ਪੁਣੇ: ਸੜਕ ਹਾਦਸੇ ’ਚ ਦੋ ਵਿਦਿਆਰਥੀ ਹਲਾਕ; ਦੋ ਜ਼ਖ਼ਮੀ

ਪੁਲੀਸ ਨੇ ਦੱਸਿਆ ਕਿ ਇਹ ਹਾਦਸਾ ਹਾਈਵੇਅ ਦੇ ਨਾਲ ਦੇਹੂ ਰੋਡ ਕੋਲ ਈਦਗਾਹ ਮੈਦਾਨ ਨੇੜੇ ਸਵੇਰੇ 5.45 ਵਜੇ ਵਾਪਰਿਆ, ਜਦੋਂ ਚਾਰੇ ਵਿਦਿਆਰਥੀ ਲੋਨਾਵਾਲਾ ਹਿੱਲ ਸਟੇਸ਼ਨ ਤੋਂ ਵਾਪਸ ਆ ਰਹੇ ਸਨ।

ਦੇਹੂ ਰੋਡ ਪੁਲੀਸ ਸਟੇਸ਼ਨ ਦੇ ਇੱਕ ਅਧਿਕਾਰੀ ਨੇ ਦੱਸਿਆ ਕਿ ਕਾਰ ਨੇ ਪਿੱਛੇ ਤੋਂ ਇੱਕ ਕੰਟੇਨਰ ਟਰੱਕ ਨੂੰ ਟੱਕਰ ਮਾਰ ਦਿੱਤੀ।

ਇਹ ਚਾਰੇ Symbiosis ਕਾਲਜ ਦੇ ਬੀਬੀਏ ਵਿਦਿਆਰਥੀ ਸਨ ਅਤੇ ਸੈਰ-ਸਪਾਟੇ ਲਈ ਲੋਨਾਵਾਲਾ ਗਏ ਸਨ। ਉਨ੍ਹਾਂ ਕਿਹਾ ਕਿ ਇਹ ਹਾਦਸਾ ਪੁਣੇ ਵਾਪਸ ਆਉਂਦੇ ਸਮੇਂ ਵਾਪਰਿਆ।

ਅਧਿਕਾਰੀ ਨੇ ਦੱਸਿਆ, ‘ਟੱਕਰ ਕਾਰਨ ਦਿਵਿਆ ਰਾਜ ਸਿੰਘ ਰਾਠੌੜ (20) ਅਤੇ ਸਿਧਾਂਤ ਆਨੰਦ ਸ਼ੇਖਰ (20) ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ, ਜਦੋਂ ਕਿ ਦੋ ਹੋਰ - ਹਰਸ਼ ਮਿਸ਼ਰਾ (21) ਅਤੇ ਨਿਹਾਰ ਤਾਂਬੋਲੀ (20) - ਨੂੰ ਮਾਮੂਲੀ ਸੱਟਾਂ ਲੱਗੀਆਂ। ਜ਼ਖਮੀਆਂ ਨੂੰ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਹੈ।’’

ਅਧਿਕਾਰੀ ਨੇ ਕਿਹਾ ਕਿ ਪੁਲੀਸ ਨੇ ਟਰੱਕ ਡਰਾਈਵਰ, ਜਿਸ ਦੀ ਪਛਾਣ ਮਨੀਸ਼ ਕੁਮਾਰ ਸੂਰਜ ਮਨੀਪਾਲ (39), ਮੁੰਬਈ ਦੇ ਵਡਾਲਾ ਨਿਵਾਸੀ ਵਜੋਂ ਹੋਈ ਹੈ, ਨੂੰ ਹਿਰਾਸਤ ਵਿੱਚ ਲੈ ਲਿਆ ਹੈ ਅਤੇ ਘਟਨਾ ਦੀ ਜਾਂਚ ਜਾਰੀ ਹੈ।