Flash Flood: ਜੰਮੂ ਕਸ਼ਮੀਰ ਦੇ ਰਾਮਬਨ ’ਚ ਦੋ ਅਧਿਆਪਕਾਂ ਦੀ ਮੌਤ

ਪੁਲੀਸ ਮੁਤਾਬਕ ਮ੍ਰਿਤਕਾਂ ਦੀ ਪਛਾਣ ਊਧਮਪੁਰ ਦੇ ਰਾਮਨਗਰ ਸਥਿਤ ਪਿੰਡ ਘੋਰੜੀ ਜਗਦੇਵ ਸਿੰਘ (37) ਅਤੇ ਸੰਜੈ ਕੁਮਾਰ (39) ਵਜੋਂ ਹੋਈ ਹੈ। ਪੁਲੀਸ ਨੇ ਦੱਸਿਆ ਕਿ ਦੋਵੇਂ ਅਧਿਆਪਕ ਮੰਗਲਵਾਰ ਨੂੰ ਮੋਟਰਸਾਈਕਲ ’ਤੇ ਸਵਾਰ ਸਨ ਅਤੇ ਨਾਥਾਟੌਪ ਨੇੜੇ ਪਹਾੜ ਤੋਂ ਨਿਕਲਣ ਵਾਲੇ ਪਾਣੀ ਦੇ ਤੇਜ਼ ਵਹਾਅ ’ਚ ਰੁੜ ਗਏ। ਦੋਵਾਂ ਦੀ ਲਾਸ਼ਾਂ ਅੱਜ ਘਟਨਾ ਸਥਾਨ ਤੋਂ 300 ਮੀਟਰ ਥੱਲਿਓਂ ਲਿੰਕ ਸੜਕ ਨੇੜਿਓਂ ਮਿਲੀਆਂ ਹਨ।

ਪੁਲੀਸ ਅਨੁਸਾਰ ਮੁੱਢਲੀ ਜਾਂਚ ਪੜਤਾਲ ਦੌਰਾਨ ਪਤਾ ਲੱਗਿਆ ਹੈ ਕਿ ਦੋਵੇਂ ਅਧਿਆਪਕ ਮੰਗਲਵਾਰ ਸਵੇਰੇ ਜ਼ਿਲ੍ਹਾ ਸਿੱਖਿਆ ਅਤੇ ਸਿਖਲਾਈ ਸੰਸਥਾ ਕੁੰਡ ਵਿੱਚ ਤਿੰਨ ਰੋਜ਼ਾ ਸਿਖਲਾਈ ਪ੍ਰੋਗਰਾਮ ’ਚ ਹਿੱਸਾ ਲੈਣ ਪਹੁੰਚੇ ਸੀ। ਪਹਿਲੇ ਦਿਨ ਦੇ ਕੋਰਸ ਤੋਂ ਬਾਅਦ ਦੋਵੇਂ ਸ਼ਾਮ ਨੂੰ ਭਾਰੀ ਮੀਂਹ ਦੌਰਾਨ ਮੋਟਰਸਾਈਕਲ ’ਤੇ ਰਵਾਨਾ ਹੋਏ ਪਰ ਨਾਥਾਟੌਪ ਸਨਾਸਰ ਮਾਰਗ ’ਤੇ ਅਚਾਨਕ ਆਏ ਹੜ੍ਹ ਦੀ ਲਪੇਟ ’ਚ ਆ ਗਏ।

ਇੱਕ ਪਿੰਡ ਵਾਸੀ ਨੇ ਅੱਜ ਸਵੇਰੇ ਜਲੇਬੀ ਮੋੜ ’ਤੇ ਮੋਟਰਸਾਈਕਲ ਡਿੱਗਿਆ ਦੇਖਿਆ, ਜਿਸ ਮਗਰੋਂ ਤਲਾਸ਼ੀ ਅਤੇ ਬਚਾਅ ਮੁਹਿੰਮ ਸ਼ੁਰੂ ਕੀਤੀ ਗਈ ਸੀ।