ਮੰਗਾਂ ਮੰਨਣ ਮਗਰੋਂ ਕੋਟ ਕਰੋੜ ਕਲਾਂ ਟੌਲ ਪਲਾਜ਼ਾ ਤੋਂ ਧਰਨਾ ਚੁੱਕਿਆ

ਕਿਸਾਨ ਜਥੇਬੰਦੀ ਖੋਸਾ ਦੇ ਸੂਬਾ ਸੀਨੀਅਰ ਮੀਤ ਪ੍ਰਧਾਨ ਫ਼ਤਿਹ ਸਿੰਘ ਕੋਟ ਕਰੋੜ ਨੇ ਦੱਸਿਆ ਕਿ ਵਿਭਾਗ ਦੇ ਅਧਿਕਾਰੀਆਂ ਬੀਐੱਸ ਮਹਿਤਾ, ਆਸ਼ੂ ਸ਼ਰਮਾ ਤੇ ਪ੍ਰਿੰਸ ਨਾਲ ਹੋਏ ਸਮਝੌਤੇ ਮੁਤਾਬਕ ਵਿਭਾਗ ਨੇ ਪਿੰਡ ਕੋਟ ਕਰੋੜ ਕਲਾਂ ਦੇ ਸਰਵਿਸ ਰੋਡ ਦਾ ਕੰਮ 16 ਅਗਸਤ ਨੂੰ ਸ਼ੁਰੂ ਕਰ ਦਿੱਤਾ ਹੈ ਤੇ 26 ਜਨਵਰੀ, 2026 ਤੱਕ ਮੁਕੰਮਲ ਕਰਨ ਦਾ ਲਿਖਤੀ ਅਹਿਦ ਕੀਤਾ ਹੈ। ਅਸਫ਼ਲ ਰਹਿਣ ’ਤੇ ਜਥੇਬੰਦੀ ਵੱਲੋਂ ਸੰਘਰਸ਼ ਮੁੜ ਵਿੱਢਿਆ ਜਾਵੇਗਾ।

ਸਮਝੌਤੇ ਨੂੰ ਸਿਰੇ ਚਾੜ੍ਹਨ ਵਿੱਚ ਟੌਲ ਪਲਾਜ਼ਾ ਕਾਮਿਆਂ ਦੇ ਆਗੂ ਸੁਖਜੀਤ ਸਿੰਘ ਖੋਸਾ ਤੇ ਸੰਦੀਪ ਸਿੰਘ ਖੋਸਾ ਨੇ ਅਹਿਮ ਭੂਮਿਕਾ ਨਿਭਾਈ। ਪਲਾਜ਼ਾ ਮੁੜ ਚਾਲੂ ਹੋਣ ਨਾਲ 70 ਕਾਮਿਆਂ ਦੀ ਰੋਜ਼ੀ ਵੀ ਮੁੜ ਤੋਂ ਚਾਲੂ ਹੋ ਗਈ ਹੈ।ਸਮਝੌਤੇ ਮੌਕੇ ਪਿੰਡ ਦੇ ਸਰਪੰਚ ਜਸਵਿੰਦਰ ਸਿੰਘ, ਪੰਚ ਨਵਤੇਜ ਸਿੰਘ, ਜਸਬੀਰ ਸਿੰਘ, ਲਖਵਿੰਦਰ ਸਿੰਘ, ਮੁਖ਼ਤਿਆਰ ਸਿੰਘ, ਨੰਬਰਦਾਰ ਮਨਪ੍ਰੀਤ ਸਿੰਘ, ਜਥੇਬੰਦੀ ਦੇ ਆਗੂ ਸੁਖਮੰਦਰ ਸਿੰਘ, ਚਮਕੌਰ ਸਿੰਘ, ਬਲਦੇਵ ਸਿੰਘ ਤੇ ਜੋਗਿੰਦਰ ਸਿੰਘ ਹਾਜ਼ਰ ਰਹੇ।