ਪੂਜਾ ਦੇ ਬਹਾਨੇ ਪੁਜਾਰੀ ਸੋਨਾ ਲੈ ਕੇ ਫ਼ਰਾਰ

ਇੱਥੋਂ ਨੇੜਲੇ ਪਿੰਡ ਕੋਟਧਰਮੂ ਵਿੱਚ ਪੂਜਾ ਕਰਨ ਦੇ ਬਹਾਨੇ ਇੱਕ ਪੁਜਾਰੀ ਪਰਿਵਾਰ ਨੂੰ ਚਕਮਾ ਦੇ ਕੇ ਅਲਮਾਰੀ ਵਿੱਚ ਰੱਖੇ ਸੋਨੇ ਦੇ ਗਹਿਣੇ ਲੈ ਕੇ ਫ਼ਰਾਰ ਹੋ ਗਿਆ, ਜਿਨ੍ਹਾਂ ਦੀ ਕੀਮਤ 3 ਲੱਖ 70 ਹਜ਼ਾਰ ਰੁਪਏ ਦੱਸੀ ਜਾ ਰਹੀ ਹੈ। ਮਾਨਸਾ ਪੁਲੀਸ ਨੇ ਪੁਜਾਰੀ ਖਿਲਾਫ਼ ਕੇਸ ਦਰਜ ਕਰ ਲਿਆ ਹੈ। ਜਾਣਕਾਰੀ ਅਨੁਸਾਰ ਪੁਲੀਸ ਨੂੰ ਕੋਟਧਰਮੂ ਵਾਸੀ ਜੀਤ ਸਿੰਘ ਨੇ ਦੱਸਿਆ ਕਿ ਉਹ ਇੱਕ ਪੁਜਾਰੀ ਨੂੰ ਘਰ ਵਿਚ ਪੂਜਾ ਕਰਨ ਲਈ ਲੈ ਕੇ ਆਏ ਸਨ। ਪੂਜਾ ਕਰਨ ਦੌਰਾਨ ਪੁਜਾਰੀ ਨੇ ਉਨ੍ਹਾਂ ਨੂੰ ਕਿਹਾ ਕਿ ਉਹ ਆਪਣੇ ਸੋਨੇ ਦੇ ਗਹਿਣੇ ਅਲਮਾਰੀ ਵਿੱਚ ਰੱਖ ਦੇਣ। ਜਦੋਂ ਉਸ ਨੇ ਪੂਜਾ ਕਰਨੀ ਸ਼ੁਰੂ ਕੀਤੀ ਤਾਂ ਸਭ ਨੂੰ ਅੱਖਾਂ ਬੰਦ ਕਰਨ ਲਈ ਕਿਹਾ। ਇਸ ਤੋਂ ਬਾਅਦ ਉਹ ਅਲਮਾਰੀ ਵਿੱਚ ਰੱਖੇ 3 ਲੱਖ 70 ਹਜ਼ਾਰ ਦੇ ਸੋਨੇ ਦੇ ਗਹਿਣੇ ਲੈ ਕੇ ਫ਼ਰਾਰ ਹੋ ਗਿਆ। ਥਾਣਾ ਸਦਰ ਮਾਨਸਾ ਦੇ ਮੁਖੀ ਬਲਵੀਰ ਸਿੰਘ ਨੇ ਦੱਸਿਆ ਕਿ ਜੀਤ ਸਿੰਘ ਦੇ ਬਿਆਨਾਂ ’ਤੇ ਸ਼ਾਸਤਰੀ ਪੰਡਿਤ ਵਾਸੀ ਸਿੱਕਰ (ਰਾਜਸਥਾਨ) ਖਿਲਾਫ਼ ਕੇਸ ਦਰਜ ਕਰ ਲਿਆ ਹੈ।