ਕਾਂਗਰਸ ਤੇ ਮਾਓਵਾਦੀਆਂ ਵਿਚਾਲੇ ਗੱਠਜੋੜ: ਭਾਜਪਾ

ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਨੇ ਅੱਜ ਕਾਂਗਰਸ ਤੇ ਮਾਓਵਾਦੀਆਂ ਵਿਚਾਲੇ ਗੱਠਜੋੜ ਅਤੇ ਕਾਂਗਰਸ ਆਗੂ ਰਾਹੁਲ ਗਾਂਧੀ ’ਤੇ ‘ਨਕਸਲੀਆਂ ਪ੍ਰਤੀ ਹਮਦਰਦੀ’ ਨੂੰ ਸ਼ਹਿ ਦੇਣ ਦਾ ਦੋਸ਼ ਲਾਉਂਦਿਆਂ ਇਸ ਨੂੰ ਕੌਮੀ ਪ੍ਰਭੂਸੱਤਾ ਲਈ ਖਤਰਾ ਕਰਾਰ ਦਿੱਤਾ। ਆਪਣੇ ਅਧਿਕਾਰਤ ਹੈਂਡਲ ਐਕਸ ’ਤੇ ਕਾਂਗਰਸ ਨੂੰ ਨਿਸ਼ਾਨੇ ’ਤੇ ਲੈਂਦਿਆਂ ਹਾਕਮ ਧਿਰ ਭਾਜਪਾ ਨੇ ਦੋਸ਼ ਲਾਇਆ ਕਿ ਭਾਰਤ ’ਚ ਨਕਸਲਵਾਦ ਲੰਮੇ ਸਮੇਂ ਤੱਕ ਜਾਰੀ ਰਿਹਾ ਤੇ ਸਾਬਕਾ ਯੂ ਪੀ ਏ ਸਰਕਾਰ ਦੇ ਦੂਜੇ ਕਾਰਜਕਾਲ ਦੌਰਾਨ ਮੁੱਖ ਤੌਰ ’ਤੇ ਨੀਤੀਗਤ ਨਾਕਾਮੀ ਕਾਰਨ ਇਹ ਖਤਰਨਾਕ ਪੱਧਰ ’ਤੇ ਪਹੁੰਚ ਗਿਆ ਸੀ। ਪਾਰਟੀ ਨੇ ਦੋਸ਼ ਲਾਇਆ ਕਿ ਅਜਿਹੀ ਸਥਿਤੀ ਪਿੱਛੇ ਅਹਿਮ ਕਾਰਨ ਸੋਨੀਆ ਗਾਂਧੀ ਦੀ ਅਗਵਾਈ ਵਾਲੀ ਸਾਬਕਾ ਕੌਮੀ ਸਲਾਹਕਾਰ ਕੌਂਸਲ (ਐੱਨ ਏ ਸੀ) ’ਚ ਮੈਂਬਰਾਂ ਵਜੋਂ ਸ਼ਾਮਲ ਕੀਤੇ ਗਏ ‘ਸ਼ਹਿਰੀ ਨਕਸਲੀਆਂ’ ਦਾ ਪ੍ਰਭਾਵ ਸੀ। ਇਹ ਕਹਿੰਦਿਆਂ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਸਰਕਾਰ ਤਹਿਤ ਨਕਸਲਵਾਦ ਦਾ ਪ੍ਰਭਾਵ ‘ਕਾਫੀ ਘਟਿਆ’ ਹੈ, ਭਾਜਪਾ ਨੇ ਦੋਸ਼ ਲਾਇਆ ਕਿ ‘ਨਕਸਲ ਹਮਾਇਤੀਆਂ’ ਨੇ ਕਾਂਗਰਸ ਦੀ ਲੀਡਰਸ਼ਿਪ ਅੰਦਰ ਪੈਰ ਪਸਾਰੇ ਹੋਏ ਹਨ।

ਇਸੇ ਦੌਰਾਨ ਛੱਤੀਸਗੜ੍ਹ ਦੇ ਉਪ ਮੁੱਖ ਮੰਤਰੀ ਵਿਜੈ ਸ਼ਰਮਾ ਨੇ ਅੱਜ ਕਿਹਾ ਕਿ ਨਕਸਲਵਾਦ 80 ਫੀਸਦ ਖਤਮ ਹੋ ਚੁੱਕਾ ਹੈ ਅਤੇ ਹੁਣ ਅਬੂਝਮਾੜ ਦੇ ਪੱਛਮੀ ਇਲਾਕਿਆਂ ਅਤੇ ਸੁਕਮਾ ਤੇ ਬੀਜਾਪੁਰ ਜ਼ਿਲ੍ਹਿਆਂ ਦੇ ਦੱਖਣੀ ਇਲਾਕਿਆਂ ਦੇ ਕੁਝ ਹਿੱਸਿਆਂ ’ਚ ਨਕਸਲੀ ਬਚੇ ਹਨ। ਸੂਬੇ ’ਚ ਭਾਜਪਾ ਸਰਕਾਰ ਦੇ ਗ੍ਰਹਿ ਵਿਭਾਗ ਦਾ ਕਾਰਜਭਾਰ ਸੰਭਾਲ ਰਹੇ ਸ਼ਰਮਾ ਨੇ ਕਿਹਾ ਕਿ ਕੇਂਦਰ ਨੇ ਮਾਰਚ 2026 ਤੱਕ ਨਕਸਲਵਾਦ ਖਤਮ ਕਰਨ ਦਾ ਅਹਿਦ ਲਿਆ ਹੈ ਅਤੇ ਇਸ ਨੂੰ ਤੈਅ ਸਮਾਂ ਸੀਮਾ ਅੰਦਰ ਕਾਮਯਾਬੀ ਨਾਲ ਪੂਰਾ ਕਰ ਲਿਆ ਜਾਵੇਗਾ।