ਨੌਜਵਾਨ ਲੜਕੀ ਨੇ ਪਰਿਵਾਰ ਤੋਂ ਵਿਛੜੀ ਅਣਜਾਣ ਬੱਚੀ ਲਈ ਦੇਰ ਰਾਤ ਤੱਕ ਕੀਤਾ ਸੰਘਰਸ਼

ਨਾਭਾ ਦੀ ਇੱਕ ਨੌਜਵਾਨ ਲੜਕੀ ਨੇ ਬੀਤੇ ਦਿਨ ਵੱਡੀ ਹਿੰਮਤ ਦਿਖਾਈ। ਉਸਨੂੰ ਟਰੇਨ ਵਿੱਚ ਮਿਲੀ ਪਰਿਵਾਰ ਤੋਂ ਵਿਛੜੀ ਇੱਕ 6/7 ਸਾਲਾ ਬੱਚੀ ਲਈ ਜਿੱਥੇ ਉਸਨੇ ਕਈ ਘੰਟੇ ਸੰਘਰਸ਼ ਕੀਤਾ, ਉਥੇ ਹੀ ਰਾਤ 12 ਬਜੇ ਤੱਕ ਉਸ ਬੱਚੀ ਦੀ ਪਹਿਰੇਦਾਰੀ ਵੀ ਕੀਤੀ ਤੇ ਉਸਦਾ ਖਿਆਲ ਰਖਿਆ।

ਉਕਤ 26 ਸਾਲਾ ਲੜਕੀ ਨੇ ਆਪਣਾ ਨਾਮ ਮੀਡਿਆ ਵਿੱਚ ਜ਼ਾਹਰ ਨਾ ਕਰਨ ਦੀ ਅਪੀਲ ਕਰਦੇ ਹੋਏ ਦੱਸਿਆ ਕਿ ਉਹ ਦਿੱਲੀ ਨੌਕਰੀ ਕਰਦੀ ਹੈ ਤੇ ਉਹ ਆਪਣੇ ਘਰੇ ਇੱਕ ਸਮਾਗਮ ਵਿੱਚ ਸ਼ਾਮਲ ਹੋਣ ਲਈ ਟਰੇਨ ਰਾਹੀਂ ਵਾਪਸ ਨਾਭੇ ਆ ਰਹੀ ਸੀ। ਪਟਿਆਲਾ ਪਹੁੰਚ ਕੇ ਰਾਤ 8 ਬਜੇ ਰਜਨੀ (ਕਾਲਪਨਿਕ ਨਾਮ) ਨਾਭਾ ਲਈ ਦੂਸਰੀ ਟਰੇਨ ਲਈ, ਤਾਂ ਉਸ ਨੂੰ ਟਰੇਨ ਵਿੱਚ ਆਪਣੇ ਪਰਿਵਾਰ ਤੋਂ ਵਿਛੜੀ ਇੱਕ ਬੱਚੀ ਮਿਲੀ।

ਰਜਨੀ ਮੁਤਾਬਕ ਟਰੇਨ ਵਿੱਚ ਕੋਈ ਧੂਰੀ ਜਾਣ ਵਾਲਾ ਨੌਜਵਾਨ ਮੁਸਾਫ਼ਰ ਬੱਚੀ ਨੂੰ ਆਪਣੇ ਨਾਲ ਲਿਜਾਉਣ ਦਾ ਦਾਅਵਾ ਕਰਨ ਲੱਗਿਆ ਤੇ ਕਹਿਣ ਲੱਗਿਆ ਕਿ ਉਹ ਬੱਚੀ ਨੂੰ ਉਸਦੇ ਪਰਿਵਾਰ ਨਾਲ ਮਿਲਾਉਣ ਲਈ ਹਰ ਹਿੱਲਾ ਕਰੇਗਾ।

