ਹੈਲੀਕਾਪਟਰ ਬਾਰੇ ਖੰਭਾਂ ਦੀਆਂ ਡਾਰਾਂ ਬਣਾਉਣ ਵਾਲੇ ਤੱਥ ਪੇਸ਼ ਕਰਨ: ਬਲਤੇਜ ਪੰਨੂ
‘ਆਪ’ ਦੇ ਜਨਰਲ ਸਕੱਤਰ ਨੇ ਪਿਛਲੀਆਂ ਸਰਕਾਰਾਂ ’ਤੇ ਚੁੱਕੇ ਸਵਾਲ
ਆਮ ਆਦਮੀ ਪਾਰਟੀ ਦੇ ਜਨਰਲ ਸਕੱਤਰ ਅਤੇ ਪ੍ਰਮੁੱਖ ਬੁਲਾਰੇ ਬਲਤੇਜ ਪੰਨੂ ਨੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੇ ਵਿਦੇਸ਼ ਦੌਰੇ ਦੇ ਬਾਵਜੂਦ ਪੰਜਾਬ ਸਰਕਾਰ ਦੇ ਹੈਲੀਕਾਪਟਰ ਦੀ ਦੁਰਵਰਤੋਂ ਬਾਰੇ ਚਰਚਾ ਨੂੰ ‘ਬੇਬੁਨਿਆਦ’ ਕਰਾਰ ਦਿੰਦਿਆਂ ਅਜਿਹਾ ਕਰਨ ਵਾਲਿਆਂ ਨੂੰ ਤੱਥ ਪੇਸ਼ ਕਰਨ ਦੀ ਚੁਣੌਤੀ ਦਿੱਤੀ।
ਇਥੇ ਪ੍ਰੈਸ ਕਾਨਫਰੰਸ ਦੌਰਾਨ ਉਨ੍ਹਾਂ ਦੱਸਿਆ ਕਿ ਸਿਰਫ ਇੱਕ ਦਿਨ ਅੰਮ੍ਰਿਤਸਰ ਜਾਣ ਲਈ ਰਾਜਪਾਲ ਨੇ ਹੈਲੀਕਾਪਟਰ ਵਰਤਿਆ ਸੀ। ਮੁੱਖ ਮੰਤਰੀ ਦੀ ਆਗਿਆ ਬਗ਼ੈਰ ਹੈਲੀਕਾਪਟਰ ਦੀ ਵਰਤੋਂ ਰਾਜਪਾਲ ਵੀ ਨਹੀਂ ਕਰ ਸਕਦੇ ਪਰ ਕੁਝ ਲੋਕ ਆਪਣੀ ਆਦਤ ਤੋਂ ਮਜਬੂਰ ਹੋ ਕੇ ਬੇਬੁਨਿਆਦ ਦੋਸ਼ ਲਗਾ ਰਹੇ ਹਨ। ਉਨ੍ਹਾਂ ਤਤਕਾਲੀ ਸਰਕਾਰਾਂ ਨੂੰ ਕਟਹਿਰੇ ’ਚ ਖੜ੍ਹੇ ਕਰਦਿਆਂ ਆਖਿਆ ਕਿ ਹੈਲੀਕਾਪਟਰ ਦੀ ਦੁਰਵਰਤੋਂ ਉਦੋਂ ਹੁੰਦੀ ਸੀ, ਜਦੋਂ ਦਿੱਲੀ ਤੋਂ ਬੱਚਿਆਂ ਨੂੰ ਬਠਿੰਡੇ ਦੀਆਂ ਝੀਲਾਂ ’ਚ ਬੋਟਿੰਗ ਕਰਨ ਲਈ ਲਿਆਇਆ ਜਾਂਦਾ ਅਤੇ ਪੀਜ਼ੇ ਖੁਆ ਕੇ ਵਾਪਸ ਦਿੱਲੀ ਲਿਜਾਇਆ ਜਾਂਦਾ ਸੀ, ਜਾਂ ਦੁਰਵਰਤੋਂ ਉਦੋਂ ਹੁੰਦੀ ਸੀ ਜਦੋਂ ਪਾਕਿਸਤਾਨੀ ਮਹਿਲਾ ਦੇ ਕੁੱਤਿਆਂ ਨੂੰ ਸਰਕਾਰੀ ਹੈਲੀਕਾਪਟਰ ’ਤੇ ਸ਼ਿਮਲੇ ਲਿਜਾਇਆ ਜਾਂਦਾ ਸੀ। ਉਨ੍ਹਾਂ ਕਿਹਾ ਕਿ ਹੁਣ ਹੋ ਰਹੀਆਂ ਜ਼ਿਲ੍ਹਾ ਪਰਿਸ਼ਦ ਅਤੇ ਬਲਾਕ ਸਮਿਤੀ ਚੋਣਾਂ ਲਈ ‘ਆਪ’ ਆਪਣੀ ਸਰਕਾਰ ਦੇ ਚਹੁੰ ਸਾਲਾਂ ਦੀ ਕਾਰਜਕਰਦਗੀ ਦੇ ਹਵਾਲੇ ਨਾਲ ਵੋਟਰਾਂ ਤੋਂ ਫ਼ਤਵਾ ਮੰਗ ਰਹੀ ਹੈ।
ਬਠਿੰਡਾ ਥਰਮਲ ਕਲੋਨੀ ਦੀ ਜ਼ਮੀਨ ਵੇਚਣ ਬਾਰੇ ਉਨ੍ਹਾਂ ਸੁਆਲ ਚੁੱਕਿਆ ਕਿ ਸਾਡੀ ਸਰਕਾਰ ਨੇ ਕਾਂਗਰਸੀ ਖਜ਼ਾਨਾ ਮੰਤਰੀ ਮਨਪ੍ਰੀਤ ਬਾਦਲ ਵਾਂਗ ਥਰਮਲ ਦੀ ਜ਼ਮੀਨ ਇਕ ਰੁਪਏ ਲੀਜ਼ ’ਤੇ ਤਾਂ ਨਹੀਂ ਕਿਸੇ ਨੂੰ ਦਿੱਤੀ। ਉਨ੍ਹਾਂ ਪੰਜਾਬ ’ਚ ਅਮਨ ਕਾਨੂੰਨ ਦੇ ਮੁੱਦੇ ’ਤੇ ਆਖਿਆ ਕਿ ਦੁਨੀਆਂ ਜਾਣਦੀ ਹੈ ਕਿ ਗੈਂਗਸਟਰਾਂ ਦੀ ਪੁਸ਼ਤਪਨਾਹੀ ਕੌਣ ਕਰਦਾ ਹੈ ਅਤੇ ਕੌਣ ਗੈਂਗਸਟਰਾਂ ਦੇ ਪਰਿਵਾਰਾਂ ਨੂੰ ਟਿਕਟਾਂ ਨਾਲ ਨਿਵਾਜਦਾ ਹੈ। ਆਡੀਓ ਲੀਕ ਮਾਮਲੇ ਬਾਰੇ ਉਨ੍ਹਾਂ ਕਿਹਾ ਕਿ ਇਹ ਅਕਾਲੀ ਦਲ ਵੱਲੋਂ ਏਆਈ ਨਾਲ ਬਣਵਾਈ ਗਈ। ਡਾ. ਨਵਜੋਤ ਕੌਰ ਸਿੱਧੂ ਵੱਲੋਂ ਪਿਛਲੇ ਦਿਨੀਂ ਉਭਾਰੇ ਮੁੱਦੇ ਬਾਰੇ ਉਨ੍ਹਾਂ ਕਿਹਾ ਕਿ ਕਾਂਗਰਸ ਨੇ ਅਹੁਦਿਆਂ ਦੀ ਸੇਲ ਲਾ ਦਿੱਤੀ ਹੈ। ਭਾਜਪਾ ਦੇ ਪ੍ਰਧਾਨ ਸੁਨੀਲ ਜਾਖੜ ਜਾਣਦੇ ਹਨ ਕਿ ਚਰਨਜੀਤ ਚੰਨੀ ਦੇ ਮੁੱਖ ਮੰਤਰੀ ਬਣਨ ਸਮੇਂ 350 ਕਰੋੜ ਰੁਪਏ ਕਿਵੇਂ ਇਕੱਠੇ ਕੀਤੇ ਅਤੇ ਕਿਸ ਨੂੰ ਦਿੱਤੇ ਗਏ। ਸ੍ਰੀ ਜਾਖੜ ਅਤੇ ਕੈਪਟਨ ਅਮਰਿੰਦਰ ਸਿੰਘ ਨੂੰ ਇਸ ਬਾਰੇ ਦੱਸ ਹੀ ਦੇਣਾ ਚਾਹੀਦਾ ਹੈ। ਉਨ੍ਹਾਂ ਖੁਲਾਸਾ ਕੀਤਾ ਕਿ ਰਾਜਾ ਵੜਿੰਗ ਖ਼ਿਲਾਫ਼ ਬੱਸਾਂ ਨੂੰ ਬਾਡੀਆਂ ਲਾਉਣ ਦੇ ਮਾਮਲੇ ’ਚ ਜਾਂਚ ਚੱਲ ਰਹੀ ਹੈ।
