ਸੁਧਾਰ ਵਾਸੀ ਹਵਾਈ ਸੈਨਿਕ ਵੱਲੋਂ ਬਰੇਲੀ ਵਿੱਚ ਖ਼ੁਦਕੁਸ਼ੀ

ਲੁਧਿਆਣਾ ਜ਼ਿਲ੍ਹੇ ਦੇ ਕਸਬਾ ਸੁਧਾਰ ਬਾਜ਼ਾਰ (ਨਵੀਂ ਅਬਾਦੀ ਅਕਾਲਗੜ੍ਹ) ਵਾਸੀ ਸ਼ੁਭਮ ਕੁਮਾਰ (25) ਨੇ ਭਾਰਤੀ ਹਵਾਈ ਸੈਨਾ ਕੇਂਦਰ ਬਰੇਲੀ (ਉੱਤਰ ਪ੍ਰਦੇਸ਼) ਵਿੱਚ ਸਰਕਾਰੀ ਪਿਸਤੌਲ ਨਾਲ ਗੋਲੀ ਮਾਰ ਕੇ ਖ਼ੁਦਕੁਸ਼ੀ ਕਰ ਲਈ ਹੈ। ਅੱਜ ਦੇਰ ਸ਼ਾਮ ਮ੍ਰਿਤਕ ਜਵਾਨ ਦਾ ਸਸਕਾਰ ਨਵੀਂ ਅਬਾਦੀ ਅਕਾਲਗੜ੍ਹ ਦੇ ਸ਼ਮਸ਼ਾਨਘਾਟ ਵਿੱਚ ਸਰਕਾਰੀ ਸਨਮਾਨਾਂ ਨਾਲ ਕਰ ਦਿੱਤਾ ਗਿਆ। ਸ਼ੁੱਕਰਵਾਰ ਸ਼ਾਮ ਡਿਊਟੀ ਦੌਰਾਨ ਕਿਸੇ ਨਾਲ ਮੋਬਾਈਲ ਫ਼ੋਨ 'ਤੇ ਗੱਲ ਕਰਦਿਆਂ ਸ਼ੁਭਮ ਕੁਮਾਰ ਨੇ ਆਪਣੇ ਮੱਥੇ ਵਿੱਚ ਗੋਲੀ ਮਾਰ ਕੇ ਜਾਨ ਦੇ ਦਿੱਤੀ ਸੀ। ਸਾਥੀ ਜਵਾਨਾਂ ਵੱਲੋਂ ਤੁਰੰਤ ਉਸ ਨੂੰ ਸੈਨਾ ਦੇ ਹਸਪਤਾਲ ਲਿਜਾਇਆ ਗਿਆ ਜਿੱਥੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ ਗਿਆ। ਮ੍ਰਿਤਕ ਦੇ ਪਿਤਾ ਕਾਕਾ ਰਾਮ ਦੀ ਦੁਕਾਨ ਹਵਾਈ ਸੈਨਾ ਹਲਵਾਰਾ ਦੇ ਅਫ਼ਸਰ ਗੇਟ ਸਾਹਮਣੇ ਹੈ। ਮ੍ਰਿਤਕ ਜਵਾਨ ਸ਼ੁਭਮ ਕੁਮਾਰ ਦੀ ਲਾਸ਼ ਅੱਜ ਸਵੇਰੇ ਹਵਾਈ ਸੈਨਾ ਦੇ ਵਿਸ਼ੇਸ਼ ਜਹਾਜ਼ ਰਾਹੀਂ ਇੱਥੇ ਲਿਆਂਦੀ ਗਈ।

ਸ਼ੁਭਮ ਕੁਮਾਰ ਦਾ ਵੱਡਾ ਭਰਾ ਵਿਪਨ ਕੁਮਾਰ ਥਲ ਸੈਨਾ ਵਿੱਚ ਤਾਇਨਾਤ ਹੈ ਅਤੇ ਉਸ ਦੀ ਤਾਇਨਾਤੀ ਵੀ ਬਰੇਲੀ ਵਿੱਚ ਹੀ ਹੈ। ਵਿਪਨ ਕੁਮਾਰ ਅਨੁਸਾਰ ਖ਼ੁਦਕੁਸ਼ੀ ਤੋਂ ਲਗਪਗ ਅੱਧਾ ਘੰਟਾ ਪਹਿਲਾਂ ਵੀ ਸ਼ੁਭਮ ਕਿਸੇ ਨਾਲ ਫ਼ੋਨ 'ਤੇ ਗੱਲ ਕਰ ਰਿਹਾ ਸੀ ਅਤੇ ਸਾਥੀ ਜਵਾਨਾਂ ਅਨੁਸਾਰ ਉਹ ਪ੍ਰੇਸ਼ਾਨ ਨਜ਼ਰ ਆ ਰਿਹਾ ਸੀ। ਵਿਪਨ ਕੁਮਾਰ ਨੇ ਦੋਸ਼ ਲਾਇਆ ਕਿ ਕੋਈ ਵਿਅਕਤੀ ਉਸ ਦੇ ਛੋਟੇ ਭਰਾ ਨੂੰ ਪ੍ਰੇਸ਼ਾਨ ਕਰ ਰਿਹਾ ਸੀ ਜੋ ਉਸ ਦੀ ਖ਼ੁਦਕੁਸ਼ੀ ਦਾ ਕਾਰਨ ਬਣਿਆ ਹੈ। ਸ਼ੁਭਮ ਘਟਨਾ ਸਮੇਂ ਰੇਡੀਓ ਡਿਊਟੀ 'ਤੇ ਸੀ। ਗੋਲੀ ਦੀ ਆਵਾਜ਼ ਸੁਣ ਕੇ ਉਸ ਦੇ ਸਾਥੀ ਜਵਾਨਾਂ ਨੇ ਮੌਕੇ 'ਤੇ ਪਹੁੰਚ ਕੇ ਖ਼ੂਨ ਨਾਲ ਲੱਥ-ਪੱਥ ਲਾਸ਼ ਦੇਖੀ। ਬਰੇਲੀ ਦੇ ਇੱਜ਼ਤ ਨਗਰ ਥਾਣੇ ਮੁਖੀ ਇੰਸਪੈਕਟਰ ਵਿਜੇਂਦਰ ਸਿੰਘ ਅਨੁਸਾਰ ਪਰਿਵਾਰ ਦੀ ਸ਼ਿਕਾਇਤ ਅਨੁਸਾਰ ਕਾਲ ਡੀਟੇਲ ਅਤੇ ਹੋਰ ਸਬੂਤਾਂ ਅਨੁਸਾਰ ਮੁਕੱਦਮਾ ਦਰਜ ਕੀਤਾ ਜਾਵੇਗਾ।