ਉਸ ਨੌਜਵਾਨ ਨੂੰ ਸ਼ੱਕੀ ਸਮਝਦੇ ਹੋਏ ਰਜਨੀ ਨੇ ਬੱਚੀ ਨੂੰ ਆਪਣੇ ਹੱਥ ਲੈ ਲਿਆ ਪਰ ਉਹ ਨੌਜਵਾਨ ਵੀ ਨਾਭਾ ਸਟੇਸ਼ਨ ’ਤੇ ਹੀ ਉਤਰ ਗਿਆ। ਇਸ ਮਗਰੋਂ ਰਜਨੀ ਮੁਤਾਬਕ ਜਦੋ ਉਹ ਰੇਲਵੇ ਪੁਲੀਸ ਸਟੇਸ਼ਨ ਵੱਲ ਤੁਰਨ ਲੱਗੀ ਤਾਂ ਉਹ ਨੌਜਵਾਨ ਪੁੱਠੇ ਪੈਰੀ ਮੁੜ ਗਿਆ। ਰਜਨੀ ਨੇ ਦੱਸਿਆ ਕਿ ਜਦੋ ਰੇਲਵੇ ਪੁਲੀਸ ਵੱਲੋਂ ਉਸਨੂੰ ਕੋਈ ਰਾਹ ਨਾ ਮਿਲਿਆ ਤਾਂ ਉਹ ਬੱਚੀ ਨੂੰ ਸਟੇਸ਼ਨ ਦੇ ਸਾਹਮਣੇ ਇੱਕ ਢਾਬੇ ਉੱਪਰ ਲੈ ਗਈ ਤੇ ਉਥੇ ਬੈਠ ਕੇ ਉਸਨੇ ਇੰਟਰਨੈਟ ਤੋਂ ਫੋਨ ਨੰਬਰ ਲੱਭ ਕੇ ਮਦਦ ਮੰਗਣੀ ਸ਼ੁਰੂ ਕੀਤੀ।

ਰਜਨੀ ਨੂੰ ਬਾਲ ਸੁਰੱਖਿਆ ਹੈਲਪਲਾਈਨ ਤੋਂ ਪਟਿਆਲਾ ਜ਼ਿਲ੍ਹਾ ਅਫਸਰ ਦਾ ਨੰਬਰ ਮਿਲਿਆ। ਉਕਤ ਅਫਸਰ ਨੇ ਉਸਨੂੰ ਪੁਲੀਸ ਥਾਣੇ ਜਾਣ ਦੀ ਸਲਾਹ ਦਿੱਤੀ ਪਰ ਰਜਨੀ ਬੱਚੀ ਨੂੰ ਰਾਤ ਸਮੇਂ ਪੁਲੀਸ ਥਾਣੇ ਛੱਡਣ ਤੋਂ ਝਿਜਕ ਗਈ।

ਇਸ ’ਤੇ ਜ਼ਿਲ੍ਹਾ ਬਾਲ ਸੁਰੱਖਿਆ ਅਫਸਰ ਨੇ ਕਿਹਾ ਕਿ ਉਹ ਪਟਿਆਲਾ ਤੋਂ ਇੱਕ ਟੀਮ ਭੇਜ ਰਹੇ ਹਨ। ਇੰਤਜ਼ਾਰ ਦੌਰਾਨ ਰਜਨੀ ਨੂੰ ਇੱਕ ਪੁਲੀਸ ਅਧਿਕਾਰੀ ਦਾ ਵੀ ਫੋਨ ਆਇਆ ਪਰ ਰਜਨੀ ਨੇ ਦੱਸਿਆ ਕਿ ਨਾਭਾ ਸ਼ਹਿਰ ਦਾ ਇਲਾਕਾ ਉਸ ਅਧਿਕਾਰੀ ਦਾ ਅਧਿਕਾਰ ਖੇਤਰ ਨਾ ਹੋਣ ਕਾਰਨ ਉਸ ਪੁਲੀਸ ਅਫਸਰ ਨੇ ਅੱਗੇ ਦਿਲਚਸਪੀ ਨਾ ਲਈ। ਜਦੋ ਰਾਤ 10 ਬਜੇ ਤੱਕ ਪਟਿਆਲਾ ਤੋਂ ਟੀਮ ਪਹੁੰਚਣ ਦੇ ਲਾਰੇ ਲੱਗਦੇ ਰਹੇ ਤਾਂ ਉਸਨੂੰ ਪਰੇਸ਼ਾਨ ਦੇਖ ਰੇਲਵੇ ਸਟੇਸ਼ਨ ਕੋਲ ਸੈਰ ਕਰ ਰਹੇ ਇੱਕ ਰਿਟਾਇਰਡ ਬੈਂਕਰ ਨੇ ਇੱਕ ਸਥਾਨਕ ਪੱਤਰਕਾਰ ਨੂੰ ਵੀ ਮਦਦ ਲਈ ਬੁਲਾਇਆ।

