ਈ ਓ ਦੀ ਕੋਠੀ ਦੀ ਬਿਜਲੀ ਸਪਲਾਈ ਕੱਟੀ

ਟਰਾਲੀਆਂ ਦਾ ਸਾਮਾਨ ਮਿਲਣ ਮਗਰੋਂ ਅੱਜ ਬਿਜਲੀ ਵਿਭਾਗ ਨੇ ਵੀ ਨਾਭਾ ਨਗਰ ਕੌਂਸਲ ਦੇ ਕਾਰਜਸਾਧਕ ਅਫ਼ਸਰ ਦੀ ਰਿਹਾਇਸ਼ ਦੀ ਚੈਕਿੰਗ ਕੀਤੀ। ਕੋਠੀ ਵਿੱਚ ਨਾਜਾਇਜ਼ ਤਰੀਕੇ ਬਿਜਲੀ ਦੀ ਵਰਤੋਂ ਕੀਤੀ ਜਾ ਰਹੀ ਸੀ। ਵਿਭਾਗ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਇੱਥੇ ਟਿਊਬਵੈੱਲ ਦੇ ਮੀਟਰ ਤੋਂ ਬਿਜਲੀ ਹੋਰ ਕੰਮਾਂ ਲਈ ਵਰਤੀ ਜਾ ਰਹੀ ਸੀ। ਉਨ੍ਹਾਂ ਅੱਜ ਕੋਠੀ ਦੀਆਂ ਬਿਜਲੀ ਸਪਲਾਈ ਵਾਲੀਆਂ ਤਾਰਾਂ ਕੱਟ ਦਿੱਤੀਆਂ। ਜ਼ਿਕਰਯੋਗ ਹੈ ਕਿ ਕੋਠੀ ਵਿੱਚ ਘਰੇਲੂ ਬਿਜਲੀ ਵਰਤੋਂ ਲਈ ਕੋਈ ਮੀਟਰ ਨਹੀਂ ਸੀ। ਪਿਛਲੇ ਦਿਨਾਂ ਵਿੱਚ ਕੋਠੀ ਵਿੱਚ ਵਰਕਸ਼ਾਪ ਅਤੇ ਕੌਂਸਲ ਪ੍ਰਧਾਨ ਦੇ ਪਤੀ ਮੁਨੀਸ਼ ਚਾਵਲਾ ਉਰਫ਼ ਪੰਕਜ ਪੱਪੂ ਦਾ ਕਥਿਤ ਦਫ਼ਤਰ ਹੋਣ ਦੀਆਂ ਖ਼ਬਰਾਂ ਨਸ਼ਰ ਹੋਣ ਮਗਰੋਂ ਵਿਭਾਗ ਨੇ ਇਹ ਕਾਰਵਾਈ ਕੀਤੀ ਹੈ। ਜ਼ਿਕਰਯੋਗ ਹੈ ਕਿ ਦੋ ਦਿਨ ਪਹਿਲਾਂ ਇਸ ਕੋਠੀ ਵਿੱਚੋਂ ਕਿਸਾਨਾਂ ਦੀਆਂ ਟਰਾਲੀਆਂ ਦਾ ਸਾਮਾਨ ਜ਼ਮੀਨ ਵਿੱਚ ਦੱਬਿਆ ਮਿਲਣ ਕਾਰਨ ਇਹ ਕੋਠੀ ਕਾਫੀ ਚਰਚਾ ਵਿੱਚ ਹੈ।

ਕਾਰਜਸਾਧਕ ਅਫਸਰ ਨੂੰ ਜੁਰਮਾਨਾ ਭੇਜਿਆ ਜਾਵੇਗਾ: ਐਕਸੀਅਨ

ਬਿਜਲੀ ਵਿਭਾਗ ਦੇ ਐਕਸੀਅਨ ਪ੍ਰੀਕਸ਼ਿਤ ਭਨੋਟ ਨੇ ਦੱਸਿਆ ਕਿ ਟਿਊਬਵੈੱਲ ਦਾ ਮੀਟਰ ਵੱਖਰਾ ਹੁੰਦਾ ਹੈ ਜਿਸ ’ਤੇ ਸਬਸਿਡੀ ਵਾਲੇ ਰੇਟ ਲੱਗਦੇ ਹਨ ਤੇ ਇਹ ਬਿਜਲੀ ਹੋਰ ਕੰਮਾਂ ਲਈ ਨਹੀਂ ਵਰਤੀ ਜਾ ਸਕਦੀ। ਉਨ੍ਹਾਂ ਦੱਸਿਆ ਕਿ ਕੋਠੀ ਦੇ ਖਾਲੀ ਹੋਣ ਕਾਰਨ ਇਸ ਤੋਂ ਮੀਟਰ ਉਤਾਰਿਆ ਗਿਆ ਸੀ। ਉਨ੍ਹਾਂ ਕਿਹਾ ਕਿ ਇਸ ਗੈਰ ਪ੍ਰਵਾਨਿਤ ਵਰਤੋਂ ਕਾਰਨ ਕਾਰਜਸਾਧਕ ਅਫਸਰ ਨੂੰ ਜੁਰਮਾਨਾ ਭੇਜਿਆ ਜਾਵੇਗਾ। ਇਸ ਮੌਕੇ ਪੰਕਜ ਪੱਪੂ ਨੇ ਦੱਸਿਆ ਕਿ ਉਹ ਬਿਜਲੀ ਨਿੱਜੀ ਕੰਮਾਂ ਲਈ ਨਹੀਂ ਵਰਤ ਰਹੇ ਸਨ। ਇੱਥੇ ਨਗਰ ਕੌਂਸਲ ਦੀ ਕੂੜੇ ਵਾਲੀਆਂ ਗੱਡੀਆਂ ਦੀ ਬੈਟਰੀਆਂ ਚਾਰਜ ਹੁੰਦੀਆਂ ਸਨ।

ਕੋਠੀ ਪੰਕਜ ਪੱਪੂ ਵੱਲੋਂ ਵਰਤੀ ਜਾ ਰਹੀ ਸੀ: ਈ ਓ

ਨਾਭਾ ਈ ਓ ਗੁਰਚਰਨ ਸਿੰਘ ਨੇ ਮੁੜ ਆਪਣਾ ਬਿਆਨ ਦੋਹਰਾਇਆ ਕਿ ਇਹ ਕੋਠੀ ਪੰਕਜ ਪੱਪੂ ਵੱਲੋਂ ਵਰਤੀ ਜਾ ਰਹੀ ਸੀ ਤੇ ਉਹ ਕਦੇ ਇੱਥੇ ਰਿਹਾ ਹੀ ਨਹੀਂ ਤੇ ਕੋਠੀ ਵਿੱਚ ਮੀਟਰ ਨਾ ਲੱਗੇ ਹੋਣ ਦੇ ਕਾਰਨਾਂ ਤੋਂ ਵੀ ਉਹ ਅਣਜਾਣ ਹੈ।