ਮੁਰੱਬੇ ਨਾਲ ਮਹਿਕਿਆ ਚੱਠਾ ਨਨਹੇੜਾ ਦੇ ਮਨਜੀਤ ਦਾ ਕਾਰੋਬਾਰ
ਸੰਗਰੂਰ ਜ਼ਿਲ੍ਹੇ ਦੇ ਪਿੰਡ ਚੱਠਾ ਨਨਹੇੜਾ ਦੇ ਮਨਜੀਤ ਸਿੰਘ ਦਾ ਬ੍ਰਾਂਡ ‘ਪਿੰਡ-ਮੇਡ’ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਲੁਧਿਆਣਾ ਦੇ ਕਿਸਾਨ ਮੇਲੇ ਦੌਰਾਨ ਲਾਂਚ ਕੀਤਾ ਗਿਆ। ਮਨਜੀਤ ਸਿੰਘ ਦੀ ਮਾਤਾ ਰਾਜਿੰਦਰ ਕੌਰ ਅਤੇ ਪਿਤਾ ਨੈਬ ਸਿੰਘ ਸਾਲ 2016 ਤੋਂ ‘ਕਿਰਤ’ ਸਵੈ-ਸਹਾਇਤਾ ਸਮੂਹ ਚਲਾ...
ਸੰਗਰੂਰ ਜ਼ਿਲ੍ਹੇ ਦੇ ਪਿੰਡ ਚੱਠਾ ਨਨਹੇੜਾ ਦੇ ਮਨਜੀਤ ਸਿੰਘ ਦਾ ਬ੍ਰਾਂਡ ‘ਪਿੰਡ-ਮੇਡ’ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਲੁਧਿਆਣਾ ਦੇ ਕਿਸਾਨ ਮੇਲੇ ਦੌਰਾਨ ਲਾਂਚ ਕੀਤਾ ਗਿਆ। ਮਨਜੀਤ ਸਿੰਘ ਦੀ ਮਾਤਾ ਰਾਜਿੰਦਰ ਕੌਰ ਅਤੇ ਪਿਤਾ ਨੈਬ ਸਿੰਘ ਸਾਲ 2016 ਤੋਂ ‘ਕਿਰਤ’ ਸਵੈ-ਸਹਾਇਤਾ ਸਮੂਹ ਚਲਾ ਰਹੇ ਹਨ ਜਿਸ ਵਿੱਚ ਮਨਜੀਤ ਸਿੰਘ ਵੀ ਆਪਣੇ ਮਾਪਿਆਂ ਨਾਲ ਕੰਮ ਵਿੱਚ ਹੱਥ ਵਟਾਉਂਦਾ ਸੀ। ਕਿਰਤ ਸਵੈ-ਸਹਾਇਤਾ ਸਮੂਹ ਵੱਖ-ਵੱਖ ਤਰੀਕੇ ਦੇ ਅਚਾਰ ਅਤੇ ਘਰੇਲੂ ਮਸਾਲੇ ਤਿਆਰ ਕਰ ਰਿਹਾ ਹੈ। ਇਹ ਕੰਮ ਉਨ੍ਹਾਂ ਨੇ ਕ੍ਰਿਸ਼ੀ ਵਿਗਿਆਨ ਕੇਂਦਰ ਸੰਗਰੂਰ ਤੋਂ ਸਿਖਲਾਈ ਪ੍ਰਾਪਤ ਕਰਨ ਉਪਰੰਤ ਸ਼ੁਰੂ ਕੀਤਾ ਸੀ। ਸਮੇਂ ਦੇ ਨਾਲ ਉਨ੍ਹਾਂ ਦੇ ਉਤਪਾਦ ਉੱਚ-ਗੁਣਵੱਤਾ ਅਤੇ ਰਵਾਇਤੀ ਸਵਾਦ ਕਰਕੇ ਪੰਜਾਬ ਵਿੱਚ ਕਾਫੀ ਪ੍ਰਸਿੱਧ ਹੋ ਗਏ।
