ਜ਼ਰੂਰੀ ਕੇਸ ਦੋ ਦਿਨਾਂ ਅੰਦਰ ਆਪਣੇ-ਆਪ ਸੂਚੀਬੱਧ ਹੋਣਗੇ

ਸੁਪਰੀਮ ਕੋਰਟ ਦੇ ਚੀਫ ਜਸਟਿਸ ਸੂਰਿਆਕਾਂਤ ਨੇ 1 ਦਸੰਬਰ ਤੋਂ ਕੇਸਾਂ ਦੀ ਸੂਚੀ ਸਰਲ ਤੇ ਕਾਰਗਰ ਬਣਾਉਣ ਲਈ ਕਦਮ ਚੁੱਕੇ ਹਨ ਅਤੇ ਕੇਸਾਂ ਦੀ ਸੂਚੀ ਤੇ ਜ਼ਿਕਰ ਲਈ ਸਰਕੁਲਰ ਜਾਰੀ ਕੀਤੇ ਗਏ ਹਨ। ਸਰਕੁਲਰ ਅਨੁਸਾਰ ਧਿਰਾਂ ਨੂੰ ਕੇਸ ਸੂਚੀਬੱਧ ਕਰਾਉਣ ਲਈ ਬੈਂਚ ਸਾਹਮਣੇ ਇਨ੍ਹਾਂ ਦਾ ਜ਼ਿਕਰ ਕਰਨ ਦੀ ਲੋੜ ਨਹੀਂ ਹੈ ਕਿਉਂਕਿ ਨਵੇਂ ਮਾਮਲੇ ਆਪਣੇ ਆਪ ਸੂਚੀਬੱਧ ਹੋ ਜਾਣਗੇ। ਸਰਕੁਲਰ ਅਨੁਸਾਰ, ‘‘ਵਿਅਕਤੀਆਂ ਦੀ ਆਜ਼ਾਦੀ ਨਾਲ ਜੁੜੇ ਸਾਰੇ ਨਵੇਂ ਮਾਮਲੇ ਅਤੇ ਜਿੱਥੇ ਤੁਰੰਤ ਅੰਤਰਿਮ ਹੁਕਮਾਂ ਦੀ ਮੰਗ ਕੀਤੀ ਜਾਂਦੀ ਹੈ, ਜਿੱਥੇ ਮਾਮਲਿਆਂ ਦੀ ਪੜਤਾਲ ਹੋ ਜਾਂਦੀ ਹੈ ਤੇ ਖਾਮੀਆਂ ਦੂਰ ਕਰ ਲਈਆਂ ਜਾਂਦੀਆਂ ਹਨ, ਨੂੰ ਅਗਲੇ ਦੋ ਕੰਮਕਾਜੀ ਦਿਨਾਂ ਅੰਦਰ ਸੂਚੀਬੱਧ ਕੀਤਾ ਜਾਵੇਗਾ।’’ ਸਰਕੁਲਰ ’ਚ ਕਿਹਾ ਗਿਆ ਹੈ, ‘‘ਸਾਰੀਆਂ ਜ਼ਮਾਨਤ ਪਟੀਸ਼ਨਾਂ ਦੇ ਜਲਦੀ ਨਿਬੇੜੇ ਲਈ ਅਗਾਊਂ ਕਾਪੀ ਸਰਕਾਰੀ ਧਿਰ ਨਾਲ ਸਬੰਧਤ ਨੋਡਲ ਅਫਸਰ/ਸਥਾਈ ਵਕੀਲ ਨੂੰ ਦਿੱਤੀ ਜਾਣੀ ਚਾਹੀਦੀ ਹੈ। ਅਗਾਊਂ ਜ਼ਮਾਨਤ, ਮੌਤ ਦੀ ਸਜ਼ਾ ਜਿਹੇ ਅਸਧਾਰਨ ਤੌਰ ’ਤੇ ਅਤਿ-ਜ਼ਰੂਰੀ ਕੇਸਾਂ ਨਾਲ ਸਬੰਧਤ ਮਾਮਲੇ ਜੋ ਨਿਰਧਾਰਤ ਤਰੀਕ ’ਤੇ ਸੂਚੀਬੱਧ ਹੋਣ ਦੀ ਉਡੀਕ ਨਹੀਂ ਕਰ ਸਕਦੇ, ਸਬੰਧੀ ਮੰਗ ਸਵੇਰੇ 10 ਤੋਂ 10 ਵਜੇ ਵਿਚਾਲੇ ਕੀਤੀ ਜਾ ਸਕਦੀ ਹੈ।’’

