‘ਖੇਤਾਂ ਦੇ ਰਾਜੇ’ ਨੇ ਲੋਕਾਂ ਨੂੰ ਡੁੱਬਣੋਂ ਬਚਾਇਆ

ਪੰਜਾਬ ’ਚ ਇਸ ਵੇਲੇ 6.41 ਲੱਖ ਟਰੈਕਟਰ ਹਨ ਜਿਨ੍ਹਾਂ ’ਚੋਂ 1.98 ਲੱਖ ਟਰੈਕਟਰ ਹੜ੍ਹ ਤੋਂ ਪ੍ਰਭਾਵਿਤ ਅੱਠ ਜ਼ਿਲ੍ਹਿਆਂ ’ਚ ਹਨ। ਸਭ ਤੋਂ ਵੱਧ ਟਰੈਕਟਰ ਜ਼ਿਲ੍ਹਾ ਫ਼ਿਰੋਜ਼ਪੁਰ ’ਚ 55,332 ਹਨ। ਹੜ੍ਹਾਂ ਦੇ ਪਾਣੀ ’ਚ ਸਿਵਾਏ ਟਰੈਕਟਰ ਤੋਂ ਕੋਈ ਵੀ ਦੋ-ਪਹੀਆ ਜਾਂ ਚਾਰ-ਪਹੀਆ ਵਾਹਨ ਕੰਮ ਨਹੀਂ ਆ ਰਿਹਾ ਹੈ। ਜ਼ਿਲ੍ਹਾ ਫ਼ਿਰੋਜ਼ਪੁਰ ’ਚ ਸੈਂਕੜੇ ਟਰੈਕਟਰ ਮਿੱਟੀ ਦੇ ਗੱਟੇ ਢੋਅ ਰਹੇ ਹਨ ਅਤੇ ਵੱਡੇ ਟਰੈਕਟਰਾਂ ਦੀ ਮਦਦ ਨਾਲ ਬੰਨ੍ਹ ਮਜ਼ਬੂਤ ਕੀਤੇ ਜਾ ਰਹੇ ਹਨ। ਪਾਣੀ ਨੂੰ ਰੋਕਣ ਲਈ ਟਰੈਕਟਰ ਮਿੱਟੀ ਪਾ ਰਹੇ ਹਨ।

ਕ੍ਰਾਂਤੀਕਾਰੀ ਕਿਸਾਨ ਯੂਨੀਅਨ ਦੇ ਸੀਨੀਅਰ ਆਗੂ ਅਵਤਾਰ ਸਿੰਘ ਮਹਿਮਾ ਨੇ ਕਿਹਾ ਕਿ ਉਹ ਜ਼ਿਲ੍ਹਾ ਫ਼ਿਰੋਜ਼ਪੁਰ ਦੇ ਦਰਜਨਾਂ ਪਿੰਡਾਂ ਵਿੱਚ ਗਏ ਹਨ ਅਤੇ ਇਨ੍ਹਾਂ ਪਿੰਡਾਂ ’ਚ ਟਰੈਕਟਰ ਹੀ ਸਭ ਤੋਂ ਵੱਡਾ ਸਹਾਰਾ ਹੈ ਅਤੇ ਹੁਸੈਨੀਵਾਲਾ ਤੋਂ ਪਾਰ 16 ਪਿੰਡਾਂ ’ਚੋਂ ਇਨ੍ਹਾਂ ਟਰੈਕਟਰਾਂ ਦੀ ਮਦਦ ਨਾਲ ਹੀ ਲੋਕਾਂ ਨੂੰ ਬਾਹਰ ਕੱਢਿਆ ਗਿਆ ਹੈ। ਟਰੈਕਟਰਾਂ-ਟਰਾਲੀਆਂ ’ਚ ਹੀ ਪਸ਼ੂ ਸੁਰੱਖਿਅਤ ਥਾਵਾਂ ’ਤੇ ਲਿਆਂਦੇ ਜਾ ਸਕੇ ਹਨ। ਉਨ੍ਹਾਂ ਕਿਹਾ ਕਿ ਔਖ ਦੇ ਵੇਲੇ ’ਚ ਪਿੰਡਾਂ ਦੀ ਜਵਾਨੀ ਹੀ ਲੋਕਾਂ ਦੀ ਮਸੀਹਾ ਬਣੀ ਹੋਈ ਹੈ। ਉਨ੍ਹਾਂ ਕਿਹਾ ਕਿ ਟਰੈਕਟਰ ਨੇ ਹਕੂਮਤ ਨੂੰ ਆਪਣੀ ਤਾਕਤ ਦਿਖਾ ਦਿੱਤੀ ਹੈ।

