ਰਾਹੁਲ ਗਾਂਧੀ ‘ਪਾਰਟ-ਟਾਈਮ’ ਸਿਆਸੀ ਆਗੂ: ਪ੍ਰਹਿਲਾਦ ਜੋਸ਼ੀ

ਕੇਂਦਰੀ ਮੰਤਰੀ ਪ੍ਰਹਿਲਾਦ ਜੋਸ਼ੀ ਨੇ ਸੰਸਦ ਦੇ ਸਰਦ ਰੁੱਤ ਸੈਸ਼ਨ ਦੌਰਾਨ ਲੋਕ ਸਭਾ ਵਿੱਚ ਵਿਰੋਧੀ ਧਿਰ ਦੇ ਨੇਤਾ (ਐੱਲ.ਓ.ਪੀ.) ਰਾਹੁਲ ਗਾਂਧੀ ਦੀ ਜਰਮਨੀ ਫੇਰੀ ਨੂੰ ਲੈ ਕੇ ਉਨ੍ਹਾਂ 'ਤੇ ਨਿਸ਼ਾਨਾ ਸਾਧਿਆ ਹੈ ਅਤੇ ਕਾਂਗਰਸ ਦੇ ਸੰਸਦ ਮੈਂਬਰ ਨੂੰ ‘ਪਾਰਟ-ਟਾਈਮ’ ਸਿਆਸੀ ਆਗੂ ਕਿਹਾ ਹੈ।

ਜੋਸ਼ੀ ਨੇ ਇੱਥੇ ਪੱਤਰਕਾਰਾਂ ਨੂੰ ਕਿਹਾ, "ਰਾਹੁਲ ਗਾਂਧੀ ਹਮੇਸ਼ਾ ਸੰਸਦ ਦੇ ਸੈਸ਼ਨ ਦੌਰਾਨ ਆਪਣਾ ਜ਼ਿਆਦਾਤਰ ਸਮਾਂ ਵਿਦੇਸ਼ਾਂ ਵਿੱਚ ਬਿਤਾਉਂਦੇ ਹਨ ਅਤੇ ਬਾਅਦ ਵਿੱਚ ਕਹਿੰਦੇ ਹਨ ਕਿ ਉਨ੍ਹਾਂ ਨੂੰ ਬੋਲਣ ਦਾ ਮੌਕਾ ਨਹੀਂ ਮਿਲਿਆ। ਇੱਥੋਂ ਤੱਕ ਕਿ ਬਿਹਾਰ ਚੋਣਾਂ ਦੌਰਾਨ ਵੀ ਉਹ ਵਿਦੇਸ਼ ਵਿੱਚ ਸਨ। ਉਹ ਇੱਕ ਪਾਰਟ-ਟਾਈਮ ਹਨ, ਇੱਕ ਗੰਭੀਰ ਸਿਆਸੀ ਆਗੂ ਨਹੀਂ ਹਨ।’’

ਚੋਣ ਕਮਿਸ਼ਨ ਵੱਲੋਂ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਨਾਲ 'ਮਿਲੀਭੁਗਤ' ਕਰਨ ਦੇ ਗਾਂਧੀ ਦੇ ਦੋਸ਼ਾਂ 'ਤੇ ਪ੍ਰਤੀਕਿਰਿਆ ਦਿੰਦਿਆਂ ਕੇਂਦਰੀ ਮੰਤਰੀ ਨੇ ਕਿਹਾ ਕਿ ਕਾਂਗਰਸ ਹਾਰਨ 'ਤੇ ਈ ਵੀ ਐੱਮ ਅਤੇ ਈ ਸੀ ਨੂੰ ਦੋਸ਼ੀ ਠਹਿਰਾਉਂਦੀ ਹੈ।

ਜੋਸ਼ੀ ਨੇ ਕਿਹਾ, "ਮੈਂ ਉਨ੍ਹਾਂ ਨੂੰ ਪੁੱਛਣਾ ਚਾਹੁੰਦਾ ਹਾਂ, ਜਦੋਂ ਤੁਸੀਂ ਕਰਨਾਟਕ ਵਿੱਚ ਜਿੱਤੇ ਸੀ ਤਾਂ ਤੁਸੀਂ ਕੀ ਕਿਹਾ ਸੀ? ਜਦੋਂ ਝਾਰਖੰਡ ਵਿੱਚ 'ਇੰਡੀ' ਗਠਜੋੜ ਜਿੱਤਿਆ ਸੀ, ਜਦੋਂ ਤੁਸੀਂ ਤੇਲੰਗਾਨਾ ਵਿੱਚ ਜਿੱਤੇ ਸੀ, ਤੁਸੀਂ ਕੀ ਕਿਹਾ ਸੀ? ਪਰ ਜਦੋਂ ਤੁਸੀਂ ਹਾਰਦੇ ਹੋ, ਤਾਂ ਤੁਸੀਂ ਈ ਵੀ ਐੱਮ, ਚੋਣ ਕਮਿਸ਼ਨ ਨੂੰ ਦੋਸ਼ ਦਿੰਦੇ ਹੋ। ਉਹ ਕਹਿਣਾ ਚਾਹੁੰਦੇ ਹਨ ਕਿ ਜਦੋਂ ਜਿੱਤ ਹੁੰਦੀ ਹੈ, ਤਾਂ ਇਹ ਉਨ੍ਹਾਂ ਕਰਕੇ ਹੁੰਦੀ ਹੈ, ਪਰ ਜਦੋਂ ਉਹ ਹਾਰਦੇ ਹਨ, ਤਾਂ ਇਹ ਸਿਸਟਮ ਕਰਕੇ ਹੁੰਦਾ ਹੈ।’’

ਕਾਂਗਰਸ ਆਗੂ ਰਾਹੁਲ ਗਾਂਧੀ ਦੀ ਆਉਣ ਵਾਲੀ ਬਰਲਿਨ ਫੇਰੀ ਨੇ ਇੱਕ ਨਵਾਂ ਸਿਆਸੀ ਤੂਫਾਨ ਖੜ੍ਹਾ ਕਰ ਦਿੱਤਾ ਹੈ, ਜਿਸ ਵਿੱਚ ਭਾਜਪਾ ਨੇ ਸੰਸਦ ਦੇ ਮਹੱਤਵਪੂਰਨ ਸਰਦ ਰੁੱਤ ਸੈਸ਼ਨ ਦੇ ਚੱਲਦਿਆਂ ਵੀ ਉਨ੍ਹਾਂ ਦੇ ਵਿਦੇਸ਼ ਜਾਣ ਲਈ ਆਲੋਚਨਾ ਕੀਤੀ ਹੈ।