ਪੁਰਸ਼ ਦੋਸਤ ਦੇ ਕਹਿਣ ’ਤੇ ਮਹਿਲਾ ਹੋਸਟਲ ਦੇ ਬਾਥਰੂਮ ’ਚ ਲਾਇਆ ਕੈਮਰਾ
ਇੱਕ ਕੰਪਨੀ ਦੇ ਮਹਿਲਾ ਹੋਸਟਲ ਦੇ ਬਾਥਰੂਮ ਵਿੱਚ ਕੈਮਰਾ ਲਗਾਉਣ ਦੇ ਦੋਸ਼ ਵਿੱਚ ਇੱਕ ਔਰਤ ਅਤੇ ਉਸਦੇ ਇੱਕ ਪੁਰਸ਼ ਦੋਸਤ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਪੁਲੀਸ ਨੇ ਦੱਸਿਆ ਕਿ ਕ੍ਰਿਸ਼ਨਾਗਿਰੀ ਜ਼ਿਲ੍ਹੇ ਦੇ ਨਾਗਮੰਗਲਮ ਸਥਿਤ ਟਾਟਾ ਇਲੈਕਟ੍ਰਾਨਿਕਸ ਪ੍ਰਾਈਵੇਟ ਲਿਮਟਿਡ ਵਿੱਚ ਕੰਮ...
ਇੱਕ ਕੰਪਨੀ ਦੇ ਮਹਿਲਾ ਹੋਸਟਲ ਦੇ ਬਾਥਰੂਮ ਵਿੱਚ ਕੈਮਰਾ ਲਗਾਉਣ ਦੇ ਦੋਸ਼ ਵਿੱਚ ਇੱਕ ਔਰਤ ਅਤੇ ਉਸਦੇ ਇੱਕ ਪੁਰਸ਼ ਦੋਸਤ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।
ਪੁਲੀਸ ਨੇ ਦੱਸਿਆ ਕਿ ਕ੍ਰਿਸ਼ਨਾਗਿਰੀ ਜ਼ਿਲ੍ਹੇ ਦੇ ਨਾਗਮੰਗਲਮ ਸਥਿਤ ਟਾਟਾ ਇਲੈਕਟ੍ਰਾਨਿਕਸ ਪ੍ਰਾਈਵੇਟ ਲਿਮਟਿਡ ਵਿੱਚ ਕੰਮ ਕਰਨ ਵਾਲੀਆਂ ਸੈਂਕੜੇ ਮਹਿਲਾ ਕਰਮਚਾਰੀਆਂ ਨੇ ਵਿਰੋਧ ਪ੍ਰਦਰਸ਼ਨ ਕੀਤਾ ਜਦੋਂ ਕੰਪਨੀ ਦੀ ਮਹਿਲਾ ਕਰਮਚਾਰੀ ਰਿਹਾਇਸ਼ ਵਿਦਿਆਲ ਰੈਜ਼ੀਡੈਂਸੀ ਦੇ ਇੱਕ ਬਾਥਰੂਮ ਦੇ ਅੰਦਰ ਲੁਕਾ ਕੇ ਲਗਾਇਆ ਗਿਆ ਕੈਮਰਾ ਮਿਲਿਆ।
11 ਮੰਜ਼ਿਲਾ ਇਸ ਕਰਮਚਾਰੀ ਰਿਹਾਇਸ਼ ਵਿੱਚ ਅੱਠ ਬਲਾਕ ਹਨ ਅਤੇ ਇੱਥੇ 6,000 ਤੋਂ ਵੱਧ ਔਰਤਾਂ ਦੇ ਠਹਿਰਨ ਦਾ ਪ੍ਰਬੰਧ ਹੈ।
