ਟੈਨਿਸ: ਅਮਰੀਕੀ ਓਪਨ ’ਚ ਕਿਸਮਤ ਅਜ਼ਮਾਉਣਗੇ 10 ਸਾਬਕਾ ਚੈਂਪੀਅਨ
ਪਿਛਲੇ ਚੈਂਪੀਅਨ ਯਾਨਿਕ ਸਿਨਰ ਅਤੇ ਐਰਿਨਾ ਸਬਾਲੈਂਕਾ ਉਨ੍ਹਾਂ 10 ਸਾਬਕਾ ਅਮਰੀਕੀ ਓਪਨ ਜੇਤੂਆਂ ਵਿੱਚ ਸ਼ਾਮਲ ਹਨ ਜੋ ਅਗਲੇ ਮਹੀਨੇ ਹੋਣ ਵਾਲੇ ਸਾਲ ਦੇ ਇਸ ਆਖ਼ਰੀ ਗਰੈਂਡਸਲੇਮ ਟੂਰਨਾਮੈਂਟ ਵਿੱਚ ਆਪਣੀ ਕਿਸਮਤ ਅਜਮਾਉਣਗੇ।
ਅਮਰੀਕੀ ਟੈਨਿਸ ਐਸੋਸੀਏਸ਼ਨ ਨੇ 24 ਅਗਸਤ ਤੋਂ ਸ਼ੁਰੂ ਹੋਣ ਵਾਲੇ ਇਸ ਟੂਰਨਾਮੈਂਟ ਵਿੱਚ ਸ਼ਾਮਲ ਹੋਣ ਵਾਲੇ ਖਿਡਾਰੀਆਂ ਦੀ ਪ੍ਰਵੇਸ਼ ਸੂਚੀ ਜਾਰੀ ਕੀਤੀ ਹੈ, ਜਿਸ ਵਿੱਚ 18 ਸਾਬਕਾ ਗਰੈਂਡਸਲੇਮ ਸਿੰਗਲਜ਼ ਚੈਂਪੀਅਨ ਸ਼ਾਮਲ ਹਨ। ਅਮਰੀਕੀ ਓਪਨ ਵਿੱਚ ਸਿੱਧਾ ਪ੍ਰਵੇਸ਼ 14 ਜੁਲਾਈ ਤੱਕ ਦੀ ਰੈਂਕਿੰਗ ’ਤੇ ਆਧਾਰਿਤ ਸੀ। ਪੁਰਸ਼ਾਂ ਲਈ ਕੱਟਆਫ਼ 101 ਅਤੇ ਔਰਤਾਂ ਲਈ 99 ਨੰਬਰ ਸੀ।
ਵਿਸ਼ਵ ਦੇ ਨੰਬਰ ਇਕ ਖਿਡਾਰੀ ਸਿਨਰ ਨੇ ਹਾਲ ਵਿੱਚ ਵਿੰਬਲਡਨ ਫਾਈਨਲ ਵਿੱਚ ਦੁਨੀਆ ਦੇ ਦੂਜੇ ਨੰਬਰ ਦੇ ਖਿਡਾਰੀ ਕਾਰਲੋਸ ਅਲਕਰਾਜ਼ ਨੂੰ ਹਰਾ ਕੇ ਆਪਣਾ ਚੌਥਾ ਗਰੈਂਡਸਲੇਮ ਖ਼ਿਤਾਬ ਜਿੱਤਿਆ ਸੀ। ਦੁਨੀਆ ਦੀ ਨੰਬਰ ਇਕ ਖਿਡਾਰਨ ਸਬਾਲੈਂਕਾ ਵਿੰਬਲਡਨ ਦੇ ਸੈਮੀ ਫਾਈਨਲ ਵਿੱਚ ਅਮਾਂਡਾ ਅਨਿਸਿਮੋਵਾ ਤੋਂ ਹਾਰ ਗਈ, ਜੋ ਕਿ ਸੰਤਵੇਂ ਨੰਬਰ ’ਤੇ ਹੈ ਅਤੇ ਸਿਖ਼ਰਲੇ ਅੱਠ ਵਿੱਚ ਸ਼ਾਮਲ ਚਾਰ ਅਮਰੀਕੀ ਖਿਡਾਰਨਾਂ ’ਚੋਂ ਇਕ ਹੈ। ਅਮਰੀਕਾ ਦੇ ਸਭ ਤੋਂ ਵੱਧ 30 ਖਿਡਾਰੀਆਂ (16 ਮਹਿਲਾ ਤੇ 14 ਪੁਰਸ਼) ਨੂੰ ਸਿੱਧੇ ਦਾਖ਼ਲਾ ਮਿਲਿਆ ਹੈ। -ਏਪੀ
