ਯੂ ਐੱਸ ਓਪਨ: ਅਲਕਰਾਜ਼ ਤੇ ਸਿਨਰ ਵਿਚਾਲੇ ਹੋਵੇਗਾ ਫਾਈਨਲ

ਦੁਨੀਆ ਦੇ ਨੰਬਰ ਇੱਕ ਟੈਨਿਸ ਖਿਡਾਰੀ ਜਾਨਿਕ ਸਿਨਰ ਅਤੇ ਨੰਬਰ ਦੋ ਖਿਡਾਰੀ ਕਾਰਲੋਸ ਅਲਕਰਾਜ਼ ਨੇ ਆਪੋ-ਆਪਣੀ ਜਿੱਤ ਦਾ ਸਿਲਸਿਲਾ ਜਾਰੀ ਰੱਖਦਿਆਂ ਯੂ ਐੱਸ ਓਪਨ ਟੈਨਿਸ ਟੂਰਨਾਮੈਂਟ ਦੇ ਪੁਰਸ਼ ਸਿੰਗਲਜ਼ ਵਰਗ ਦੇ ਫਾਈਨਲ ’ਚ ਜਗ੍ਹਾ ਬਣਾ ਲਈ ਹੈ। ਦੁਨੀਆ ਦੇ ਇਹ ਸਿਖਰਲੇ ਦੋ ਖਿਡਾਰੀ ਇਸ ਸਾਲ ਲਗਾਤਾਰ ਤੀਜੀ ਵਾਰ ਕਿਸੇ ਗਰੈਂਡਸਲੈਮ ਟੂਰਨਾਮੈਂਟ ਦੇ ਖਿਤਾਬੀ ਮੈਚ ਵਿੱਚ ਇੱਕ-ਦੂਜੇ ਦਾ ਸਾਹਮਣਾ ਕਰਨਗੇ। ਅਲਕਰਾਜ਼ ਨੇ ਪਹਿਲੇ ਸੈਮੀਫਾਈਨਲ ਵਿੱਚ 24 ਵਾਰ ਦੇ ਗਰੈਂਡਸਲੈਮ ਚੈਂਪੀਅਨ ਨੋਵਾਕ ਜੋਕੋਵਿਚ ਨੂੰ 6-4, 7-6 (4), 6-2 ਨਾਲ ਹਰਾਇਆ। ਕੁਝ ਸਮਾਂ ਬਾਅਦ ਹੀ ਸਿਨਰ ਨੇ ਔਗਰ-ਅਲਿਆਸਿਮੇ ਨੂੰ 6-1, 3-6, 6-3, 6-4 ਨਾਲ ਹਰਾ ਦਿੱਤਾ। ਜੋਕੋਵਿਚ ਨੇ ਮੈਚ ਤੋਂ ਬਾਅਦ ਮੰਨਿਆ ਕਿ ਇਹ ਦੋਵੇਂ ਖਿਡਾਰੀ ਇਸ ਸਮੇਂ ਦੁਨੀਆ ਦੇ ਸਭ ਤੋਂ ਵਧੀਆ ਖਿਡਾਰੀ ਹਨ। ਉਸ ਨੇ ਕਿਹਾ, ‘ਇਹ ਦੋਵੇਂ ਇਸ ਵੇਲੇ ਦੁਨੀਆ ਦੇ ਸਰਬੋਤਮ ਖਿਡਾਰੀ ਹਨ। ਅਲਕਰਾਜ਼ ਨੇ ਹੁਣ ਤੱਕ ਪੰਜ ਗਰੈਂਡਸਲੈਮ ਖਿਤਾਬ ਜਿੱਤੇ ਹਨ ਅਤੇ ਸਿਨਰ ਚਾਰ ਵਿੱਚ ਜਿੱਤ ਦਰਜ ਕਰ ਚੁੱਕਾ ਹੈ। ਨੰਬਰ ਇੱਕ ਰੈਂਕਿੰਗ ਦਾ ਫੈਸਲਾ ਵੀ ਇਸ ਮੈਚ ਰਾਹੀਂ ਹੀ ਹੋਵੇਗਾ। ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਵੀ ਇਸ ਮੈਚ ਨੂੰ ਦੇਖਣ ਲਈ ਆ ਸਕਦੇ ਹਨ।

25ਵਾਂ ਗਰੈਂਡਸਲੈਮ ਖਿਤਾਬ ਜਿੱਤਣ ਦੀ ਦੌੜ ਜਾਰੀ ਰਹੇਗੀ: ਜੋਕੋਵਿਚ

ਨਿਊਯਾਰਕ: ਟੈਨਿਸ ਖਿਡਾਰੀ ਨੋਵਾਕ ਜੋਕੋਵਿਚ ਨੇ ਯੂ ਐੱਸ ਓਪਨ ਦੇ ਸੈਮੀਫਾਈਨਲ ਵਿੱਚ ਹਾਰ ਦਾ ਸਾਹਮਣਾ ਕਰਨ ਤੋਂ ਬਾਅਦ ਕਿਹਾ ਕਿ ਉਹ ਆਪਣਾ 25ਵਾਂ ਗਰੈਂਡਸਲੈਮ ਖਿਤਾਬ ਜਿੱਤਣ ਦੀ ਕੋਸਿਸ਼ ਜਾਰੀ ਰੱਖੇਗਾ। ਉਸ ਨੇ ਮੈਚ ਤੋਂ ਬਾਅਦ ਕਿਹਾ, ‘ਮੈਂ ਹਾਲੇ ਪਿੱਛੇ ਨਹੀਂ ਹਟਣ ਵਾਲਾ। ਮੈਂ ਗਰੈਂਡਸਲੈਮ ਟੂਰਨਾਮੈਂਟ ਜਿੱਤਣ ਲਈ ਆਪਣੀਆਂ ਕੋਸ਼ਿਸ਼ਾਂ ਜਾਰੀ ਰੱਖਾਂਗਾ। ਮੈਂ ਘੱਟੋ-ਘੱਟ ਇੱਕ ਹੋਰ ਟਰਾਫੀ ਜਿੱਤਣ ਲਈ ਆਪਣੀ ਲੜਾਈ ਜਾਰੀ ਰੱਖਾਂਗਾ।’ ਸਰਬੀਆ ਦੇ 38 ਸਾਲਾ ਖਿਡਾਰੀ ਜੋਕੋਵਿਚ ਨੇ ਇਸ ਸੀਜ਼ਨ ਵਿੱਚ ਚਾਰੋਂ ਗਰੈਂਡਸਲੈਮ ਦੇ ਸੈਮੀਫਾਈਨਲ ਵਿੱਚ ਜਗ੍ਹਾ ਬਣਾਈ, ਪਰ ਹਰ ਵਾਰ ਇਸ ਤੋਂ ਅੱਗੇ ਵਧਣ ਵਿੱਚ ਨਾਕਾਮ ਰਿਹਾ। -ਏਪੀ