ਪੁਲੀਸ ਨੇ ਦੱਸਿਆ ਕਿ ਕੰਪਨੀ ਦੀ ਨਾਗਮੰਗਲਮ ਯੂਨਿਟ ਵਿੱਚ ਕੰਮ ਕਰਨ ਵਾਲੀ ਉੜੀਸਾ ਦੀ 22 ਸਾਲਾ ਨੀਲੂ ਕੁਮਾਰੀ ਗੁਪਤਾ ਇਸੇ ਕਰਮਚਾਰੀ ਰਿਹਾਇਸ਼ ਵਿੱਚ ਰਹਿੰਦੀ ਸੀ ਅਤੇ ਉਸ ਨੇ ਕਥਿਤ ਤੌਰ ’ਤੇ ਆਪਣੇ ਪੁਰਸ਼ ਦੋਸਤ ਸੰਤੋਸ਼ (25) ਦੇ ਉਕਸਾਉਣ ’ਤੇ ਇਹ ਕੈਮਰਾ ਲਗਾਇਆ ਸੀ।
ਪੁਲੀਸ ਸੁਪਰਡੈਂਟ ਪੀ. ਥੰਗਦੁਰਾਈ ਅਨੁਸਾਰ ਸੰਤੋਸ਼ ਨੂੰ 5 ਨਵੰਬਰ ਨੂੰ ਉਦਨਪੱਲੀ ਦੀ ਪੁਲੀਸ ਟੀਮ ਨੇ ਬੰਗਲੁਰੂ ਤੋਂ ਗ੍ਰਿਫ਼ਤਾਰ ਕੀਤਾ। ਉਨ੍ਹਾਂ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਇਹ ਕੈਮਰਾ 2 ਨਵੰਬਰ ਨੂੰ ਉਸ ਕਮਰੇ ਦੇ ਬਾਥਰੂਮ ਵਿੱਚ ਲਗਾਇਆ ਗਿਆ ਸੀ ਜਿੱਥੇ ਉੱਤਰੀ ਰਾਜਾਂ ਦੀਆਂ ਔਰਤਾਂ ਰਹਿੰਦੀਆਂ ਸਨ ਅਤੇ ਜਿੱਥੇ ਨੀਲੂ ਕੁਮਾਰੀ ਵੀ ਰਹਿੰਦੀ ਸੀ।
ਮਹਿਲਾ ਕਰਮਚਾਰੀਆਂ ਦੇ ਵਿਰੋਧ ਤੋਂ ਬਾਅਦ ਹੋਸੁਰ ਦੀ ਵਧੀਕ ਜ਼ਿਲ੍ਹਾ ਅਧਿਕਾਰੀ ਆਕ੍ਰਿਤੀ ਸੇਠੀ ਅਤੇ ਪੁਲੀਸ ਸੁਪਰਡੈਂਟ ਮੌਕੇ 'ਤੇ ਪਹੁੰਚੇ ਅਤੇ ਉਨ੍ਹਾਂ ਨਾਲ ਗੱਲਬਾਤ ਕੀਤੀ ਅਤੇ ਸੁਰੱਖਿਆ ਯਕੀਨੀ ਬਣਾਉਣ ਦਾ ਭਰੋਸਾ ਦਿੱਤਾ।
ਬੁੱਧਵਾਰ ਨੂੰ ਕਰਮਚਾਰੀ ਰਿਹਾਇਸ਼ ਵਿੱਚ ਵੱਡੀ ਗਿਣਤੀ ਵਿੱਚ ਇਕੱਠੀਆਂ ਹੋਈਆਂ ਮਹਿਲਾ ਕਰਮਚਾਰੀਆਂ ਦੇ ਮਾਪਿਆਂ ਨੂੰ ਵੀ ਪੁਲੀਸ ਨੂੰ ਸ਼ਾਂਤ ਕਰਾਉਣਾ ਪਿਆ।
ਅਧਿਕਾਰੀ ਨੇ ਦੱਸਿਆ ਕਿ ਕੰਪਲੈਕਸ ਦੀ ਡੂੰਘਾਈ ਨਾਲ ਜਾਂਚ ਕਰਨ ਲਈ ਮਹਿਲਾ ਪੁਲੀਸ ਕਰਮਚਾਰੀਆਂ ਨੂੰ ਤਾਇਨਾਤ ਕੀਤਾ ਗਿਆ ਹੈ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਕਿਤੇ ਹੋਰ ਵੀ ਲੁਕਿਆ ਹੋਇਆ ਕੈਮਰਾ ਨਹੀਂ ਲਗਾਇਆ ਗਿਆ ਹੈ।
