ਲੜਕੀ ਦੀ ਲਾਸ਼ ਗੁਆਂਢੀ ਦੇ ਗੁਸਲਖਾਨੇ ’ਚੋਂ ਮਿਲੀ
ਘਰ ਤੋਂ ਬਾਹਰ ਖੇਡਣ ਗਈ ਸੀ ਬੱਚੀ; ਪੋਸਟਮਾਰਟਮ ਮਗਰੋਂ ਸਸਕਾਰ ਕੀਤਾ
ਇੱਥੇ ਲੈਦਰ ਕੰਪਲੈਕਸ ਰੋਡ ’ਤੇ ਪਾਰਸ ਅਸਟੇਟ ਵਿੱਚ 14 ਸਾਲਾ ਲੜਕੀ ਦੀ ਲਾਸ਼ ਗੁਆਂਢੀ ਦੇ ਗੁਸਲਖਾਨੇ ’ਚੋਂ ਮਿਲਣ ਕਾਰਨ ਲੰਘੀ ਰਾਤ ਇਲਾਕੇ ਵਿੱਚ ਤਣਾਅ ਵਾਲਾ ਮਾਹੌਲ ਬਣ ਗਿਆ। ਇਹ ਘਟਨਾ ਕੱਲ੍ਹ ਸ਼ਾਮ ਉਦੋਂ ਵਾਪਰੀ, ਜਦੋਂ ਬੱਚੀ ਆਪਣੇ ਘਰ ਤੋਂ ਬਾਹਰ ਖੇਡਣ ਗਈ ਸੀ ਪਰ ਵਾਪਸ ਨਹੀਂ ਆਈ। ਪੀੜਤ ਪਰਿਵਾਰ ਨੇ ਪੁਲੀਸ ਕੋਲ ਲੜਕੀ ਦੀ ਗੁੰਮਸ਼ੁਦਗੀ ਸਬੰਧੀ ਰਿਪੋਰਟ ਦਰਜ ਕਰਵਾਈ ਸੀ। ਇਸ ਮਗਰੋਂ ਸੀ ਸੀ ਟੀ ਵੀ ਫੁਟੇਜ ਸਾਹਮਣੇ ਆਈ ਜਿਸ ਵਿੱਚ ਲੜਕੀ ਆਪਣੇ ਗੁਆਂਢੀ ਦੇ ਘਰ ’ਚ ਦਾਖ਼ਲ ਹੁੰਦੀ ਨਜ਼ਰ ਆਈ ਸੀ। ਪੁਲੀਸ ਨੇ ਮੌਕੇ ਦਾ ਮੁਆਇਨਾ ਕੀਤਾ ਤੇ ਗੁਆਂਢੀ ਦੇ ਘਰ ਦੀ ਕਾਹਲੀ ਵਿੱਚ ਤਲਾਸ਼ੀ ਲੈ ਕੇ ਉਥੋਂ ਚਲੀ ਗਈ। ਮਗਰੋਂ ਗੁਆਂਢੀ ਦੇ ਘਰ ਵਿਚਲੇ ਗੁਸਲਖਾਨੇ ’ਚੋਂ ਲੜਕੀ ਦੀ ਲਾਸ਼ ਬਰਾਮਦ ਹੋਈ। ਲੜਕੀ ਦੇ ਪਰਿਵਾਰ ਨੇ ਦੋਸ਼ ਲਗਾਇਆ ਕਿ ਪੁਲੀਸ ਨੇ ਮਾਮਲੇ ਦੀ ਜਾਂਚ ਦੌਰਾਨ ਅਣਗਹਿਲੀ ਵਰਤੀ। ਸਾਬਕਾ ਵਿਧਾਇਕ ਅਤੇ ਭਾਜਪਾ ਆਗੂ ਸ਼ੀਤਲ ਅੰਗੁਰਾਲ ਨੇ ਦੋਸ਼ ਲਗਾਇਆ ਕਿ ਜੇਕਰ ਪੁਲੀਸ ਸਹੀ ਢੰਗ ਨਾਲ ਕਾਰਵਾਈ ਕਰਦੀ ਤਾਂ ਲੜਕੀ ਨੂੰ ਸੁਰੱਖਿਅਤ ਬਚਾਇਆ ਜਾ ਸਕਦਾ ਸੀ।
