ਸਈਦ ਮੁਸ਼ਤਾਕ ਅਲੀ ਟਰਾਫੀ: ਅਭਿਸ਼ੇਕ ਸ਼ਰਮਾ ਨੇ ਤੀਜਾ ਸਭ ਤੋਂ ਤੇਜ਼ ਟੀ-20 ਅਰਧ ਸੈਂਕੜਾ ਜੜਿਆ
ਅਭਿਸ਼ੇਕ ਸ਼ਰਮਾ ਨੇ ਐਤਵਾਰ ਨੂੰ ਸਾਂਝੇ ਤੌਰ ’ਤੇ ਤੀਜਾ ਸਭ ਤੋਂ ਤੇਜ਼ ਅਰਧ ਸੈਂਕੜਾ ਜੜਿਆ ਹੈ। ਸਈਦ ਮੁਸ਼ਤਾਕ ਅਲੀ ਟਰਾਫੀ ਵਿੱਚ ਬੰਗਾਲ ਦੇ ਖ਼ਿਲਾਫ਼ ਪੰਜਾਬ ਦੇ ਮੈਚ ਵਿੱਚ ਅਜੇਤੂ 148 ਦੌੜਾਂ ਬਣਾ ਕੇ ਇੱਕ ਟੀ-20 ਪਾਰੀ ਵਿੱਚ ਕਿਸੇ ਭਾਰਤੀ ਦੁਆਰਾ...
ਅਭਿਸ਼ੇਕ ਸ਼ਰਮਾ ਨੇ ਐਤਵਾਰ ਨੂੰ ਸਾਂਝੇ ਤੌਰ ’ਤੇ ਤੀਜਾ ਸਭ ਤੋਂ ਤੇਜ਼ ਅਰਧ ਸੈਂਕੜਾ ਜੜਿਆ ਹੈ। ਸਈਦ ਮੁਸ਼ਤਾਕ ਅਲੀ ਟਰਾਫੀ ਵਿੱਚ ਬੰਗਾਲ ਦੇ ਖ਼ਿਲਾਫ਼ ਪੰਜਾਬ ਦੇ ਮੈਚ ਵਿੱਚ ਅਜੇਤੂ 148 ਦੌੜਾਂ ਬਣਾ ਕੇ ਇੱਕ ਟੀ-20 ਪਾਰੀ ਵਿੱਚ ਕਿਸੇ ਭਾਰਤੀ ਦੁਆਰਾ ਸਭ ਤੋਂ ਵੱਧ ਛੱਕਿਆਂ ਦਾ ਆਪਣਾ ਹੀ ਰਿਕਾਰਡ ਤੋੜ ਦਿੱਤਾ। ਇਹ ਮੈਚ ਇੱਥੇ ਖੇਡਿਆ ਗਿਆ।
ਉਸਦਾ ਅਰਧ ਸੈਂਕੜਾ, ਜੋ ਸਿਰਫ਼ 12 ਗੇਂਦਾਂ ਵਿੱਚ ਲਗਾਇਆ ਗਿਆ, ਕਿਸੇ ਭਾਰਤੀ ਵੱਲੋਂ ਸਾਂਝੇ ਤੌਰ 'ਤੇ ਦੂਜਾ ਸਭ ਤੋਂ ਤੇਜ਼ ਅਰਧ ਸੈਂਕੜਾ ਵੀ ਹੈ।
ਵਿਸ਼ਵ ਦੇ ਨੰਬਰ 1 ਟੀ-20 ਬੱਲੇਬਾਜ਼ ਨੇ ਕੁੱਲ 16 ਛੱਕੇ ਅਤੇ ਅੱਠ ਚੌਕੇ ਜੜੇ, ਜਿਸ ਨਾਲ ਉਸ ਨੇ ਓਪਨਰ ਪ੍ਰਭਸਿਮਰਨ ਸਿੰਘ ਨਾਲ 13 ਓਵਰਾਂ ਦੇ ਅੰਦਰ 205 ਦੌੜਾਂ ਦੀ ਵੱਡੀ ਸਾਂਝੇਦਾਰੀ ਕਰਕੇ ਆਪਣੀ ਟੀਮ ਲਈ ਇੱਕ ਮਜ਼ਬੂਤ ਨੀਂਹ ਰੱਖੀ। ਉਸ ਦੀ ਇੱਕ ਪਾਰੀ ਵਿੱਚ 16 ਛੱਕੇ ਹੁਣ ਅਫਗਾਨਿਸਤਾਨ ਦੇ ਹਜ਼ਰਤੁੱਲਾ ਜ਼ਜ਼ਾਈ ਅਤੇ ਨਿਊਜ਼ੀਲੈਂਡ ਦੇ ਫਿਨ ਐਲਨ ਦੇ ਨਾਲ ਸਾਂਝੇ ਤੌਰ 'ਤੇ ਤੀਜੇ ਸਭ ਤੋਂ ਵੱਧ ਛੱਕੇ ਹਨ।
