ਹੜਤਾਲ ’ਚ ਹਿੱਸਾ ਲੈਣ ’ਤੇ ਮੁਕਤਸਰ ਡਿਪੂ ਦੇ ਪੰਜ ਮੁਲਾਜ਼ਮ ਕੱਢੇ

ਰੋਡਵੇਜ਼ ਦੇ ਠੇਕਾ ਕਰਮਚਾਰੀਆਂ ਦੀਆਂ ਹੜਤਾਲ ਨੂੰ ਸਖ਼ਤੀ ਨਾਲ ਦਬਾਉਣ ਲਈ ਵਿਭਾਗ ਨੇ ਹੜਤਾਲ ਕਰਨ ਵਾਲੇ ਕਰਮਚਾਰੀਆਂ ਦੀਆਂ ਸੇਵਾਵਾਂ ਖ਼ਤਮ ਕਰ ਕੇ ਉਨ੍ਹਾਂ ਨੂੰ ਨੌਕਰੀ ਤੋਂ ਕੱਢਣਾ ਸ਼ੁਰੂ ਕਰ ਦਿੱਤਾ ਹੈ। ਇਸ ਲੜੀ ਤਹਿਤ ਮੁਕਤਸਰ ਡਿੱਪੂ ਦੇ ਤਿੰਨ ਡਰਾਈਵਰਾਂ- ਕਮਲ ਕੁਮਾਰ, ਮਨਪ੍ਰੀਤ ਸਿੰਘ ਅਤੇ ਜਗਸੀਰ ਸਿੰਘ ਤੇ ਦੋ ਕੰਡਕਟਰਾਂ ਤਰਸੇਮ ਸਿੰਘ ਤੇ ਮਨਜੀਤ ਸਿੰਘ ਦੀਆਂ ਸੇਵਾਵਾਂ ਖ਼ਤਮ ਕਰ ਦਿੱਤੀਆਂ ਹਨ। ਇਸ ਸਬੰਧੀ ਡਿਪੂ ਦੇ ਜਨਰਲ ਮੈਨੇਜਰ ਨੇ ਦੱਸਿਆ ਕਿ ਇਨ੍ਹਾਂ ਕਰਮਚਾਰੀਆਂ ਨੂੰ ਡਿਊਟੀ ’ਤੇ ਹਾਜ਼ਰ ਹੋਣ ਸਬੰਧੀ ਨੋਟਿਸ ਦਿੱਤਾ ਗਿਆ ਸੀ ਪਰ ਇਹ ਹਾਜ਼ਰ ਨਹੀਂ ਹੋਏ ਜਿਸ ’ਤੇ ਇਨ੍ਹਾਂ ਨੂੰ ਨੌਕਰੀ ਤੋਂ ਕੱਢ ਦਿੱਤਾ ਗਿਆ ਹੈ। ਇਸ ਦੌਰਾਨ ਉਨ੍ਹਾਂ ਦੱਸਿਆ ਕਿ ਮੁਕਤਸਰ ਡਿਪੂ ਕੋਲ ਇਸ ਵੇਲੇ 86 ਬੱਸਾਂ ਹਨ ਜਿਨ੍ਹਾਂ ਵਿੱਚੋਂ 82 ਬੱਸਾਂ ਹੜਤਾਲ ਕਾਰਨ ਖੜ੍ਹੀਆਂ ਹਨ ਜਦੋਂਕਿ ਸਿਰਫ਼ ਚਾਰ ਬੱਸਾਂ ਪੱਕੇ ਕਰਮਚਾਰੀਆਂ ਵੱਲੋਂ ਮੁਕਤਸਰ-ਬਠਿੰਡਾ ਅਤੇ ਮੁਕਤਸਰ-ਮਲੋਟ ਰੂਟ ’ਤੇ ਚਲਾਈਆਂ ਜਾ ਰਹੀਆਂ ਹਨ। ਅੱਜ ਹੜਤਾਲ ਦੇ ਦੂਜੇ ਦਿਨ ਬੱਸ ਅੱਡਾ ਤਾਂ ਖੁੱਲ੍ਹਾ ਰਿਹਾ ਪਰ ਹੜਤਾਲੀ ਕਰਮਚਾਰੀਆਂ ਨੇ ਬੱਸਾਂ ਨਹੀਂ ਚਲਾਈਆਂ ਜਿਸ ਕਾਰਨ ਪ੍ਰਾਈਵੇਟ ਬੱਸਾਂ ਦੀ ਚਾਂਦੀ ਬਣੀ ਰਹੀ। ਪੰਜਾਬ ਰੋਡਵੇਜ਼ ਪਨਬੱਸ ਸਟੇਟ ਟਰਾਂਸਪੋਰਟ ਵਰਕਰ ਯੂਨੀਅਨ ਦੇ ਪ੍ਰਧਾਨ ਹਰਮੰਦਰ ਸਿੰਘ ਨੇ ਦੱਸਿਆ ਕਿ ਹੜਤਾਲ ਅਣਮਿੱਥੇ ਸਮੇਂ ਲਈ ਜਾਰੀ ਰਹੇਗੀ। ਉਨ੍ਹਾਂ ਕਿਹਾ ਕਿ ਜਥੇਬੰਦੀ ਦੀ ਮੰਗ ਹੈ ਕਿ ਪਹਿਲਾਂ ਬੈਠਕ ਕਰਕੇ ਮੰਗਾਂ ਪੂਰੀਆਂ ਕੀਤੀਆਂ ਜਾਣ ਜਿਸ ਮਗਰੋਂ ਹੜਤਾਲ ਖਤਮ ਕੀਤੀ ਜਾਵੇਗੀ।

