ਗਿੱਦੜਬਾਹਾ ’ਚ ਦੋ ਰੋਜ਼ਾ ਬਾਸਕਟਬਾਲ ਟੂਰਨਾਮੈਂਟ ਦਾ ਆਗਾਜ਼

ਪੱਤਰ ਪ੍ਰੇਰਕ

ਗਿੱਦੜਬਾਹਾ, 12 ਜੁਲਾਈ

ਯੁੱਧ ਨਸ਼ਿਆਂ ਵਿਰੁੱਧ ਮੁਹਿੰਮ ਤਹਿਤ ਜ਼ਿਲ੍ਹਾ ਪੁਲੀਸ ਵੱਲੋਂ ਜ਼ਿਲ੍ਹਾ ਬਾਸਕਟਬਾਲ ਐਸੋਸੀਏਸ਼ਨ ਦੇ ਸਹਿਯੋਗ ਨਾਲ 2 ਦਿਨਾਂ ‘3 ਆਨ 3 ਨਾਕ ਆਊਟ ਬਾਸਕਟਬਾਲ’ ਟੂਰਨਾਮੈਂਟ ਬਾਬਾ ਗੰਗਾ ਰਾਮ ਬਾਸਕਟਬਾਲ ਵਿੱਚ ਸ਼ੁਰੂ ਹੋ ਗਿਆ। ਇਸ ਟੂਰਨਾਮੈਂਟ ਦੀ ਸ਼ੁਰੂਆਤ ਮੁੱਖ ਮਹਿਮਾਨ ਜ਼ਿਲ੍ਹਾ ਬਾਸਕਟਬਾਲ ਐਸੋਸੀਏਸ਼ਨ ਦੇ ਪ੍ਰਧਾਨ ਐਡਵੋਕੇਟ ਹਰਦੀਪ ਸਿੰਘ ਭੰਗਾਲ ਵੱਲੋਂ ਕੀਤੀ ਗਈ। ਉਨ੍ਹਾਂ ਨਾਲ ਜ਼ਿਲ੍ਹਾ ਬਾਸਕਟਬਾਲ ਐਸੋਸੀਏਸ਼ਨ ਦੇ ਮੀਤ ਪ੍ਰਧਾਨ ਅਤੇ ਟਰੱਕ ਯੂਨੀਅਨ ਦੇ ਪ੍ਰਧਾਨ ਕਿਰਨਪਾਲ ਸਿੰਘ ਮਾਨ ਵੀ ਮੌਜੂਦ ਸਨ। ਖਿਡਾਰੀਆਂ ਨਾਲ ਜਾਣ ਪਛਾਣ ਕਰਨ ਤੋਂ ਬਾਅਦ ਹਾਜ਼ਰੀਨ ਨੂੰ ਸੰਬੋਧਨ ਕਰਦਿਆਂ ਐਡਵੋਕੇਟ ਭੰਗਾਲ ਨੇ ਕਿਹਾ ਕਿ ਪੰਜਾਬ ਸਰਕਾਰ ਨਸ਼ਿਆਂ ਨੂੰ ਖ਼ਤਮ ਕਰਨ ਲਈ ਪੂਰੀ ਤਰ੍ਹਾਂ ਵਚਨਬੱਧ ਹੈ ਅਤੇ ਅਜਿਹੇ ਖੇਡ ਮੁਕਾਬਿਲਆਂ ਨਾਲ ਨੌਜਵਾਨ ਖੇਡ ਮੈਦਾਨਾਂ ਵੱਲ ਜਾਣਗੇ। ਇਸ ਮੌਕੇ ਬਾਸਕਟਬਾਲ ਕੋਚ ਏਐੱਸਆਈ ਜਗਸੀਰ ਪੁਰੀ ਨੇ ਦੱਸਿਆ ਕਿ ਗਿੱਦੜਬਾਹਾ ਵਿੱਚ ਪਹਿਲੀ ਵਾਰ ‘3 ਆਨ 3 ਬਾਸਕਟਬਾਲ’ ਮੁਕਾਬਲੇ ਕਰਵਾਏ ਜਾ ਰਹੇ ਹਨ, ਜਿਸ ਵਿਚ ਪੰਜਾਬ ਭਰ ਤੋਂ ਅੰਡਰ-14, 17 ਅਤੇ 19 ਵਰਗ ਦੇ ਲੜਕੇ ਅਤੇ ਲੜਕੀਆਂ ਦੀਆਂ 49 ਟੀਮਾਂ ਭਾਗ ਲੈ ਰਹੀਆਂ ਹਨ। ਉਨ੍ਹਾਂ ਦੱਸਿਆ ਕਿ 3 ਆਨ 3 ਬਾਸਕਟਬਾਲ ਮੁਕਾਬਲਿਆਂ ਵਿੱਚ ਇੱਕ ਕੋਰਟ ਵਿੱਚ 2 ਟੀਮਾਂ ਮੈਚ ਖੇਡ ਸਕਦੀਆਂ ਹਨ ਅਤੇ ਇਸ ਵਿਚ 3-3 ਖਿਡਾਰੀ ਖੇਡਦੇ ਹਨ ਅਤੇ ਮੈਚ ਸਿਰਫ 10 ਮਿੰਟ ਜਾਂ ਫਿਰ 21 ਪੁਆਇੰਟ ਪੂਰੇ ਕਰਨ ਤੱਕ ਦਾ ਹੁੰਦਾ ਹੈ। ਅੱਜ ਅੰਡਰ-14 ਵਰਗ ਲੜਕਿਆਂ ਦਾ ਉਦਘਾਟਨੀ ਮੈਚ ਗਿੱਦੜਬਾਹਾ ਬਨਾਮ ਭੈਣੀਬਾਘਾ ਵਿਚਾਲੇ ਖੇਡਿਆ ਜਿਸ ਵਿਚ ਭੈਣੀਬਾਘਾ ਜੇਤੂ ਰਿਹਾ। ਅੰਡਰ-14 ਲੜਕੀਆਂ ਦਾ ਮੈਚ ਮਲੋਟ ਬਨਾਮ ਬਠਿੰਡਾ ਵਿਚਾਲੇ ਖੇਡਿਆ ਜਿਸ ’ਚ ਮਲੋਟ ਦੀ ਟੀਮ ਜੇਤੂ ਰਹੀ। ਇਸ ਮੌਕੇ ਵਿੱਕੀ ਸ਼ਰਮਾ, ਕੁਸ਼ਲਦੀਪ ਪੁਰੀ, ਕੁਲਵਿੰਦਰ ਸਿੰਘ, ਕਨਵਰਦੀਪ ਸਿੰਘ, ਪਰਾਗ ਬਾਂਸਲ, ਸਾਗਰ ਕੁਮਾਰ, ਗੁਰਕੀਰਤ ਸਿੰਘ, ਮਧੂ ਪੁਰੀ, ਹਰਪ੍ਰੀਤ ਸਿੰਘ ਅਤੇ ਸ਼ਸ਼ੀ ਕੁਮਾਰ ਆਦਿ ਮੌਜੂਦ ਸਨ।