ਦੁਕਾਨਦਾਰਾਂ ਵੱਲੋਂ ਓਵਰਬ੍ਰਿਜ ਦਾ ਵਿਰੋਧ

ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੀ ਅਗਵਾਈ ਹੇਠਲੀ ਸਰਕਾਰ ਵੱਲੋਂ ਧੂਰੀ ਸ਼ਹਿਰ ਦੇ ਲੋਕਾਂ ਦੀ ਟਰੈਫਿਕ ਸਮੱਸਿਆ ਦੇ ਮੱਦੇਨਜ਼ਰ ਤਕਰੀਬਨ 55 ਕਰੋੜ ਦੀ ਲਾਗਤ ਨਾਲ ਬਣਾਏ ਜਾ ਰਹੇ ਓਵਰਬ੍ਰਿਜ ਦਾ ਹੁਣ ਪ੍ਰਭਾਵਿਤ ਹੋਣ ਵਾਲੇ ਦੁਕਾਨਦਾਰਾਂ ਅਤੇ ਪੁਲ ਹੇਠਲੇ ਰਿਹਾਇਸ਼ੀ ਲੋਕਾਂ ਵੱਲੋਂ ਵਿਰੋਧ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਉਨ੍ਹਾਂ ਪ੍ਰਧਾਨ ਮੰਤਰੀ, ਰੇਲ ਮੰਤਰੀ, ਰਾਜ ਮੰਤਰੀ ਰਵਨੀਤ ਬਿੱਟੂ ਅਤੇ ਪੰਜਾਬ ਦੇ ਰਾਜਪਾਲ ਨੂੰ ਪੱਤਰ ਲਿਖ ਕੇ ਓਵਰਬ੍ਰਿਜ ਦੀ ਥਾਂ ਅੰਡਰਬ੍ਰਿਜ ਬਣਾਏ ਜਾਣ ਦੀ ਮੰਗ ਕੀਤੀ ਹੈ।

ਧੂਰੀ ਦੇ ਪ੍ਰਭਾਵਿਤ ਮੋਹਤਬਰਾਂ ਸਾਧੂ ਸਿੰਘ, ਧਰਮਵੀਰ ਸਿੰਘ, ਮਾਧੁਰ ਸਿੰਗਲਾ, ਜਤਿੰਦਰ ਕੁਮਾਰ, ਵਰਿੰਦਰ, ਰਜਿਤ ਅਤੇ ਰਮੇਸ਼ ਕੁਮਾਰ ਨੇ ਚਿੱਠੀਆਂ ਲਿਖਣ ਅਤੇ ਦਰਜਨਾਂ ਦਸਤਖ਼ਤ ਹੋਣ ਦਾ ਦਾਅਵਾ ਕਰਦਿਆਂ ਕਿਹਾ ਕਿ ਓਵਰਬ੍ਰਿਜ ਜਿੱਥੇ ਦੁਕਾਨਦਾਰਾਂ ਦੇ ਉਜਾੜੇ ਦਾ ਕਾਰਨ ਬਣੇਗਾ, ਉੱਥੇ ਪੁਲ ਦੇ ਹੇਠਲੇ ਦੋਵੇਂ ਪਾਸਿਆਂ ’ਤੇ ਬਣੇ ਘਰਾਂ ਨੂੰ ਦਿਨ ਰਾਤ ਚੱਲਣ ਵਾਲੀ ਟਰੈਫਿਕ ਕਾਰਨ ਪ੍ਰੇਸ਼ਾਨੀ ਆਵੇਗੀ। ਆਗੂਆਂ ਨੇ ਦਾਅਵਾ ਕੀਤਾ ਕਿ ਪਹਿਲਾਂ ਇੱਥੇ ਅੰਡਰਬ੍ਰਿਜ ਪਾਸ ਹੋਇਆ ਸੀ ਜੋ ਘੱਟ ਖ਼ਰਚੇ ਨਾਲ ਬਣੇਗਾ ਅਤੇ ਉਨ੍ਹਾਂ ਧੂਰੀ ਪੁੱਜੇ ਮੁੱਖ ਮੰਤਰੀ ਨੂੰ ਓਵਰਬ੍ਰਿਜ ਸਬੰਧੀ ਪੁਨਰ-ਵਿਚਾਰ ਕਰਨ ਦੀ ਲੋੜ ’ਤੇ ਜ਼ੋਰ ਦਿੱਤਾ।

ਜ਼ਿਕਰਯੋਗ ਹੈ ਕਿ ਪਿਛਲੇ ਦਿਨੀਂ ਧੂਰੀ ਪੁੱਜੇ ਕੇਂਦਰੀ ਰਾਜ ਮੰਤਰੀ ਰਵਨੀਤ ਬਿੱਟੂ ਨੇ ਰੇਲ ਵਿਭਾਗ ਕੋਲ ਧੂਰੀ ਓਵਰਬ੍ਰਿਜ ਸਬੰਧੀ ਪੰਜਾਬ ਸਰਕਾਰ ਵੱਲੋਂ ਕੋਈ ਰਾਬਤਾ ਨਾ ਕਰਨ ਦੇ ਬਿਆਨ ਨੇ ਚਰਚਾ ਛੇੜੀ ਸੀ ਜਦੋਂਕਿ ਪੰਜਾਬ ਸਰਕਾਰ ਦੇ ਨੁਮਾਇੰਦਿਆਂ ਦਾ ਦਾਅਵਾ ਸੀ ਕਿ ਪੁਲ ਲਈ ਸਿਰਫ਼ ਇੱਕ ਰੇਲਵੇ ਅਧਿਕਾਰੀ ਦੇ ਦਸਤਖ਼ਤ ਹੋਣ ਦੀ ਉਡੀਕ ਹੈ। ਧੂਰੀ ਦੇ ਸਾਬਕਾ ਕਾਂਗਰਸੀ ਵਿਧਾਇਕ ਦਲਵੀਰ ਸਿੰਘ ਗੋਲਡੀ ਖੰਗੂੜਾ ਪਹਿਲਾਂ ਹੀ ਅੰਡਰਬ੍ਰਿਜ ਉਨ੍ਹਾਂ ਦਾ ਡਰੀਮ ਪ੍ਰਾਜੈਕਟ ਹੋਣ ਦਾ ਦਾਅਵਾ ਕਰ ਚੁੱਕੇ ਹਨ।