ਈਡਨ ਗਾਰਡਨਜ਼ ਦੀ ਪਿੱਚ ਨੇ ‘ਟੈਸਟ ਕ੍ਰਿਕਟ ਦਾ ਮਖੌਲ ਬਣਾਇਆ’: ਹਰਭਜਨ

ਭਾਰਤ ਦੇ ਸਾਬਕਾ ਆਫ ਸਪਿੰਨਰ ਹਰਭਜਨ ਸਿੰਘ ਨੇ ਦੱਖਣੀ ਅਫਰੀਕਾ ਖਿਲਾਫ਼ ਪਹਿਲੇ ਟੈਸਟ ਮੈਚ ਲਈ ਵਰਤੀ ਜਾ ਰਹੀ ਈਡਨ ਗਾਰਡਨਜ਼ ਦੀ ਪਿੱਚ ਦੀ ਤਿੱਖੀ ਨੁਕਤਾਚੀਨੀ ਕੀਤੀ ਹੈ। ਉਨ੍ਹਾਂ ਇਸ ਨੂੰ ‘ਟੈਸਟ ਕ੍ਰਿਕਟ ਦਾ ਪੂਰੀ ਤਰ੍ਹਾਂ ਮਖੌਲ’ ਦੱਸਦਿਆਂ ਸੋਸ਼ਲ ਮੀਡੀਆ ’ਤੇ ਇਕ ਪੋਸਟ ਵਿਚ ਐਲਾਨ ਕੀਤਾ ਕਿ ਟੈਸਟ ਕ੍ਰਿਕਟ ਦਾ ਭੋਗ (#RIPTESTCRICKET) ਪੈ ਗਿਆ ਹੈ। ਹਰਭਜਨ ਨੇ ਕਿਹਾ, ‘‘ਇਸ ਪਿੱਚ 'ਤੇ ਵਿਰਾਟ ਕੋਹਲੀ ਜਾਂ ਸਚਿਨ ਤੇਂਦੁਲਕਰ ਵੀ ਨਹੀਂ ਟਿਕ ਸਕਦੇ।’’

Test cricket india vs South Africa the game almost over on 2nd day isn’t finished yet . What a mockery of test cricket #RIPTESTCRICKET

— Harbhajan Turbanator (@harbhajan_singh) November 15, 2025

ਕਾਬਿਲੇਗੌਰ ਹੈ ਕਿ ਕੋਲਕਾਤਾ ਵਿਚ ਖੇਡੇ ਜਾ ਰਹੇ ਟੈਸਟ ਮੈਚ ਦੇ ਦੂਜੇ ਦਿਨ ਇਕ ਸੈਸ਼ਨ ਵਿਚ 17 ਵਿਕਟ ਡਿੱਗੇ ਸਨ। ਸਾਬਕਾ ਫਿਰਕੀ ਗੇਂਦਬਾਜ਼ ਨੇ ਕਿਹਾ, ‘‘ਇਹ ਕ੍ਰਿਕਟ ਨਹੀਂ ਹੈ। ਇਹ ਸ਼ਰਮ ਦੀ ਗੱਲ ਹੈ। ਮੈਚ ਦੂਜੇ ਦਿਨ ਲਗਪਗ ਖਤਮ ਹੋ ਗਿਆ ਹੈ: ਲੜਾਈ ਕਿੱਥੇ ਹੈ? ਸੰਤੁਲਨ ਕਿੱਥੇ ਹੈ?’’ ਦੋ ਦਿਨਾਂ ਵਿਚ ਕੁਲ ਮਿਲਾ ਕੇ 33 ਵਿਕਟਾਂ ਡਿੱਗੀਆਂ, ਜਿਨ੍ਹਾਂ ਵਿੱਚੋਂ 28 ਵਿਕਟਾਂ ਸਪਿੰਨਰਾਂ ਨੇ ਲਈਆਂ ਹਨ।

Awful pitch in Kolkata … #INDvSA

— Michael Vaughan (@MichaelVaughan) November 15, 2025

ਇੰਗਲੈਂਡ ਦੇ ਸਾਬਕਾ ਕਪਤਾਨ ਮਾਈਕਲ ਵੌਨ ਨੇ ਹਰਭਜਨ ਦੇ ਗੁੱਸੇ ਨੂੰ ਦੁਹਰਾਉਂਦੇ ਹੋਏ ਟਵੀਟ ਕੀਤਾ: ‘ਕੋਲਕਾਤਾ ਦੀ ਪਿੱਚ ਬਹੁਤ ਹੀ ਖਰਾਬ ਹੈ। ਪੂਰੀ ਤਰ੍ਹਾਂ ਨਾਲ ਤਬਾਹੀ। ਇਹ ਟੈਸਟ ਕ੍ਰਿਕਟ ਨਹੀਂ ਹੈ: ਇਹ ਇੱਕ ਲਾਟਰੀ ਹੈ।’’ ਵੌਨ ਨੇ ਕਿਹਾ ਕਿ ਅਜਿਹੇ ਟਰੈਕ ‘ਮੁਕਾਬਲੇ ਨੂੰ ਖਤਮ ਕਰ ਦਿੰਦੇ ਹਨ’ ਅਤੇ ਪੰਜ ਦਿਨਾਂ ਦੇ ਕ੍ਰਿਕਟ ਦਾ ਮਜ਼ਾਕ ਉਡਾਉਂਦੇ ਹਨ।

