ਭਾਵਨਾ ਬਣੀ ਬੀ ਐੱਸ ਐੱਫ ਦੀ ਪਹਿਲੀ ਮਹਿਲਾ ਫਲਾਈਟ ਇੰਜਨੀਅਰ

ਬੀ ਐੱਸ ਐੱਫ ਦੇ ਹਵਾਈ ਵਿੰਗ ਨੂੰ ਆਪਣੇ 50 ਸਾਲ ਤੋਂ ਵੱਧ ਦੇ ਇਤਿਹਾਸ ’ਚ ਪਹਿਲੀ ਮਹਿਲਾ ਫਲਾਈਟ ਇੰਜਨੀਅਰ ਮਿਲੀ ਹੈ। ਬੀ ਐੱਸ ਐੱਫ ਦੇ ਹਵਾਈ ਵਿੰਗ ’ਚ ਪਹਿਲੀ ਮਹਿਲਾ ਫਲਾਈਟ ਇੰਜਨੀਅਰ ਦੀ ਨਿਯੁਕਤੀ ਅੰਦਰੂਨੀ ਸਿਖਲਾਈ ਪੂਰੀ ਹੋਣ ਤੋਂ ਬਾਅਦ ਹੋਈ ਹੈ। ਇੰਸਪੈਕਟਰ ਭਾਵਨਾ ਚੌਧਰੀ ਤੇ ਚਾਰ ਪੁਰਸ਼ ਸੁਬਾਰਡੀਨੇਟ ਅਧਿਕਾਰੀਆਂ ਨੂੰ ਹਾਲ ਹੀ ਵਿੱਚ ਬੀ ਐੱਸ ਐੱਫ ਦੇ ਡਾਇਰੈਕਟਰ ਜਨਰਲ ਦਲਜੀਤ ਸਿੰਘ ਚੌਧਰੀ ਨੇ ਫਲਾਇੰਗ ਬੈਜ ਦਿੱਤੇ। ਬੀ ਐੱਸ ਐੱਫ ਨੂੰ 1969 ਤੋਂ ਗ੍ਰਹਿ ਮੰਤਰਾਲੇ ਦੀ ਹਵਾਬਾਜ਼ੀ ਇਕਾਈ ਦੇ ਸੰਚਾਲਨ ਦੀ ਜ਼ਿੰਮੇਵਾਰੀ ਸੌਂਪੀ ਗਈ ਹੈ ਅਤੇ ਇਹ ਸਾਰੇ ਨੀਮ ਫੌਜੀ ਬਲਾਂ ਅਤੇ ਐੱਨ ਐੱਸ ਜੀ ਤੇ ਐੱਨ ਡੀ ਆਰ ਐੱਫ ਜਿਹੇ ਵਿਸ਼ੇਸ਼ ਬਲਾਂ ਦੀਆਂ ਮੁਹਿੰਮਾਂ ਸਬੰਧੀ ਲੋੜਾਂ ਨੂੰ ਪੂਰਾ ਕਰਦੀ ਹੈ।

ਅਧਿਕਾਰੀਆਂ ਨੇ ਦੱਸਿਆ ਕਿ ਪੰਜ ਸੁਬਾਰਡੀਨੇਟ ਅਧਿਕਾਰੀਆਂ ਨੂੰ ‘ਬੀ ਐੱਸ ਐੱਫ ਦੇ ਹਵਾਈ ਵਿੰਗ ਦੇ ਮਾਹਿਰਾਂ ਵੱਲੋਂ ਸ਼ੁਰੂ ਤੋਂ ਹੀ ਸਿਖਲਾਈ ਦਿੱਤੀ ਗਈ ਸੀ ਅਤੇ ਉਨ੍ਹਾਂ ਹਾਲ ਹੀ ਵਿੱਚ ਆਪਣੀ ਦੋ ਮਹੀਨੇ ਦੀ ਸਿਖਲਾਈ ਪੂਰੀ ਕੀਤੀ ਹੈ।’ ਅਗਸਤ ਤੋਂ ਸ਼ੁਰੂ ਹੋਈ ਦੋ ਮਹੀਨੇ ਦੀ ਅੰਦਰੂਨੀ ਸਿਖਲਾਈ ਦੌਰਾਨ ਪੰਜਾਂ ਮੁਲਾਜ਼ਮਾਂ ਨੂੰ 130 ਘੰਟੇ ਦੀ ਸਿਖਲਾਈ ਦਿੱਤੀ ਗਈ ਅਤੇ ਉਨ੍ਹਾਂ ਨੂੰ ਕੰਮ ਦਾ ਅਸਲ ਤਜਰਬਾ ਮਿਲਿਆ ਕਿਉਂਕਿ ਬੀ ਐੱਸ ਐੱਫ ਦੇ ਹਵਾਈ ਵਿੰਗ ਦੀਆਂ ਵੱਖ ਵੱਖ ਇਕਾਈਆਂ ਨੇ ਪੰਜਾਬ ਤੇ ਹੋਰ ਰਾਜਾਂ ’ਚ ਹਾਲ ਹੀ ਵਿੱਚ ਆਏ ਹੜ੍ਹਾਂ ਦੌਰਾਨ ਉਡਾਣਾਂ ਭਰੀਆਂ ਸਨ। ਬੀ ਐੱਸ ਐੱਫ ਦੇ ਹਵਾਈ ਵਿੰਗ ਨੂੰ ਆਪਣੇ ਐੱਮ ਆਈ-17 ਹੈਲੀਕਾਪਟਰ ਬੇੜੇ ’ਚ ਫਲਾਈਟ ਇੰਜਨੀਅਰਾਂ ਦੀ ਗੰਭੀਰ ਕਮੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਇੱਕ ਅਧਿਕਾਰੀ ਨੇ ਕਿਹਾ ਕਿ ਹਵਾਈ ਸੈਨਾ ਨੇ ਆਪਣੇ ਸੁਬਾਰਡੀਨੇਟ ਅਧਿਕਾਰੀਆਂ ਦੇ ਪਹਿਲੇ ਬੈਚ ਨੂੰ ਸਿਖਲਾਈ ਦਿੱਤੀ ਪਰ ਪੰਜ ਮੁਲਾਜ਼ਮਾਂ ਦੇ ਦੂਜੇ ਬੈਚ ਨੂੰ ਵੱਖ ਵੱਖ ਅੜਿੱਕਿਆਂ ਕਾਰਨ ਉੱਥੇ ਸਿਖਲਾਈ ਨਹੀਂ ਮਿਲ ਸਕੀ।