ਰਾਤ 11.15 ਬਜੇ ਰਜਨੀ ਅਤੇ ਉਸ ਪੱਤਰਕਾਰ ਨੇ ਸਾਰਾ ਮਾਮਲਾ ਪਟਿਆਲਾ ਡੀਸੀ ਦੇ ਧਿਆਨ ਵਿੱਚ ਲਿਆਂਦਾ। ਰਜਨੀ ਨੇ ਦੱਸਿਆ ਕਿ ਉਸ ਮਗਰੋਂ 15 ਮਿੰਟ ਵਿੱਚ ਨਾਭਾ ਕੋਤਵਾਲੀ ਤੋਂ ਪੁਲੀਸ ਉਥੇ ਪਹੁੰਚ ਗਈ। ਪਰ ਰਜਨੀ ਕਿਸੇ ਮਹਿਲਾ ਮੁਲਾਜ਼ਮ ਦੀ ਗੈਰ ਮੌਜੂਦਗੀ ਵਿੱਚ ਬੱਚੀ ਸਪੁਰਦ ਕਰਨ ਦੇ ਹੱਕ ਵਿੱਚ ਨਹੀਂ ਸੀ। ਨਾਭਾ ਪੁਲੀਸ ਨੇ ਬਾਲ ਸੁਰੱਖਿਆ ਵਿਭਾਗ ਨਾਲ ਤਾਲਮੇਲ ਕੀਤਾ ਤੇ ਇੱਕ ਮਹਿਲਾ ਹਵਲਦਾਰ ਨੂੰ ਵੀ ਬੁਲਾਇਆ। ਉਸ ਮਹਿਲਾ ਹਵਲਦਾਰ ਸਮੇਤ ਪੁਲੀਸ ਪਾਰਟੀ ਭੇਜ ਕੇ ਬੱਚੀ ਨੂੰ ਪਟਿਆਲਾ ਦੇ ਮਾਤਾ ਕੌਸ਼ਲਿਆ ਹਸਪਤਾਲ ਦੇ ਸ਼ੋਰਟ ਸਟੇ ਹੋਮ ਚ ਭੇਜਿਆ ਗਿਆ। ਤਸੱਲੀ ਹੋਣ ਮਗਰੋਂ ਹੀ ਰਾਤ 12 ਬਜੇ ਦੇ ਕਰੀਬ ਰਜਨੀ ਆਪਣੇ ਘਰ ਨੂੰ ਗਈ।

ਪੀੜਤ ਬੱਚੀ ਕੋਲੋਂ ਉਸਦੇ ਆਪਣੇ ਨਾਮ ਅਤੇ ਉਸਦੇ ਪਿਤਾ ਦੇ ਨਾਮ ਤੋਂ ਇਲਾਵਾ ਹੋਰ ਕੋਈ ਜਾਣਕਾਰੀ ਨਾ ਮਿਲੀ। ਪਟਿਆਲਾ ਜ਼ਿਲ੍ਹਾ ਬਾਲ ਅਧਿਕਾਰੀ ਰੂਪਵੰਤ ਕੌਰ ਨੇ ਦੱਸਿਆ ਕਿ ਰਜਨੀ ਦੇ ਪੁਲੀਸ ਸਟੇਸ਼ਨ ਜਾਣ ਤੋਂ ਇਨਕਾਰ ਮਗਰੋਂ ਉਨ੍ਹਾਂ ਨੇ ਪਟਿਆਲਾ ਤੋਂ ਇੱਕ ਟੀਮ ਭੇਜੀ ਸੀ ਤੇ ਨਾਲ ਹੀ ਰਜਨੀ ਦੀ ਸੁਰੱਖਿਆ ਲਈ ਵੀ ਨਾਭਾ ਬਾਲ ਵਿਕਾਸ ਭਵਨ ਤੋਂ ਇੱਕ ਮਹਿਲਾ ਸੁਪਰਵਾਈਜ਼ਰ ਨੂੰ ਵੀ ਉਸ ਕੋਲ ਭੇਜਿਆ। ਉਨ੍ਹਾਂ ਨੇ ਦੱਸਿਆ ਕਿ ਬੱਚੀ ਵੈਸੇ ਠੀਕ ਸੀ ਪਰ ਘਬਰਾਈ ਹੋਈ ਸੀ ਤੇ ਅੱਜ ਸਵੇਰੇ ਉਸਦੀ ਮੁਢਲੀ ਕੌਂਸਲਿੰਗ ਕੀਤੀ ਗਈ। ਅਜੇ ਉਸਨੂੰ ਆਰਾਮ ਦੇਣ ਲਈ ਜ਼ਿਆਦਾ ਪੁੱਛਗਿੱਛ ਨਹੀਂ ਕੀਤੀ ਗਈ। ਪੁਲੀਸ ਵੀ ਉਸ ਟਰੇਨ ਦੇ ਪਿਛਲੇ ਰੇਲਵੇ ਸਟੇਸ਼ਨਾਂ ਤੋਂ ਗੁਮਸ਼ੁਦਾ ਬੱਚਿਆਂ ਦੀ ਸ਼ਿਕਾਇਤਾਂ ਬਾਰੇ ਪਤਾ ਕਰ ਰਹੀ ਹੈ।