ਨਸ਼ੇੜੀ ਨੇ ਘਰ ਨੂੰ ਅੱਗ ਲਾਈ, ਸਾਮਾਨ ਸੜਿਆ
ਮੁਖਤਿਆਰ ਸਿੰਘ ਨੋਗਾਵਾਂ
ਹਲਕਾ ਸਨੌਰ ਦੇ ਪਿੰਡ ਨਗਰ ਵਿੱਚ ਬੀਤੀ ਰਾਤ ਦੋ ਵਜੇ ਦੇ ਕਰੀਬ ਨਸ਼ੇੜੀ ਬਲਵੀਰ ਸਿੰਘ ਸੋਢੀ ਨੇ ਆਪਣੇ ਘਰ ਨੂੰ ਅੱਗ ਲਗਾ ਦਿੱਤੀ। ਫ਼ਾਇਰ ਬ੍ਰਿਗੇਡ ਨੇ ਮੌਕੇ ’ਤੇ ਪਹੁੰਚ ਕੇ ਅੱਗ ’ਤੇ ਕਾਬੂ ਪਾਇਆ। ਮੁਲਜ਼ਮ ਮੌਕੇ ਤੋਂ ਫ਼ਰਾਰ ਹੋ ਗਿਆ। ਮੁਲਜ਼ਮ ਦੀ ਪਤਨੀ ਸੁਨੀਤਾ ਦੇਵੀ ਨੇ ਦੱਸਿਆ ਕਿ ਉਸ ਦਾ ਪਤੀ ਨਸ਼ੇ ਦਾ ਆਦੀ ਹੈ। ਪਹਿਲਾਂ ਵੀ ਉਸ ਨੇ ਘਰ ਨੂੰ ਅੱਗ ਲਗਾਈ ਸੀ। ਅੱਜ ਅੱਗ ਕਾਰਨ ਕਣਕ, ਕੱਪੜੇ, ਰਾਸ਼ਨ, ਜ਼ਰੂਰੀ ਕਾਗ਼ਜ਼, ਅਧਾਰ ਕਾਰਡ, ਬੱਚਿਆਂ ਦੇ ਸਰਟੀਫਿਕੇਟ, ਬੈਂਕ ਦੀ ਕਾਪੀ, ਕੁੱਝ ਨਗਦੀ ਅਤੇ ਹੋਰ ਸਾਮਾਨ ਸੜ ਕੇ ਸੁਆਹ ਹੋ ਗਿਆ।
ਸੁਨੀਤਾ ਦੇਵੀ ਨੇ ਨਸ਼ੇੜੀ ਪਤੀ ਬਲਵੀਰ ਸਿੰਘ ਸੋਢੀ ਨੂੰ ਸਖ਼ਤ ਸਜ਼ਾ ਦੇਣ ਦੀ ਮੰਗ ਕੀਤੀ। ਸੁਨੀਤਾ ਨੇ ਕਿਹਾ ਕਿ ਉਨ੍ਹਾਂ ਦਾ ਜਾਨੀ ਨੁਕਸਾਨ ਵੀ ਹੋ ਸਕਦਾ ਹੈ। ਪਿੰਡ ਵਾਸੀਆਂ ਨੇ ਦੱਸਿਆ ਕਿ ਦੋ ਵਾਰ ਪਹਿਲਾਂ ਵੀ ਇਸ ਨਸ਼ੇੜੀ ਵੱਲੋਂ ਘਰ ’ਚ ਅੱਗ ਲਗਾਈ ਗਈ ਸੀ। ਪਰਿਵਾਰ ਦੀ ਰਿਸਤੇਦਾਰਾਂ ਤੇ ਪਿੰਡ ਵਾਸੀਆਂ ਨੇ ਮਦਦ ਕੀਤੀ ਸੀ। ਸੁਨੀਤਾ ਨੇ ਪ੍ਰਸ਼ਾਸਨ ਅਤੇ ਸਰਕਾਰ ਤੋਂ ਮੁਆਵਜ਼ੇ ਦੀ ਮੰਗ ਕੀਤੀ ਹੈ। ਇਸ ਸਬੰਧੀ ਥਾਣਾ ਸਨੌਰ ਵਿੱਚ ਸ਼ਿਕਾਇਤ ਦਰਜ਼ ਕਰਵਾ ਦਿੱਤੀ ਗਈ ਹੈ।