ਕ੍ਰਿਸ਼ੀ ਵਿਗਿਆਨ ਕੇਂਦਰ ਦੇ ਸੰਗਰੂਰ ਇੰਚਾਰਜ ਡਾ. ਮਨਦੀਪ ਸਿੰਘ ਨੇ ਦੱਸਿਆ ਕਿ ‘ਪਿੰਡ-ਮੇਡ’ ਬਰਾਂਡ ਅਧੀਨ ਹੁਣ ਉਹ ਵੱਖ-ਵੱਖ ਤਰ੍ਹਾਂ ਦੇ ਆਚਾਰ, ਮੁਰੱਬੇ, ਚਟਣੀਆਂ ਅਤੇ ਘਰੇਲੂ ਮਸਾਲੇ ਤਿਆਰ ਕਰ ਰਹੇ ਹਨ ਅਤੇ ਸਾਰੇ ਉਤਪਾਦ ਬਹੁਤ ਹੀ ਸਫ਼ਾਈ ਨਾਲ ਤਿਆਰ ਕਰਕੇ ਵਧੀਆ ਢੰਗ ਨਾਲ ਪੈਕ ਕੀਤੇ ਜਾਂਦੇ ਹਨ। ਖਾਸ ਗੱਲ ਹੈ ਕਿ ਮਨਜੀਤ ਸਿੰਘ ਨੇ ਸ਼ੁਰੂਆਤ ਵਿੱਚ ਕੈਨੇਡਾ ਜਾਣ ਦੀ ਇੱਛਾ ਜ਼ਾਹਿਰ ਕੀਤੀ ਸੀ ਪਰ ਹੁਣ ਉਸ ਨੇ ਆਪਣੇ ਵਿਚਾਰ ਬਦਲ ਕੇ ਆਪਣੇ ਜ਼ਿਲ੍ਹੇ ਵਿੱਚ ਹੀ ਆਪਣੇ ਪਰਿਵਾਰ ਨਾਲ ਰਹਿ ਕੇ ਰੁਜ਼ਗਾਰ ਸ਼ੁਰੂ ਕਰਨ ਦਾ ਫੈਸਲਾ ਕੀਤਾ ਹੈ। ਆਪਣੇ ਪਰਿਵਾਰ ਦੇ ਪੂਰੇ ਸਹਿਯੋਗ ਨਾਲ ਅੱਜ ਉਹ ਇੱਕ ਸਫ਼ਲ ਵਪਾਰ ਖੜ੍ਹਾ ਕਰਨ ਵਿੱਚ ਕਾਮਯਾਬ ਹੋ ਰਿਹਾ ਹੈ। ਜੋ ਨਾ ਸਿਰਫ ਉਨ੍ਹਾਂ ਦੇ ਘਰ ਦੀ ਆਮਦਨ ਵਧਾ ਰਿਹਾ ਹੈ ਸਗੋਂ ਹੋਰਨਾਂ ਨੌਜਵਾਨਾਂ ਲਈ ਵੀ ਪ੍ਰੇਰਨਾ ਸਰੋਤ ਬਣ ਕੇ ਉੱਭਰਿਆ ਹੈ।
ਬੀਤੇ ਦਿਨੀਂ ਪੀ.ਏ.ਯੂ., ਲੁਧਿਆਣਾ ਦੇ ਦੋ-ਰੋਜ਼ਾ ਕਿਸਾਨ ਮੇਲੇ ਵਿੱਚ ਪਿੰਡ-ਮੇਡ ਬਰਾਂਡ ਨੂੰ ਗਹਾਕਾਂ ਵੱਲੋਂ ਬਹੁਤ ਵਧੀਆ ਹੁੰਗਾਰਾ ਮਿਲਿਆ ਅਤੇ ਉਨ੍ਹਾਂ ਦੀ ਵਿਕਰੀ ਵੀ ਕਾਫੀ ਚੰਗੀ ਰਹੀ। ਇਸ ਮੌਕੇ ਡਾ. ਮਨਦੀਪ ਸਿੰਘ, ਡਾ ਵਿਤਸਤਾ ਅਤੇ ਡਾ. ਮੋਨਿਕਾ ਚੌਧਰੀ ਆਦਿ ਨੇ ਮਨਜੀਤ ਸਿੰਘ ਅਤੇ ਉਸ ਦੇ ਪਰਿਵਾਰ ਨੂੰ ਇਸ ਸਫ਼ਲਤਾ ਲਈ ਵਧਾਈ ਦਿੱਤੀ।