ਭਾਰਤ ਦੇ ਸਾਬਕਾ ਹਰਫ਼ਨਮੌਲਾ ਖਿਡਾਰੀ ਇਰਫਾਨ ਪਠਾਨ, ਨੇ ਐਕਸ ’ਤੇ ਇਕ ਪੋਸਟ ਵਿਚ ਕਿਹਾ, ‘‘ਈਡਨ ਦੀ ਪਿੱਚ ਖੇਡਣ ਯੋਗ ਨਹੀਂ ਹੈ। ਉਛਾਲ ਇਕਸਾਰ ਨਹੀਂ ਹੈ। ਬੱਲੇਬਾਜ਼ ਸ਼ਾਟ ਨਹੀਂ ਖੇਡ ਰਹੇ ਉਹ ਆਊਟ ਹੋਣ ਤੋਂ ਬਚਣ ਦੀ ਕੋਸ਼ਿ਼ਸ਼ ਕਰ ਰਹੇ ਹਨ।’’ ਦਿਨੇਸ਼ ਕਾਰਤਿਕ ਨੇ ਕਿਹਾ, ‘‘ਮੈਚ ਤੋਂ ਇੱਕ ਰਾਤ ਪਹਿਲਾਂ ਪਿੱਚ ਨੂੰ ਪਾਣੀ ਨਹੀਂ ਦਿੱਤਾ ਗਿਆ ਸੀ। ਇਸੇ ਕਰਕੇ ਇਹ ਇੰਨੀ ਜਲਦੀ ਟੁੱਟ ਗਈ।’’

ਦੱਖਣੀ ਅਫਰੀਕਾ ਦੇ ਸਾਬਕਾ ਤੇਜ਼ ਗੇਂਦਬਾਜ਼ ਵਰਨਨ ਫਿਲੈਂਡਰ ਨੇ ਕਿਹਾ, ‘‘ਖਿਡਾਰੀਆਂ ਬਾਰੇ ਗੱਲ ਕਰੋ, ਪਿੱਚ ਬਾਰੇ ਨਹੀਂ। ਟੈਸਟ ਕ੍ਰਿਕਟ ਵਿਚ ਪਿਚ ਮੁਤਾਬਕ ਢਲਣ ਦੀ ਗੱਲ ਹੁੰਦੀ ਹੈ।’’ ਉਧਰ ਟੀਮ ਦੇ ਬੱਲੇਬਾਜ਼ੀ ਕੋਚ ਐਸ਼ਵੈੱਲ ਪ੍ਰਿੰਸ ਨੇ ਮੰਨਿਆ ‘‘ਸਤਹਿ ਨੇ ਭਰੋਸੇ ਨੂੰ ਘਟਾ ਦਿੱਤਾ ਹੈ, ਜਦੋਂ ਗੇਂਦ ਸ਼ੂਟ ਕਰਦੀ ਹੈ ਜਾਂ ਬੇਤਰਤੀਬੇ ਤਰੀਕੇ ਨਾਲ ਹੇਠਾਂ ਰਹਿੰਦੀ ਹੈ ਤਾਂ ਤੁਸੀਂ ਸ਼ਾਟ ਨਹੀਂ ਲਗਾ ਸਕਦੇ।’’

What are your thoughts on the type of wicket we are seeing in kolkata? I love seeing fielders crowding the bat and the ball spinning big, makes for great viewing. Interested to hear how others see it.

— Aaron Finch (@AaronFinch5) November 15, 2025

ਇਕੱਲੇ ਆਸਟਰੇਲੀਆ ਦੇ ਸਾਬਕਾ ਕਪਤਾਨ ਆਰੋਨ ਫਿੰਚ ਨੇ ਪਿੱਚ ਦਾ ਬਚਾਅ ਕਰਦਿਆਂ ਕਿਹਾ, ‘‘ਹਰ ਕਿਸੇ ਦੇ ਵੱਸ ਦੀ ਗੱਲ ਨਹੀਂ ਹੁੰਦੀ, ਪਰ ਹਰੇਕ ਗੇਂਦ ਇਕ ਘਟਨਾ ਹੁੰਦੀ ਹੈ। ਜਿੱਤ ਦੀ ਉਡੀਕ ਕਰਨਾ ਮਜ਼ੇਦਾਰ ਹੁੰਦਾ ਹੈ।’’

ਆਈਸੀਸੀ ਵੱਲੋਂ ਈਡਨ ਗਾਰਡਨਜ਼ ਲਈ ‘ਮਾੜੀ’ ਦਰਜਾਬੰਦੀ ਅਤੇ ਡੀਮੈਰਿਟ ਅੰਕ ਜਾਰੀ ਕੀਤੇ ਜਾਣ ਦੀ ਸੰਭਾਵਨਾ ਦਰਮਿਆਨ ਹਰਭਜਨ ਨੇ ਚੇਤਾਵਨੀ ਦਿੱਤੀ ਹੈ ਕਿ ‘ਜੇ ਅਸੀਂ ਇਸੇ ਤਰ੍ਹਾਂ ਕਰਦੇ ਰਹੇ, ਤਾਂ ਟੈਸਟ ਕ੍ਰਿਕਟ ਨੂੰ ਵਿਰੋਧੀਆਂ ਨੂੰ ਮਾਰਨ ਦੀ ਲੋੜ ਨਹੀਂ ਪਵੇਗੀ: ਅਸੀਂ ਇਸ ਨੂੰ ਖੁਦ ਹੀ ਮਾਰ ਦੇਵਾਂਗੇ।’