ਭਾਰਤ ਦੀ ਵਿਕਾਸ ਦਰ ਦੂਜੀ ਤਿਮਾਹੀ ਵਿੱਚ 8.2 ਫੀਸਦੀ

ਭਾਰਤ ਦੀ ਵਿਕਾਸ ਦਰ ਵਿੱਤੀ ਵਰ੍ਹੇ 2025-26 ਦੀ ਦੂਜੀ ਤਿਮਾਹੀ ’ਚ ਆਸ ਨਾਲੋਂ ਵੱਧ 8.2 ਫ਼ੀਸਦ ਦਰਜ ਕੀਤੀ ਗਈ ਹੈ, ਜੋ ਪਿਛਲੀਆਂ ਛੇ ਤਿਮਾਹੀਆਂ ’ਚ ਸਭ ਤੋਂ ਵੱਧ ਹੈ। ਇਸ ਨਾਲ ਭਾਰਤ ਨੂੰ ਦੁਨੀਆ ਦੇ ਸਭ ਤੋਂ ਤੇਜ਼ੀ ਨਾਲ ਵਧਦੇ ਮੁੱਖ ਅਰਥਚਾਰਿਆਂ ਵਜੋਂ ਆਪਣੀ ਸਥਿਤੀ ਕਾਇਮ ਰੱਖਣ ’ਚ ਮਦਦ ਮਿਲੀ ਹੈ। ਵਿੱਤੀ ਵਰ੍ਹੇ ਦੇ ਪਹਿਲੇ ਅੱਧ ’ਚ 8 ਫ਼ੀਸਦ ਵਿਕਾਸ ਦਰ ਰਹਿਣ ਨਾਲ ਭਾਰਤ ਦੀ ਸਾਲਾਨਾ ਵਿਕਾਸ ਦਰ ਵਿੱਤੀ ਵਰ੍ਹੇ 2026 ’ਚ 6.3-6.8 ਫ਼ੀਸਦ ਦੇ ਟੀਚੇ ਤੋਂ ਵੱਧ ਰਹਿ ਸਕਦੀ ਹੈ। ਖੇਤੀ ਸੈਕਟਰ ’ਚ ਵਿਕਾਸ ਦਰ ਡਿੱਗ ਕੇ 3.5 ਫ਼ੀਸਦ ਰਹੀ, ਜਦਕਿ ਇਕ ਸਾਲ ਪਹਿਲਾਂ ਇਸੇ ਵਕਫ਼ੇ ਦੌਰਾਨ ਇਹ 4.1 ਫ਼ੀਸਦ ਦਰਜ ਹੋਈ ਸੀ।

ਜੀ ਐੱਸ ਟੀ ਦਰਾਂ ’ਚ ਕਟੌਤੀ ਨਾਲ ਖਪਤ ’ਚ ਵਾਧਾ ਹੋਇਆ ਅਤੇ ਫੈਕਟਰੀਆਂ ’ਚ ਉਤਪਾਦਨ ਵਧਿਆ ਜਿਸ ਕਾਰਨ ਖੇਤੀ ਉਤਪਾਦਨ ’ਚ ਮੰਦੀ ਦੀ ਭਰਪਾਈ ਕਰਨ ’ਚ ਸਹਾਇਤਾ ਮਿਲੀ। ਸਾਲ ਪਹਿਲਾਂ ਇਸੇ ਸਮੇਂ ਦੌਰਾਨ ਵਿਕਾਸ ਦਰ 5.6 ਫ਼ੀਸਦ ਦਰਜ ਹੋਈ ਸੀ ਅਤੇ ਬੀਤੇ ਤਿੰਨ ਮਹੀਨਿਆਂ ’ਚ ਇਹ 7.8 ਫ਼ੀਸਦ ਰਹੀ ਸੀ। ਅਰਥਸ਼ਾਸਤਰੀਆਂ ਨੇ ਕਿਹਾ ਸੀ ਕਿ ਤਿਉਹਾਰਾਂ ਤੋਂ ਪਹਿਲਾਂ ਇਸ ਸਬੰਧੀ ਗਤੀਵਿਧੀਆਂ ਨੂੰ ਹੁਲਾਰਾ ਮਿਲੇਗਾ। ਭਾਰਤ ਨੇ 22 ਸਤੰਬਰ ਤੋਂ ਜ਼ਿਆਦਾਤਰ ਵਸਤੂਆਂ ’ਤੇ ਵਸਤੂਆਂ ਅਤੇ ਸੇਵਾਵਾਂ ਟੈਕਸ ਦੀਆਂ ਦਰਾਂ ਘਟਾ ਦਿੱਤੀਆਂ ਹਨ, ਜਿਸ ਨਾਲ ਦੁਨੀਆ ਦੀ ਪੰਜਵੀਂ ਸਭ ਤੋਂ ਵੱਡੀ ਅਰਥਵਿਵਸਥਾ ਵਿੱਚ ਖਪਤ ਨੂੰ ਹੁਲਾਰਾ ਮਿਲਣ ਦੀ ਉਮੀਦ ਹੈ। 22 ਸਤੰਬਰ ਤੋਂ ਮੁੱਖ ਵਸਤੂਆਂ ’ਤੇ GST ਕਟੌਤੀਆਂ ਲਾਗੂ ਹੋਣ ਤੋਂ ਪਹਿਲਾਂ ਹੀ ਦੂਜੀ ਤਿਮਾਹੀ ਵਿੱਚ ਘਰੇਲੂ ਉਤਪਾਦਾਂ ਦੀ ਮੰਗ ਮੁੜ ਵਧ ਗਈ ਸੀ। ਪੀਟੀਆਈ