ਹੜ੍ਹ ਪੀੜਤ ਖੇਤਰਾਂ ’ਚ ਚਾਰ-ਚੁਫੇਰੇ ਟਰੈਕਟਰ ਹੀ ਟਰੈਕਟਰ ਨਜ਼ਰ ਆ ਰਹੇ ਹਨ। ਬੀਤੇ ਦਿਨੀਂ ਮੁੱਖ ਸਕੱਤਰ ਕੇਏਪੀ ਸਿਨਹਾ ਵੀ ਟਰੈਕਟਰ ’ਤੇ ਸਵਾਰ ਹੋ ਕੇ ਹੀ ਹੜ੍ਹਾਂ ਦਾ ਜਾਇਜ਼ਾ ਲੈਣ ਗਏ ਸਨ। ਵਜ਼ੀਰ ਤੇ ਵਿਧਾਇਕ ਵੀ ਟਰੈਕਟਰਾਂ ’ਤੇ ਬੈਠੇ ਦੇਖੇ ਜਾ ਸਕਦੇ ਹਨ। ਬੀਕੇਯੂ (ਕ੍ਰਾਂਤੀਕਾਰੀ) ਦੇ ਚੇਅਰਮੈਨ ਸੁਰਜੀਤ ਸਿੰਘ ਫੂਲ ਨੇ ਕਿਹਾ ਕਿ ਹੜ੍ਹਾਂ ’ਚ ਹੁਣ ਟਰੈਕਟਰ ਹੀ ਸਾਰੇ ਪ੍ਰਬੰਧਾਂ ਦੀ ਕੁੰਜੀ ਬਣਿਆ ਹੋਇਆ ਹੈ ਅਤੇ ਟਰੈਕਟਰ ਨੂੰ ਭੰਡਣ ਵਾਲੇ ਆਗੂਆਂ ਨੂੰ ਹੁਣ ਸਬਕ ਲੈਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਜਿੱਥੇ ਕਿਸ਼ਤੀ ਵੀ ਨਹੀਂ ਜਾ ਸਕਦੀ, ਉੱਥੇ ਟਰੈਕਟਰ ਦੀ ਮਦਦ ਲਈ ਜਾ ਰਹੀ ਹੈ। ਹੜ੍ਹਾਂ ਦੇ ਭੰਨ੍ਹੇ ਅੱਠ ਜ਼ਿਲ੍ਹਿਆਂ ’ਚ ਟਰੈਕਟਰ-ਟਰਾਲੀਆਂ ਦੀ ਮਦਦ ਨਾਲ ਹੀ ਰਾਹਤ ਸਮੱਗਰੀ ਪਹੁੰਚਾਈ ਜਾ ਰਹੀ ਹੈ ਅਤੇ ਪਸ਼ੂਆਂ ਵਾਸਤੇ ਹਰਾ ਚਾਰਾ ਢੋਣ ਵਾਸਤੇ ਵੀ ਟਰੈਕਟਰਾਂ ਦੀ ਵਰਤੋਂ ਹੋ ਰਹੀ ਹੈ। ਵੇਰਵਿਆਂ ਅਨੁਸਾਰ ਜ਼ਿਲ੍ਹਾ ਗੁਰਦਾਸਪੁਰ ’ਚ 18,506 ਟਰੈਕਟਰ ਹਨ ਜਦੋਂ ਕਿ ਜ਼ਿਲ੍ਹਾ ਅੰਮ੍ਰਿਤਸਰ ’ਚ 30,916 ਟਰੈਕਟਰ ਹਨ। ਇਸੇ ਤਰ੍ਹਾਂ ਤਰਨ ਤਾਰਨ ’ਚ 27,349 ਟਰੈਕਟਰ ਹਨ ਅਤੇ ਹੁਸ਼ਿਆਰਪੁਰ ’ਚ 29,452 ਟਰੈਕਟਰ ਹਨ। ਬਹੁਤੇ ਘਰਾਂ ਕੋਲ ਮਾਡੀਫਾਈ ਕੀਤੇ ਟਰੈਕਟਰ ਵੀ ਹਨ। ਵੱਡੇ ਟਾਇਰ ਹੋਣ ਕਰਕੇ ਹੜ੍ਹਾਂ ’ਚ ਇਨ੍ਹਾਂ ਦੀ ਵਧੇਰੇ ਵਰਤੋਂ ਕੀਤੀ ਜਾ ਰਹੀ ਹੈ।

ਬੀਕੇਯੂ (ਸਿਰਸਾ) ਦੇ ਪ੍ਰਧਾਨ ਬਲਦੇਵ ਸਿੰਘ ਸਿਰਸਾ ਨੇ ਅੱਜ ਪਠਾਨਕੋਟ ਜ਼ਿਲ੍ਹੇ ’ਚ ਕਿਹਾ ਕਿ ਜੇ ਟਰੈਕਟਰ ਨਾ ਹੁੰਦੇ ਤਾਂ ਹੜ੍ਹਾਂ ’ਚ ਹੁਣ ਤੱਕ ਬਹੁਤ ਵੱਡਾ ਜਾਨੀ-ਮਾਲੀ ਨੁਕਸਾਨ ਹੋਣਾ ਸੀ। ਟਰੈਕਟਰਾਂ ਸਦਕਾ ਹੀ ਲੋਕਾਂ ਅਤੇ ਪਸ਼ੂ ਧਨ ਨੂੰ ਬਚਾਇਆ ਜਾ ਸਕਿਆ ਹੈ। ਉਨ੍ਹਾਂ ਕਿਹਾ ਕਿ ਨੌਜਵਾਨ ਆਪਣੀ ਜਾਨ ਜੋਖ਼ਮ ’ਚ ਪਾ ਕੇ ਹੜ੍ਹਾਂ ਦੇ ਰਾਹਤ ਕਾਰਜਾਂ ’ਚ ਜੁਟੇ ਹੋਏ ਹਨ ਜਿਨ੍ਹਾਂ ਦੇ ਜਜ਼ਬੇ ਦਾ ਕੋਈ ਜੁਆਬ ਨਹੀਂ ਹੈ।