ਬੈਡਮਿੰਟਨ: ਭਾਰਤ ਨੇ ਹਾਂਗਕਾਂਗ ਨੂੰ ਹਰਾ ਕੇ ਗਰੁੱਪ-ਡੀ ’ਚ ਸਿਖਰਲਾ ਸਥਾਨ ਮੱਲਿਆ

ਭਾਰਤ ਨੇ ਅੱਜ ਇੱਥੇ ਬੈਡਮਿੰਟਨ ਏਸ਼ੀਆ ਜੂਨੀਅਰ ਮਿਕਸਡ ਟੀਮ ਚੈਂਪੀਅਨਸ਼ਿਪ ’ਚ ਹਾਂਂਗਕਾਂਗ ਚੀਨ ਨੂੰ ਹਰਾ ਕੇ 110-100 ਅੰਕਾਂ ਨਾਲ ਹਰਾ ਕੇ ਆਪਣੀ ਜੇਤੂ ਲੈਅ ਬਰਕਰਾਰ ਰੱਖਦਿਆਂ ਗਰੁੱਪ-ਡੀ ’ਚ ਸਿਖਰਲਾ ਸਥਾਨ ਹਾਸਲ ਕੀਤਾ।

ਭਾਰਤ ਤੇ ਹਾਂਗਕਾਂਗ ਦੋਵੇਂ ਇਸ ਮੈਚ ਤੋਂ ਪਹਿਲਾਂ ਹੀ ਨਾਕਆਊਟ ਗੇੜ ’ਚ ਜਗ੍ਹਾ ਬਣਾ ਚੁੱਕੇ ਹਨ। ਕੁਆਰਟਰ ਫਾਈਨਲ ’ਚ ਭਾਰਤ ਦਾ ਮੁਕਾਬਲਾ ਜਪਾਨ ਨਾਲ ਹੋੋਵੇਗਾ। ਰੁਜੁਲਾ ਰਾਮੂ ਨੇ ਆਈਪੀ ਸੁਮ ਯਾਊ ਨੂੰ 11-8 ਨਾਲ ਹਰਾ ਕੇ ਭਾਰਤ ਦੀ ਜਿੱਤ ਨਾਲ ਸ਼ੁਰੂਆਤ ਕਰਵਾਈ, ਜਿਸ ਮਗਰੋਂ ਭਾਰਗਵ ਰਾਮ ਅਰੀਗੇਲਾ ਤੇ ਵੀ.ਟੀ ਗੌਬਬੁਰੂ ਦੀ ਦੁਨੀਆ ਦੀ ਛੇਵੇਂ ਨੰਬਰ ਦੀ ਜੋੜੀ ਨੇ ਚੇਉਂਗ ਸਾਈ ਸ਼ਿੰਗ ਤੇ ਡੈਂਗ ਚੀ ਫਾਈ ਖ਼ਿਲਾਫ਼ ਲੀਡ 22-13 ਕਰ ਦਿੱਤੀ।

ਹਾਂਗਕਾਂਗ ਦੇ ਲਾਮ ਕਾ ਟੋ ਨੇ 13 ਅੰਕ ਲੈ ਕੇ ਆਪਣੀ ਟੀਮ ਦੀ ਲੀਡ ਘਟਾਉਣ ਦੀ ਕੋਸ਼ਿਸ਼ ਕੀਤੀ ਪਰ ਆਰ. ਚੌਹਾਨ ਨੇ ਭਾਰਤ ਨੂੰ 33 ਅੰਕਾਂ ਤੱਕ ਪਹੁੰਚਾ ਦਿੱਤਾ। ਪੰਜ ਮੈਚਾਂ ਮਗਰੋਂ ਦੋਵਾਂ ਟੀਮਾਂ ਵਿਚਾਲੇ 55-49 ਦੇ ਸਕੋਰ ਨਾਲ ਛੇ ਅੰਕਾਂ ਦਾ ਫਰਕ ਸੀ।