ਇਮਾਨਦਾਰੀ ਨਿਆਂ ਤੇ ਸਨਮਾਨ ਕਾਇਮ ਰੱਖਦੀ ਹੈ: ਚੀਫ ਜਸਟਿਸ

ਸੋਨੀਪਤ/ਨਵੀਂ ਦਿੱਲੀ: ਭਾਰਤ ਦੇ ਚੀਫ ਜਸਟਿਸ ਸੂਰਿਆਕਾਂਤ ਨੇ ਅੱਜ ਕਿਹਾ ਕਿ ਇਮਾਨਦਾਰ ਸਿਰਫ਼ ਚਰਿੱਤਰ ਦੀ ਖਾਸੀਅਤ ਨਹੀਂ ਹੈ, ਸਗੋਂ ਇਹ ਅਜਿਹਾ ਅਨੁਸ਼ਾਸਨ ਹੈ, ਜੋ ਨਿਆਂ ਤੇ ਸਨਮਾਨ ਦੋਵਾਂ ਨੂੰ ਕਾਇਮ ਰੱਖਦੀ ਹੈ। ਉਨ੍ਹਾਂ ਓ ਪੀ ਜਿੰਦਲ ਗਲੋਬਲ ਯੂਨੀਵਰਸਿਟੀ ’ਚ ਕੌਮਾਂਤਰੀ ਸੰਮੇਲਨ ਦੌਰਾਨ ਕਾਨੂੰਨ ਦੇ ਵਿਦਿਆਰਥੀਆਂ ਨੂੰ ਕਿਹਾ ਕਿ ਉਹ ਇਮਾਨਦਾਰੀ ਨੂੰ ਆਪਣੇ ਚਰਿੱਤਰ ਦੀ ਮੂਲ ਵਿਸ਼ੇਸ਼ਤਾ ਬਣਾਉਣ। ਚੀਫ ਜਸਟਿਸ ਨੇ ਇਹ ਵੀ ਕਿਹਾ ਕਿ ਕੇਸ਼ਵਾਨੰਦ ਭਾਰਤੀ ਮਾਮਲਾ ਸਿਰਫ਼ ਕਾਨੂੰਨੀ ਮਿਸਾਲ ਨਹੀਂ ਸੀ; ਇਹ ਸੰਵਿਧਾਨਵਾਦ ਤੇ ਕਾਨੂੰਨ ਦੇ ਸ਼ਾਸਨ ਪ੍ਰਤੀ ਭਾਰਤ ਦੀ ਵਚਨਬੱਧਤਾ ਦੀ ਸਭ ਤੋਂ ਵੱਡੀ ਪੁਸ਼ਟੀਆਂ ’ਚੋਂ ਇੱਕ ਸੀ। ਇਸੇ ਤਰ੍ਹਾਂ ਉਨ੍ਹਾਂ ਨਵੀਂ ਦਿੱਲੀ ’ਚ ‘ਆਲ ਇੰਡੀਆ ਜੱਜਿਜ਼ ਬੈਡਮਿੰਟਨ ਚੈਂਪੀਅਨਸ਼ਿਪ’ ਦੇ ਉਦਘਾਟਨੀ ਸਮਾਗਮ ਦੌਰਾਨ ਕਿਹਾ ਕਿ ਜੱਜਾਂ ਦਾ ਕੰਮ ਘੰਟਿਆਂਬੱਧੀ ਲੰਮਾ ਹੋਣ ਦੇ ਨਾਲ ਨਾਲ ਬਹੁਤ ਤਣਾਅ ਵਾਲਾ ਹੁੰਦਾ ਹੈ। ਇਸ ਲਈ ਉਨ੍ਹਾਂ ਨੂੰ ਛੁੱਟੀ ਦੌਰਾਨ ਆਪਣੀ ਉਮਰ ਦੇ ਹਿਸਾਬ ਨਾਲ ਮਨੋਰੰਜਨ ਵਾਲੀਆਂ ਗਤੀਵਿਧੀਆਂ ’ਚ ਹਿੱਸਾ ਲੈਣਾ ਚਾਹੀਦਾ ਹੈ।