ਸੋਨਾ ਚੋਰੀ ਮਾਮਲਾ: ਸਬਰੀਮਾਲਾ ਮੰਦਰ ਦਾ ਸਾਬਕਾ ਕਾਰਜਕਾਰੀ ਅਧਿਕਾਰੀ ਗ੍ਰਿਫ਼ਤਾਰ

ਸੂਤਰਾਂ ਨੇ ਦੱਸਿਆ ਕਿ ਕੁਮਾਰ, ਜਿਸ ਨੇ 2019 ਵਿੱਚ ਇਸ ਪਹਾੜੀ ਅਸਥਾਨ ਦੇ ਕਾਰਜਕਾਰੀ ਅਧਿਕਾਰੀ ਵਜੋਂ ਸੇਵਾ ਨਿਭਾਈ ਸੀ, ਨੂੰ ਤਿਰੂਵਨੰਤਪੁਰਮ ਸਥਿਤ ਕ੍ਰਾਈਮ ਬ੍ਰਾਂਚ ਦੇ ਦਫ਼ਤਰ ਵਿੱਚ ਪੁੱਛਗਿੱਛ ਤੋਂ ਬਾਅਦ ਗ੍ਰਿਫ਼ਤਾਰ ਕੀਤਾ ਗਿਆ।

ਉਸ 'ਤੇ ਦੋਸ਼ ਹੈ ਕਿ ਉਸ ਨੇ ਦੁਆਰਪਾਲਕਾ (ਗਾਰਡੀਅਨ ਦੇਵਤਾ) ਦੀਆਂ ਮੂਰਤੀਆਂ ’ਤੇ ਸੋਨੇ ਦੀ ਪਰਤ ਵਾਲੀਆਂ ਹੋਣ ਦੀ ਗੱਲ ਨੂੰ ਲੁਕਾਇਆ ਅਤੇ ਇਸ ਦੀ ਬਜਾਏ ਮੰਦਰ ਦੇ ਅਧਿਕਾਰਤ ਦਸਤਾਵੇਜ਼ਾਂ ਵਿੱਚ ਉਨ੍ਹਾਂ ਨੂੰ ਤਾਂਬੇ ਦੀਆਂ ਚਾਦਰਾਂ ਵਜੋਂ ਦਰਜ ਕੀਤਾ।

ਸੂਤਰਾਂ ਨੇ ਦੱਸਿਆ ਕਿ ਕੁਮਾਰ 1990 ਦੇ ਦਹਾਕੇ ਤੋਂ ਸਬਰੀਮਾਲਾ ਨਾਲ ਜੁੜਿਆ ਹੋਇਆ ਸੀ ਅਤੇ ਉਹ ਜਾਣਦਾ ਸੀ ਕਿ 1998-99 ਦੌਰਾਨ ਦੁਆਰਪਾਲਕਾ ਦੀਆਂ ਮੂਰਤੀਆਂ ਸਮੇਤ ਗਰਭ-ਗ੍ਰਹਿ (sanctum sanctorum) ’ਤੇ ਸੋਨੇ ਦੀ ਪਰਤ ਚੜ੍ਹਾਈ ਗਈ ਸੀ।

ਇੱਕ ਅਧਿਕਾਰੀ ਨੇ ਦੱਸਿਆ ਕਿ ਹਾਲਾਂਕਿ, ਜਦੋਂ ਦੁਆਰਪਾਲਕਾ ਦੀਆਂ ਪਲੇਟਾਂ ਨੂੰ 2019 ਵਿੱਚ ਸੋਨੇ ਦੀ ਪਲੇਟਿੰਗ ਲਈ ਮੁੱਖ ਦੋਸ਼ੀ ਉੱਨੀਕ੍ਰਿਸ਼ਨਨ ਨੂੰ ਸੌਂਪਿਆ ਗਿਆ ਸੀ, ਤਾਂ ਕੁਮਾਰ ਨੇ ਕਥਿਤ ਤੌਰ ’ਤੇ ਉਨ੍ਹਾਂ ਨੂੰ ਤਾਂਬੇ ਦੀਆਂ ਪਲੇਟਾਂ ਵਜੋਂ ਦਸਤਾਵੇਜ਼ਬੱਧ ਕੀਤਾ, ਜਿਸ ਨਾਲ ਦੋਸ਼ੀ ਨੂੰ ਬਾਅਦ ਵਿੱਚ ਮੌਜੂਦਾ ਸੋਨੇ ਦੀ ਪਰਤ ਨੂੰ ਹਟਾਉਣ ਦੇ ਯੋਗ ਬਣਾਇਆ ਗਿਆ।

ਉਹ ਇਸ ਮਾਮਲੇ ਵਿੱਚ ਗ੍ਰਿਫ਼ਤਾਰ ਹੋਣ ਵਾਲਾ ਤੀਜਾ ਵਿਅਕਤੀ ਹੈ, ਉਸ ਤੋਂ ਪਹਿਲਾਂ ਉੱਨੀਕ੍ਰਿਸ਼ਨਨ ਅਤੇ ਸਾਬਕਾ ਪ੍ਰਬੰਧਕੀ ਅਧਿਕਾਰੀ ਬੀ ਮੁਰਾਰੀ ਬਾਬੂ ਨੂੰ ਗ੍ਰਿਫ਼ਤਾਰ ਕੀਤਾ ਜਾ ਚੁੱਕਾ ਹੈ।

ਅਧਿਕਾਰੀਆਂ ਨੇ ਦੱਸਿਆ ਕਿ ਕੁਮਾਰ ਨੂੰ ਬਾਅਦ ਵਿੱਚ ਜੁਡੀਸ਼ੀਅਲ ਫਸਟ ਕਲਾਸ ਮੈਜਿਸਟ੍ਰੇਟ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ। ਪੀਟੀਆਈ