ਪੱਤਿਆਂ ਤੋਂ ਖਾਦ ਬਣਾਉਣ ਦੇ ਪ੍ਰਾਜੈਕਟ ਦਾ ਉਦਘਾਟਨ

ਵਾਤਾਵਰਨ ਸਥਿਰਤਾ ਅਤੇ ਪੱਤਿਆਂ ਦੇ ਕੂੜੇ ਪ੍ਰਬੰਧਨ ਲਈ ਪਟਿਆਲਾ ਫਾਊਂਡੇਸ਼ਨ ਨੇ ਅੱਜ ਸਥਾਨਕ ਬੀਰ ਜੀ ਸ਼ਮਸ਼ਾਨਘਾਟ ਮੈਦਾਨ ਵਿੱਚ ਇੱਕ ਕਮਿਊਨਿਟੀ ‘ਡਰਾਈ ਲੀਫ ਕੰਪੋਸਟਰ’ (ਡੀਐੱਲਸੀ) ਦਾ ਉਦਘਾਟਨ ਕੀਤਾ। ਇਹ ਪਹਿਲਕਦਮੀ ਫਾਊਂਡੇਸ਼ਨ ਦੇ ਵਾਤਾਵਰਨ ਪ੍ਰਾਜੈਕਟ ਪ੍ਰਿਥਵੀ ਦਾ ਹਿੱਸਾ ਹੈ। ਇਸ ਪ੍ਰਾਜੈਕਟ ਦੀ ਸ਼ੁਰੂਆਤ ਕਰਨ ਵੇਲੇ ਪਟਿਆਲਾ ਨਗਰ ਨਿਗਮ ਦੇ ਮੇਅਰ ਕੁੰਦਨ ਗੋਗੀਆ ਵੀ ਮੌਜੂਦ ਸਨ ਤੇ ਉਨ੍ਹਾਂ ਇਸ ਪ੍ਰਾਜੈਕਟ ਦੀ ਸ਼ਲਾਘਾ ਕੀਤੀ। ਇਹ ਵਿਸ਼ੇਸ਼ ਡੀਐੱਲਸੀ ਦੀ ਸਥਾਪਨਾ ਐੱਸਡੀਕੇਐੱਸ ਟਰੱਸਟ ਦੀ ਸਰਪ੍ਰਸਤੀ ਹੇਠ ਕੀਤੀ ਗਈ ਹੈ ਅਤੇ ਜਨ ਸਮਾਲ ਫਾਈਨੈਂਸ ਬੈਂਕ ਲਿਮਟਿਡ ਦੁਆਰਾ ਉਨ੍ਹਾਂ ਦੀ ਸੀਐੱਸਆਰ ਪਹਿਲਕਦਮੀ ਦੇ ਹਿੱਸੇ ਵਜੋਂ ਉਦਾਰਤਾ ਨਾਲ ਸਮਰਥਨ ਪ੍ਰਾਪਤ ਹੈ। ਸ਼ਮਸ਼ਾਨਘਾਟ ਵਿੱਚ ਸਥਾਪਤ ਕੀਤਾ ਗਿਆ ਨਵਾਂ ਕਮਿਊਨਿਟੀ ਡੀਐੱਲਸੀ ਸੁੱਕੇ ਪੱਤਿਆਂ ਦੇ ਸਥਾਈ ਨਿਪਟਾਰੇ ਅਤੇ ਕੰਪੋਸਟਿੰਗ ਲਈ ਇੱਕ ਮਾਡਲ ਵਜੋਂ ਕੰਮ ਕਰੇਗਾ, ਜਿਸ ਨਾਲ ਉਨ੍ਹਾਂ ਨੂੰ ਕੁਦਰਤੀ ਖਾਦ ਵਿੱਚ ਬਦਲਿਆ ਜਾਵੇਗਾ। ਪਟਿਆਲਾ ਫਾਊਂਡੇਸ਼ਨ ਦੇ ਸੀਈਓ ਰਵੀ ਸਿੰਘ ਆਹਲੂਵਾਲੀਆ ਨੇ ਕਿਹਾ ‘ਇਹ ਸਿਰਫ਼ ਇੱਕ ਕੰਪੋਸਟਰ ਨਹੀਂ ਹੈ, ਇਹ ਇੱਕ ਜ਼ਰੂਰੀ ਵਾਤਾਵਰਨ ਮੁੱਦੇ ਦਾ ਕਮਿਊਨਿਟੀ ਹੱਲ ਹੈ।’ ਪਟਿਆਲਾ ਫਾਊਂਡੇਸ਼ਨ ਨੇ ਪਹਿਲਾਂ ਹੀ 100 ਤੋਂ ਵੱਧ ਡੀਐੱਲਸੀ ਘਰਾਂ ਵਿੱਚ ਵੰਡੇ ਹਨ ਅਤੇ ਪਾਰਕਾਂ, ਸ਼ਮਸ਼ਾਨਘਾਟਾਂ ਅਤੇ ਸਕੂਲਾਂ ਵਿੱਚ ਕਈ ਵੱਡੇ ਪੈਮਾਨੇ ਦੇ ਕਮਿਊਨਿਟੀ ਡੀਐੱਲਸੀ ਸਥਾਪਤ ਕੀਤੇ ਹਨ।