ਪੁਲੀਸ ਨੇ ਲੜਕੀ ਦੀ ਲਾਸ਼ ਕਬਜ਼ੇ ਵਿੱਚ ਲੈ ਕੇ ਜਾਂਚ ਵਿੱਢ ਦਿੱਤੀ ਹੈ। ਮੁਲਜ਼ਮ, ਜਿਸ ਦੀ ਉਮਰ 50 ਸਾਲ ਦੱਸੀ ਜਾ ਰਹੀ ਹੈ ਅਤੇ ਦੋ ਬੱਚਿਆਂ ਦਾ ਪਿਤਾ ਹੈ, ਨੂੰ ਬਸਤੀ ਬਾਵਾ ਖੇਲ ਪੁਲੀਸ ਨੇ ਗ੍ਰਿਫ਼ਤਾਰ ਕਰ ਲਿਆ। ਪੁਲੀਸ ਨੂੰ ਗ੍ਰਿਫ਼ਤਾਰੀ ਦੌਰਾਨ ਮੁਲਜ਼ਮ ਨੂੰ ਸਥਾਨਕ ਲੋਕਾਂ ਤੋਂ ਬਚਾਉਣਾ ਪਿਆ। ਏ ਡੀ ਸੀ ਪੀ-1 ਆਕਰਸ਼ੀ ਜੈਨ ਮੌਕੇ ’ਤੇ ਪਹੁੰਚੇ ਅਤੇ ਸਥਿਤੀ ਨੂੰ ਕਾਬੂ ਕਰਨ ਦੀ ਕੋਸ਼ਿਸ਼ ਕੀਤੀ। ਮੁੱਢਲੀ ਜਾਂਚ ਵਿੱਚ ਮੌਤ ਸੰਭਾਵੀ ਤੌਰ ’ਤੇ ਗਲਾ ਘੁੱਟਣ ਕਰ ਕੇ ਹੋਈ ਦੱਸੀ ਜਾ ਰਹੀ ਹੈ ਤੇ ਇਸ ਦੌਰਾਨ ਲੜਕੀ ਦੇ ਸਿਰ ’ਤੇ ਸੱਟ ਦਾ ਵੀ ਪਤਾ ਲੱਗਿਆ ਹੈ। ਹਾਲਾਂਕਿ ਇਹ ਸੱਟ ਡਿੱਗਣ ਨਾਲ ਲੱਗੀ ਹੈ ਜਾਂ ਕਿਸੇ ਹੋਰ ਕਾਰਨ ਨਾਲ ਇਸ ਦਾ ਪਤਾ ਪੋਸਟਮਾਰਟਮ ਰਿਪੋਰਟ ਤੇ ਪੁਲੀਸ ਦੀ ਜਾਂਚ ’ਚ ਹੀ ਲੱਗੇਗਾ। ਜਿਨਸੀ ਹਮਲੇ ਦੀ ਪੁਸ਼ਟੀ ਵੀ ਪੋਸਟਮਾਰਟਮ ਰਿਪੋਰਟ ਤੋਂ ਹੋਵੇਗੀ। ਦੂਜੇ ਪਾਸੇ ਪਰਿਵਾਰ ਨੇ ਪੋਸਟਮਾਰਟਮ ਮਗਰੋਂ ਲੜਕੀ ਦਾ ਸਸਕਾਰ ਕਰ ਦਿੱਤਾ ਹੈ।
ਲਾਪ੍ਰਵਾਹੀ ਵਰਤਣ ’ਤੇ ਏ ਐੱਸ ਆਈ ਮੁਅੱਤਲ
ਪੁਲੀਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਮਾਮਲੇ ਵਿੱਚ ਲਾਪ੍ਰਵਾਹੀ ਏ ਐੱਸ ਆਈ ਮੰਗਤਰਾਮ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ ਅਤੇ ਬਾਕੀ ਦੋਸ਼ਾਂ ਦੀ ਵੀ ਜਾਂਚ ਕੀਤੀ ਜਾਵੇਗੀ।
