Mushtaq Khan's Kidnappers also planned to abduct Shakti Kapoor: ਅਦਾਕਾਰ ਸ਼ਕਤੀ ਕਪੂਰ ਨੂੰ ਅਗਵਾ ਕਰਨ ਦੀ ਫ਼ਿਰਾਕ ਵਿਚ ਸਨ ਮੁਸ਼ਤਾਕ ਖ਼ਾਨ ਦੇ ਕਿਡਨੈਪਰ

ਅਦਾਕਾਰ ਮੁਸ਼ਤਾਕ ਮੁਹੰਮਦ ਖ਼ਾਨ ਨੂੰ ਦਿੱਲੀ ਹਵਾਈ ਅੱਡੇ ਤੋਂ ਅਗਵਾ ਕਰਨ, ਯੂਪੀ ਦੇ ਬਿਜਨੌਰ ਜ਼ਿਲ੍ਹੇ ਵਿਚ ਬੰਦੀ ਬਣਾ ਕੇ ਰੱਖਣ ਤੇ ਫਿਰੌਤੀ ਮੰਗਣ ਦੇ ਮਾਮਲੇ ਵਿਚ ਗਰੋਹ ਦੇ ਚਾਰ ਮੈਂਬਰਾਂ ਨੂੰ ਗ਼੍ਰਿਫ਼ਤਾਰ ਕੀਤਾ ਗਿਆ ਹੈ। ਪੁਲੀਸ ਮੁਤਾਬਕ ਗਰੋਹ ਦੇ ਮੈਂਬਰ ਬੌਲੀਵੁੱਡ ਅਦਾਕਾਰ ਸ਼ਕਤੀ ਕਪੂਰ ਨੂੰ ਵੀ ਅਗਵਾ ਕਰਨ ਦੀ ਯੋਜਨਾ ਘੜੀ ਬੈਠੇ ਸਨ। ਕਪੂਰ ਨੂੰ ਵੀ ਇਕ ਸਮਾਗਮ ਦੇ ਬਹਾਨੇ ਸੱਦਿਆ ਜਾਣਾ ਸੀ। ਗ੍ਰਿਫ਼ਤਾਰ ਕੀਤੇ ਗਰੋਹ ਦੇ ਮੈਂਬਰਾਂ ਦੀ ਪਛਾਣ ਸਾਰਥਕ ਚੌਧਰੀ, ਸਬੀਉਦਦੀਨ, ਅਜ਼ੀਮ ਤੇ ਸ਼ਸ਼ਾਂਕ ਵਜੋਂ ਹੋਈ ਹੈ। ਪੁਲੀਸ ਨੇ ਇਨ੍ਹਾਂ ਕੋਲੋਂ 1.04 ਲੱਖ ਰੁਪਏ ਵੀ ਬਰਾਮਦ ਕੀਤੇ ਹਨ। ਪੁਲੀਸ ਮੁਤਾਬਕ ਇਹ ਗਰੋਹ ਫ਼ਿਲਮੀ ਸਿਤਾਰਿਆਂ ਨੂੰ ਕਿਸੇ ਸਮਾਗਮ ਦੇ ਸੱਦੇ ਦੀ ਆੜ ਵਿਚ ਐਡਵਾਂਸ ਅਦਾਇਗੀ ਤੇ ਹਵਾਈ ਟਿਕਟਾਂ ਭੇਜ ਕੇ ਅਗਵਾ ਕਰਨ ਦੇ ਧੰਦੇ ਵਿਚ ਸ਼ਾਮਲ ਸੀ। ਜਾਂਚ ਦੌਰਾਨ ਪਤਾ ਲੱਗਾ ਹੈ ਕਿ ਗਰੋਹ ਨੇ ਅਦਾਕਾਰ ਸ਼ਕਤੀ ਕਪੂਰ ਨੂੰ ਵੀ ਅਜਿਹੇ ਇਕ ਮਿਲਦੇ ਜੁਲਦੇ ਸਮਾਗਮ ਵਿਚ ਸ਼ਮੂਲੀਅਤ ਲਈ 5 ਲੱਖ ਰੁਪਏ ਦੀ ਪੇਸ਼ਕਸ਼ ਕੀਤੀ ਸੀ, ਪਰ ਐਡਵਾਂਸ ਵਿਚ ਵੱਧ ਰਕਮ ਮੰਗਣ ਕਰਕੇ ਡੀਲ ਸਿਰੇ ਨਹੀਂ ਚੜ੍ਹ ਸਕੀ। ਪੁਲੀਸ ਹੁਣ ਇਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ ਕਿ ਇਹ ਗਰੋਹ ਕਿਤੇ ਹੋਰਨਾਂ ਫ਼ਿਲਮੀ ਸਿਤਾਰਿਆਂ ਨੂੰ ਅਗਵਾ ਕਰਨ ਦੇ ਮਾਮਲੇ ਵਿਚ ਤਾਂ ਸ਼ਾਮਲ ਨਹੀਂ ਸੀ। ਲਵੀ ਸਣੇ ਗਰੋਹ ਦੇ ਹੋਰਨਾਂ ਮੈਂਬਰਾਂ ਦੀ ਪੈੜ ਨੱਪਣ ਲਈ ਯਤਨ ਜਾਰੀ ਹਨ।