ਮਹਿਲਾ ਕਮਿਸ਼ਨ ਨੇ ਨਸਲੀ ਟਿੱਪਣੀ ਲਈ ਯੂਟਿਊਬਰ ਐਲਵਿਸ਼ ਯਾਦਵ ਨੂੰ ਤਲਬ ਕੀਤਾ

ਨਵੀਂ ਦਿੱਲੀ, 14 ਫਰਵਰੀ

ਯੂਟਿਉਬਰ ਐਲਵੀਸ਼ ਯਾਦਵ ਨੂੰ ਮਿਸ ਅਰੁਣਾਚਲ ਅਤੇ ਬਿੱਗ ਬੌਸ ਪ੍ਰਤੀਯੋਗੀ ਚੁਮ ਦਾਰੰਗ ਵਿਰੁੱਧ ਕਥਿਤ ਤੌਰ ’ਤੇ ਨਸਲੀ ਟਿੱਪਣੀ ਕਰਨ ਦੇ ਦੋਸ਼ ਵਿੱਚ ਕੌਮੀ ਮਹਿਲਾ ਕਮਿਸ਼ਨ ਨੇ ਤਲਬ ਕੀਤਾ ਹੈ। ਯਾਦਵ ਨੂੰ ਸੋਮਵਾਰ ਨੂੰ NCW ਸਾਹਮਣੇ ਪੇਸ਼ ਹੋਣ ਲਈ ਕਿਹਾ ਗਿਆ ਹੈ। 11 ਫਰਵਰੀ ਨੂੰ ਅਰੁਣਾਚਲ ਪ੍ਰਦੇਸ਼ ਰਾਜ ਮਹਿਲਾ ਕਮਿਸ਼ਨ (APSCW) ਨੇ ਦਾਰੰਗ ਵਿਰੁੱਧ ਯਾਦਵ ਦੁਆਰਾ ਕੀਤੀਆਂ "ਅਪਮਾਨਜਨਕ ਅਤੇ ਨਸਲੀ" ਟਿੱਪਣੀਆਂ ਦੀ ਸਖ਼ਤ ਨਿੰਦਾ ਕੀਤੀ ।

ਕੌਮੀ ਮਹਿਲਾ ਕਮਿਸ਼ਨ ਦੀ ਚੇਅਰਪਰਸਨ ਨੂੰ ਸੰਬੋਧਿਤ ਇੱਕ ਪੱਤਰ ਵਿੱਚ ਅਰੁਣਾਚਲ ਪ੍ਰਦੇਸ਼ ਮਹਿਲਾ ਕਮਿਸ਼ਨ ਦੀ ਚੇਅਰਪਰਸਨ ਕੇਨਜੁਮ ਪਾਕਮ ਨੇ ਕਿਹਾ ਕਿ ਇਹ ਟਿੱਪਣੀ ਨਾ ਸਿਰਫ਼ ਦਾਰੰਗ ਦਾ ਸਗੋਂ ਉੱਤਰ-ਪੂਰਬੀ ਭਾਰਤ ਦੀਆਂ ਔਰਤਾਂ ਦਾ ਵੀ ਅਪਮਾਨ ਹੈ। ਯਾਦਵ ਨੇ ਬਿੱਗ ਬੌਸ 18 ਦੇ ਪ੍ਰਤੀਯੋਗੀ ਰਜਤ ਦਲਾਲ ਦੇ ਨਾਲ ਇੱਕ ਪੋਡਕਾਸਟ ਵਿੱਚ ਦਾਰੰਗ ਦਾ ਮਜ਼ਾਕ ਉਡਾਇਆ ਸੀ ਅਤੇ ਕਥਿਤ ਤੌਰ 'ਤੇ ਉਸ ਵਿਰੁੱਧ ਨਸਲੀ ਟਿੱਪਣੀਆਂ ਕੀਤੀਆਂ ਸਨ। ਪੀਟੀਆਈ