ਨਗਰ ਕੌਂਸਲ ਦੀ ਹਦੂਦ ’ਚ ਲੱਗੇ ਬੈਨਰ ਪਾੜੇ

ਦਰਸ਼ਨ ਸਿੰਘ ਮਿੱਠਾ

ਰਾਜਪੁਰਾ, 21 ਮਾਰਚ

ਮਿਰਚ ਮੰਡੀ ਰਾਜਪੁਰਾ ਵਿੱਚ ਬਹੁ-ਕਰੋੜੀ ਜ਼ਮੀਨ ’ਤੇ ਨਗਰ ਕੌਂਸਲ ਵੱਲੋਂ ਲਗਾਏ ਆਪਣੀ ਮਲਕੀਅਤ ਦੇ ਬੈਨਰ ਸ਼ਰਾਰਤੀ ਅਨਸਰਾਂ ਵੱਲੋਂ ਪਾੜ ਦਿੱਤੇ ਗਏ ਹਨ ਅਤੇ ਪਾਰਕ ਦੀ ਚਾਰਦੀਵਾਰੀ ਬਣਾਉਣ ਲਈ ਖੜ੍ਹੇ ਕੀਤੇ ਰੈਡੀਮੇਡ ਪਿੱਲਰ ਡੇਗ ਦਿੱਤੇ ਗਏ। ਹਾਲਾਂਕਿ, ਨਜ਼ਦੀਕੀ ਵਸ਼ਿੰਦੇ ਇਸ ਨੂੰ ਬੱਚਿਆਂ ਵੱਲੋਂ ਕੀਤੀ ਸ਼ਰਾਰਤ ਦੱਸ ਰਹੇ ਹਨ। ਜ਼ਿਕਰਯੋਗ ਹੈ ਕਿ ਨਗਰ ਕੌਂਸਲ ਨੇ 10 ਮਾਰਚ ਨੂੰ ਪੁਲੀਸ ਫੋਰਸ ਦੀ ਮਦਦ ਨਾਲ ਮਿਰਚ ਮੰਡੀ ਵਿੱਚ ਬੇਸ਼ਕੀਮਤੀ ਲਗਪਗ 5000 ਗਜ ਜ਼ਮੀਨ ’ਤੇ ਪਿਛਲੇ 50 ਸਾਲਾਂ ਤੋਂ ਕੀਤੇ ਕਬਜ਼ੇ ਹਟਾ ਕੇ ਆਪਣੇ ਅਧੀਨ ਲੈ ਲਿਆ ਸੀ। ਨਗਰ ਕੌਂਸਲ ਨੇ ਨਗਰ ਕੌਂਸਲ ਦੀ ਉਕਤ ਕਬਜ਼ੇ ਵਿਚ ਲਈ ਜ਼ਮੀਨ ਦੇ ਚਾਰੇ ਪਾਸੇ ਮਲਕੀਅਤ ਨੂੰ ਦਰਸਾਉਂਦੇ ਬੋਰਡ/ਬੈਨਰ ਲਗਾਏ ਸਨ। ਹਲਕਾ ਵਿਧਾਇਕਾ ਨੀਨਾ ਮਿੱਤਲ ਨੇ 16 ਮਾਰਚ ਨੂੰ ਉਕਤ ਜ਼ਮੀਨ ’ਤੇ ਸੁੰਦਰ ਪਾਰਕ ਬਣਾਉਣ ਦਾ ਨੀਂਹ ਪੱਥਰ ਰੱਖਿਆ ਸੀ। ਠੇਕੇਦਾਰ ਨੇ ਪਾਰਕ ਦੇ ਕਾਫ਼ੀ ਵੱਡੇ ਹਿੱਸੇ ਦੇ ਚਾਰੇ ਪਾਸੇ ਸੀਮੈਂਟ ਦੇ ਰੈਡੀਮੇਡ ਪਿੱਲਰ ਲਗਾ ਦਿੱਤੇ। ਵਾਰਡ ਇੰਚਾਰਜ ਟਿੰਕੂ ਬਾਂਸਲ ਨੇ ਦੱਸਿਆ ਕਿ ਉਕਤ ਜਗਾ ’ਤੇ ਲਗਾਏ ਰੈਡੀਮੇਡ ਪਿੱਲਰ ਰਾਤ ਵੇਲ਼ੇ ਸ਼ਰਾਰਤੀ ਅਨਸਰ ਡੇਗ ਦਿੰਦੇ ਹਨ ਅਤੇ ਚਾਰੇ ਪਾਸੇ ਲਗਾਏ ਬੈਨਰ ਪਾੜ ਦਿੱਤੇ ਗਏ ਹਨ। ਉਨ੍ਹਾਂ ਕਿਹਾ ਕਿ ਹੁਣ ਠੇਕੇਦਾਰ ਨੂੰ ਕਹਿ ਕੇ ਲਗਾਏ ਪਿੱਲਰ ਸੀਮੈਂਟ ਨਾਲ ਪੱਕੇ ਕੀਤੇ ਜਾਣਗੇ। ਇਸ ਸਬੰਧੀ ਗਲ ਕਰਨ ’ਤੇ ਕਾਰਜ ਸਾਧਕ ਅਫ਼ਸਰ ਅਵਤਾਰ ਚੰਦ ਨੇ ਕਿਹਾ ਕਿ ਨਗਰ ਕੌਂਸਲ ਨੇ ਉਕਤ ਥਾਂ ਦਾ ਕਬਜ਼ਾ ਲੈ ਕੇ ਪਾਰਕ ਨਿਰਮਾਣ ਦਾ ਕਾਰਜ ਸ਼ੁਰੂ ਕੀਤਾ ਹੋਇਆ ਹੈ ਜੇਕਰ ਕੋਈ ਵਿਅਕਤੀ ਦੁਬਾਰਾ ਕਬਜ਼ਾ ਵਗ਼ੈਰਾ ਕਰਨ ਜਾਂ ਕੰਮ ਵਿਚ ਵਿਘਨ ਪਾਉਣ ਦੀ ਕੋਸ਼ਿਸ਼ਾਂ ਕਰੇਗਾ ਤਾਂ ਉਸ ਵਿਰੁੱਧ ਕਾਨੂੰਨੀ ਕਾਰਵਾਈ ਅਮਲ ਵਿਚ ਲਿਆਂਦੀ ਜਾਵੇਗੀ।