਨਿਯੁਕਤ ਕੀਤੇ ਸਾਲਸ ਦੀ ਹਾਜ਼ਰੀ ਵਿੱਚ 9 ਘੰਟੇ ਚੱਲੀ ਗੱਲਬਾਤ ਦੌਰਾਨ ਇਸ ਗੱਲ ’ਤੇ ਸਹਿਮਤੀ ਪ੍ਰਗਟਾਈ ਗਈ ਕਿ ਕੈਬਿਨ ਅਮਲੇ ਵਲੋਂ ਉਡਾਣਾਂ ਤੋਂ ਪਹਿਲਾਂ ਹਵਾਈ ਅੱਡੇ ਉੱਤੇ ਦਿੱਤੀਆਂ ਜਾਂਦੀਆਂ ਸੇਵਾਵਾਂ ਦੇ ਸਮੇਂ ਨੂੰ ਡਿਊਟੀ ਮੰਨਿਆ ਜਾਏਗਾ ਤੇ ਹੁਣ ਬਿਨਾਂ ਤਨਖਾਹ ਕੰਮ ਬੰਦ ਹੋ ਜਾਣਗੇ। ਹੋਰ ਮੰਗਾਂ ਦੇ ਸਬੰਧ ਵਿੱਚ ਗੱਲਬਾਤ ਚਲਦੀ ਰਹੇਗੀ। ਯੂਨੀਅਨ ਨੇ ਕਾਮਿਆਂ ਨੂੰ ਕਿਹਾ ਕਿ ਉਹ ਤਨਦੇਹੀ ਨਾਲ ਕੰਮ ’ਤੇ ਪਰਤ ਆਉਣ।ਏਅਰ ਕੈਨੇਡਾ ਦੇ ਸੀਈਓ ਮਾਈਕਲ ਰੌਸਿਊ ਨੇ ਸਮਝੌਤੇ ਦੀ ਪੁਸ਼ਟੀ ਕਰਦੇ ਹੋਏ ਆਪਣੇ ਯਾਤਰੀਆਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਠਰੰਮੇ ਵਿੱਚ ਰਹਿਣ, ਕਿਉਂਕਿ ਸੇਵਾਵਾਂ ਨੂੰ ਆਮ ਹਾਲਤ ਵਿੱਚ ਲਿਆਉਣ ਲਈ ਕੁਝ ਦਿਨ ਲੱਗ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਕੰਪਨੀ ਬਿਹਤਰ ਸੇਵਾਵਾਂ ਦੇਣ ਲਈ ਵਚਨਬੱਧ ਹੈ, ਪਰ ਹੜਤਾਲ ਕਾਰਨ ਪਈ ਰੁਕਾਵਟ ਨੇ ਕੁਝ ਖਲਾਅ ਪੈਦਾ ਕੀਤੇ ਹਨ, ਜਿਨ੍ਹਾਂ ਨੂੰ ਭਰਦਿਆਂ ਕੁਝ ਸਮਾਂ ਲੱਗ ਸਕਦਾ ਹੈ। ਉਨ੍ਹਾਂ ਹੜਤਾਲ ਕਾਰਨ ਯਾਤਰੀਆਂ ਨੂੰ ਦਰਪੇਸ਼ ਮੁਸ਼ਕਲਾਂ ਲਈ ਮੁਆਫੀ ਮੰਗੀ ਤੇ ਅੱਗੇ ਤੋਂ ਬਿਹਤਰ ਸੇਵਾਵਾਂ ਪ੍ਰਦਾਨ ਕਰਦੇ ਰਹਿਣ ਦਾ ਭਰੋਸਾ ਦਿਵਾਇਆ। ਸ਼ਨਿੱਚਰਵਾਰ ਰਾਤ ਨੂੰ ਸ਼ੁਰੂ ਹੋਈ ਹੜਤਾਲ ਕਾਰਨ ਏਅਰ ਕੈਨੇਡਾ ਦੀ ਬੁਕਿੰਗ ਕਰਵਾ ਚੁੱਕੇ ਲੱਖਾਂ ਯਾਤਰੀਆਂ ਨੂੰ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਸੀ। ਸਰਕਾਰ ਵੱਲੋਂ ਕਾਮਿਆਂ ਦੀ ਹੜਤਾਲ ਨੂੰ ਗੈਰਕਾਨੂੰਨੀ ਐਲਾਨਣ ਦੇ ਬਾਵਜੂਦ ਵੀ ਕਾਮਿਆਂ ਦੀ ਯੂਨੀਅਨ ਆਪਣੀਆਂ ਮੰਗਾਂ ’ਤੇ ਅੜੀ ਰਹੀ।

Tags :

Air Canada Strike