1971 victory: 16 ਦਸੰਬਰ 1971 ਬੰਗਲਾਦੇਸ਼ ਦਾ ਵਿਜੈ ਦਿਵਸ, ਭਾਰਤ ਜਿੱਤ ’ਚ ਮਹਿਜ਼ ਭਾਈਵਾਲ, ਇਸ ਤੋਂ ਵੱਧ ਕੁਝ ਨਹੀਂ

ਢਾਕਾ, 17 ਦਸੰਬਰ

ਬੰਗਲਾਦੇਸ਼ ਦੀ ਅੰਤਰਿਮ ਸਰਕਾਰ ਵਿਚ ਕਾਨੂੰਨ ਮੰਤਰੀ ਆਸਿਫ਼ ਨਜ਼ਰੁਲ ਨੇ ਐਕਸ ਉੱਤੇ ਵਿਜੈ ਦਿਵਸ ਨੂੰ ਲੈ ਕੇ ਪਾਈ ਪੋਸਟ ਲਈ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਨੁਕਤਾਚੀਨੀ ਕੀਤੀ ਹੈ। ਨਜ਼ਰੁਲ ਨੇ ਕਿਹਾ, ‘‘ਭਾਰਤ ਇਸ ਜਿੱਤ ਵਿਚ ਮਹਿਜ਼ ਭਾਈਵਾਲ ਸੀ, ਇਸ ਤੋਂ ਵੱਧ ਕੁਝ ਨਹੀਂ।’’ 1971 ਵਿਚ ਬੰਗਲਾਦੇਸ਼ ਦੀ ਆਜ਼ਾਦੀ ਲਈ ਲੜੀ ਜੰਗ ਮੌਕੇ ਪਾਕਿਸਤਾਨੀ ਫੌਜ ਨੂੰ ਭਾਰਤੀ ਫੌਜ ਅੱਗੇ ਹਥਿਆਰ ਸੁੱਟਣ ਲਈ ਮਜਬੂਰ ਹੋਣਾ ਪਿਆ ਸੀ ਤੇ ਇਸ ਦਿਨ (16 ਦਸੰਬਰ) ਨੂੰ ‘ਵਿਜੈ ਦਿਵਸ ਵਜੋਂ ਮਨਾਇਆ ਜਾਂਦਾ ਹੈ।

ਬੰਗਲਾਦੇਸ਼ ਦੀ ਅੰਤਰਿਮ ਸਰਕਾਰ ਦੇ ਮੁਖੀ ਮੁਹੰਮਦ ਯੂਨਸ ਦੇ ਦਫ਼ਤਰ ਨੇ ਨਜ਼ੁਰਲ ਦੀ ਇਨ੍ਹਾਂ ਟਿੱਪਣੀਆਂ ਨੂੰ ਰੀਪੋਸਟ ਕੀਤਾ ਹੈ। ਸ੍ਰੀ ਮੋਦੀ ਦੀ ਪੋਸਟ, ਜਿਸ ਵਿਚ 1971 ਦੀ ਇਤਿਹਾਸਕ ਜਿੱਤ ਵਿਚ ਪਾਏ ਯੋਗਦਾਨ ਲਈ ਭਾਰਤੀ ਫੌਜੀਆਂ ਨੂੰ ਸ਼ਰਧਾਂਜਲੀ ਭੇਟ ਕੀਤੀ ਗਈ ਸੀ, ਦਾ ਸਕਰੀਨਸ਼ਾਟ ਨੱਥੀ ਕਰਦਿਆਂ ਨਜ਼ਰੁਲ ਨੇ ਸੋਮਵਾਰ ਨੂੰ ਫੇਸਬੁੱਕ ’ਤੇ ਬੰਗਾਲੀ ਵਿਚ ਲਿਖਿਆ, ‘‘ਮੈਂ ਜ਼ੋਰਦਾਰ ਢੰਗ ਨਾਲ ਵਿਰੋਧ ਕਰਦਾ ਹਾਂ। 16 ਦਸੰਬਰ 1971 ਬੰਗਲਾਦੇਸ਼ ਦਾ ਵਿਜੈ ਦਿਵਸ ਹੈ। ਭਾਰਤ ਇਸ ਜਿੱਤ ਵਿਚ ਮਹਿਜ਼ ਇਕ ਭਾਈਵਾਲ ਸੀ, ਇਸ ਤੋਂ ਵੱਧ ਕੁਝ ਨਹੀਂ।’’ ਐਂਟੀ-ਡਿਸਕ੍ਰਿਮੀਨੇਸ਼ਨ ਸਟੂਡੈਂਟ ਮੂਵਮੈਂਟ ਦੇ ਕਨਵੀਨਰ ਹਸਨਾਤ ਅਬਦੁੱਲਾ ਨੇ ਵੀ ਮੋਦੀ ਦੀ ਪੋਸਟ ਦੀ ਆਲੋਚਨਾ ਕੀਤੀ ਹੈ। -ਪੀਟੀਆਈ