ਐਸਟੋਨੀਆ ਦੇ ਭਾਰਤੀ ਮੂਲ ਦੇ ਸਾਹਿਲ ਚੌਹਾਨ ਦੇ ਨਾਂ ਇੱਕ ਟੀ-20 ਪਾਰੀ ਵਿੱਚ ਸਭ ਤੋਂ ਵੱਧ ਛੱਕੇ (18) ਲਗਾਉਣ ਦਾ ਰਿਕਾਰਡ ਹੈ, ਜੋ ਉਸਨੇ ਜੂਨ 2024 ਵਿੱਚ ਸਾਈਪ੍ਰਸ ਦੇ ਖ਼ਿਲਾਫ਼ ਮਾਰਿਆ ਸੀ।
ਅਭਿਸ਼ੇਕ ਨੇ ਇੱਥੇ ਜਿਮਖਾਨਾ ਗਰਾਊਂਡ ਵਿਖੇ ਖੇਡੇ ਗਏ ਐਲੀਟ ਗਰੁੱਪ ਸੀ ਦੇ ਮੁਕਾਬਲੇ ਦੌਰਾਨ ਆਪਣੇ ਸਲਾਹਕਾਰ ਅਤੇ ਸਾਬਕਾ ਭਾਰਤੀ ਆਲਰਾਊਂਡਰ ਯੁਵਰਾਜ ਸਿੰਘ ਦੇ ਰਿਕਾਰਡ ਦੀ ਬਰਾਬਰੀ ਕਰਦਿਆਂ 12 ਗੇਂਦਾਂ ਵਿੱਚ ਅਰਧ ਸੈਂਕੜਾ ਬਣਾਇਆ।
ਪੁਰਸ਼ਾਂ ਦੇ ਟੀ-20 ਵਿੱਚ ਕਿਸੇ ਵੀ ਭਾਰਤੀ ਲਈ ਸਭ ਤੋਂ ਤੇਜ਼ ਅਰਧ ਸੈਂਕੜੇ ਦਾ ਰਿਕਾਰਡ ਆਸ਼ੂਤੋਸ਼ ਸ਼ਰਮਾ ਦੇ ਨਾਂ ਹੈ, ਜਿਸ ਨੇ 2023-24 ਵਿੱਚ ਸਈਦ ਮੁਸ਼ਤਾਕ ਅਲੀ ਟੀ-20 ਟਰਾਫੀ ਮੈਚ ਵਿੱਚ ਹਿਮਾਚਲ ਪ੍ਰਦੇਸ਼ ਦੇ ਖ਼ਿਲਾਫ਼ ਰੇਲਵੇਜ਼ ਲਈ 11 ਗੇਂਦਾਂ ਵਿੱਚ ਇਹ ਰਿਕਾਰਡ ਬਣਾਇਆ ਸੀ।
ਇਸ ਤਰ੍ਹਾਂ ਅਭਿਸ਼ੇਕ ਪੁਰਸ਼ਾਂ ਦੇ ਟੀ-20 ਵਿੱਚ 12 ਗੇਂਦਾਂ ਵਿੱਚ ਅਰਧ ਸੈਂਕੜਾ ਬਣਾਉਣ ਵਾਲੇ ਯੁਵਰਾਜ, ਵੈਸਟਇੰਡੀਜ਼ ਦੇ ਮਹਾਨ ਕ੍ਰਿਸ ਗੇਲ, ਜ਼ਜ਼ਾਈ ਅਤੇ ਚੌਹਾਨ ਦੇ ਨਾਲ ਸ਼ਾਮਲ ਹੋ ਗਿਆ ਹੈ।
ਟੀ-20 ਵਿੱਚ ਸਭ ਤੋਂ ਤੇਜ਼ ਅਰਧ ਸੈਂਕੜੇ ਦਾ ਰਿਕਾਰਡ ਨੇਪਾਲ ਦੇ ਦੀਪੇਂਦਰ ਸਿੰਘ ਐਰੀ ਦੇ ਨਾਂ ਹੈ, ਜਿਸ ਨੇ 2023 ਵਿੱਚ ਹਾਂਗਜ਼ੂ ਏਸ਼ੀਆਈ ਖੇਡਾਂ ਵਿੱਚ ਮੰਗੋਲੀਆ ਦੇ ਖ਼ਿਲਾਫ਼ ਸਿਰਫ਼ ਨੌਂ ਗੇਂਦਾਂ ਵਿੱਚ ਆਪਣਾ ਅਰਧ ਸੈਂਕੜਾ ਪੂਰਾ ਕੀਤਾ ਸੀ।

