ਉਡੀਸਾ ਵਿੱਚ ਜੋੜੇ ਨੇ ਸੰਵਿਧਾਨ ਦੀ ਸਹੁੰ ਚੁੱਕ ਕੇ ਵਿਆਹ ਕਰਵਾਇਆ

ਉਡੀਸਾ ਦੇ ਬ੍ਰਹਮਪੁਰ ਵਿੱਚ ਇੱਕ ਜੋੜੇ ਨੇ ਅਨੋਖੇ ਢੰਗ ਨਾਲ ਵਿਆਹ ਕਰਵਾਇਆ ਹੈ। ਨਵ-ਵਿਆਹੇ ਜੋੜੇ ਨੇ ਪਹਿਲਾਂ ਸੰਵਿਧਾਨ ਦੀ ਸਹੁੰ ਚੁੱਕੀ ਅਤੇ ਫਿਰ ਖੂਨਦਾਨ ਕੀਤਾ। ਉਨ੍ਹਾਂ ਵਿਆਹ ਵਿੱਚ ਆਏ ਮਹਿਮਾਨਾਂ ਨੂੰ ਵੀ ਅਜਿਹਾ ਕਰਨ ਦੀ ਅਪੀਲ ਕੀਤੀ। ਜਾਣਕਾਰੀ ਅਨੁਸਾਰ ਪ੍ਰੀਤੀਪੰਨਾ ਮਿਸ਼ਰਾ (40) ਅਤੇ ਬੀ ਭਾਨੂ ਤੇਜਾ (43) ਦੇ ਵਿਆਹ ਦੀਆਂ ਰਸਮਾਂ ਸ਼ੁੱਕਰਵਾਰ ਨੂੰ ਹੋਈਆਂ ਸਨ। ਵਿਆਹ ਸਮਾਗਮ ਵਿੱਚ ਨਵ-ਵਿਆਹੇ ਜੋੜੇ ਤੋਂ ਇਲਵਾ ਕਈ ਮਹਿਮਾਨਾਂ ਨੇ ਵੀ ਖੂਨਦਾਨ ਕੀਤਾ। ਇਸ ਦੌਰਾਨ ਕੁੱਲ 18 ਯੂਨਿਟ ਖੂਨ ਇਕੱਠਾ ਕੀਤਾ ਗਿਆ।

ਪ੍ਰੀਤੀਪੰਨਾ ਬ੍ਰਹਮਪੁਰ ਦੀ ਰਹਿਣ ਵਾਲੀ ਹੈ ਅਤੇ ਹੈਦਰਾਬਾਦ ਦੀ ਕੰਪਨੀ ਵਿੱਚ ਸਿਸਟਮ ਐਨਾਲਿਸਟ ਵਜੋਂ ਕੰਮ ਕਰਦੀ ਹੈ ਜਦਕਿ ਤੇਜਾ ਆਂਧਰਾ ਪ੍ਰਦੇਸ਼ ਦੇ ਕਾਕੀਨਾਡਾ ਦਾ ਵਸਨੀਕ ਹੈ ਅਤੇ ਬੰਗਲੁਰੂ ਦੀ ਇੱਕ ਕੰਪਨੀ ਵਿੱਚ ਵਿਗਿਆਨੀ ਹੈ। ਕੁਝ ਸਾਲ ਪਹਿਲਾਂ ਤੇਲੰਗਾਨਾ ਦੀ ਰਾਜਧਾਨੀ ਹੈਦਰਾਬਾਦ ਵਿੱਚ ਇੱਕ ਸੈਮੀਨਾਰ ਦੌਰਾਨ ਦੋਵਾਂ ਦੀ ਮੁਲਾਕਾਤ ਹੋਈ ਸੀ। ਪ੍ਰੀਤੀਪੰਨਾ ਨੇ ਆਸ ਪ੍ਰਗਟਾਈ ਕਿ ਉਨ੍ਹਾਂ ਦਾ ਵਿਆਹ ਦੂਜਿਆਂ ਨੂੰ ਵੀ ਪ੍ਰੇਰਿਤ ਕਰੇਗਾ।