ਪੰਜਾਬ ’ਚ ਕਰੀਬ 2600 ਸਰਕਾਰੀ ਬੱਸਾਂ ਬੰਦ, ਸਿਰਫ਼ 25 ਕੁ ਰੂਟ ’ਤੇ

ਹੜਤਾਲ ’ਤੇ ਚੱਲ ਰਹੀਆਂ ਠੇਕਾ ਕਰਮਚਾਰੀਆਂ ਦੀਆਂ ਜਥੇਬੰਦੀਆਂ ਵੱਲੋਂ ਜਾਰੀ ਸੂਚਨਾ ਅਨੁਸਾਰ ਪੰਜਾਬ ਵਿੱਚ ਕਰੀਬ 2600 ਸਰਕਾਰੀ ਬੱਸਾਂ ਹੜਤਾਲ ਕਾਰਨ ਬੰਦ ਖੜ੍ਹੀਆਂ ਹਨ ਜਦਕਿ ਪੱਕੇ ਕਰਮਚਾਰੀਆਂ ਨਾਲ ਮਸਾਂ 25 ਕੁ ਬੱਸਾਂ ਹੀ ਚੱਲ ਰਹੀਆਂ ਹਨ ਜਦਕਿ 5300 ਤੋਂ ਵਧੇਰੇ ਠੇਕਾ ਕਰਮਚਾਰੀ ਹੜਤਾਲ ’ਤੇ ਹਨ। ਪਨਬੱਸ ਮੁਕੰਮਲ ਤੌਰ ’ਤੇ ਬੰਦ ਹੈ। ਆਗੂਆਂ ਨੂੰ ਪੁਲੀਸ ਦਿਨੇ ਫੜ ਲੈਂਦੀ ਤੇ ਸ਼ਾਮ ਨੂੰ ਛੱਡ ਦਿੰਦੀ ਹੈ।

ਬਠਿੰਡਾ ਵਿੱਚ ਕੱਚੇ ਬੱਸ ਕਾਮਿਆਂ ਦਾ ਧਰਨਾ ਦੂਜੇ ਦਿਨ ਵੀ ਜਾਰੀ

ਬਠਿੰਡਾ (ਸ਼ਗਨ ਕਟਾਰੀਆ): ਕੱਚੇ ਬੱਸ ਕਾਮਿਆਂ ਨੇ ਇੱਥੇ ਪੀ ਆਰ ਟੀ ਸੀ ਦੇ ਡਿਪੂ ਅੱਗੇ ਅੱਜ ਦੂਜੇ ਦਿਨ ਵੀ ਧਰਨਾ ਦਿੱਤਾ। ਪੁਰਾਣੀਆਂ ਮੰਗਾਂ ਤੋਂ ਇਲਾਵਾ ਉਹ ਵਿਭਾਗੀ ਕਾਰਵਾਈ ਦਾ ਸ਼ਿਕਾਰ ਹੋਏ ਸਾਥੀ ਕਰਮਚਾਰੀਆਂ ਤੋਂ ਕਾਰਵਾਈ ਹਟਾਉਣ ਅਤੇ ਬੀਤੇ ਦਿਨ ਦਰਜ ਹੋਏ ਪੁਲੀਸ ਕੇਸ ਵਾਪਸ ਲੈਣ ਦੀ ਮੰਗ ਕਰ ਰਹੇ ਸਨ। ਉਨ੍ਹਾਂ ਆਖਿਆ ਕਿ ਮੰਗਾਂ ਦੀ ਪੂਰਤੀ ਤੱਕ ਸੰਘਰਸ਼ ਜਾਰੀ ਰੱਖਿਆ ਜਾਵੇਗਾ। ਹੜਤਾਲੀ ਮੁਲਾਜ਼ਮਾਂ ਨੂੰ ਛੱਡ ਕੇ ਗ਼ੈਰ-ਸੰਗਠਿਤ ਅਤੇ ਰੈਗੂਲਰ ਨੌਕਰੀ ਕਰ ਰਹੇ ਕਰਮਚਾਰੀ ਸਰਕਾਰੀ ਰੂਟਾਂ ’ਤੇ ਆਪਣੀਆਂ ਬੱਸਾਂ ਲੈ ਕੇ ਗਏ। ਸੰਘਰਸ਼ੀ ਕਰਮਚਾਰੀਆਂ ਕਰਕੇ ਸਰਕਾਰੀ ਬੱਸਾਂ ਦੀ ਗਿਣਤੀ ਅੱਜ ਫਿਰ ਸੜਕਾਂ ’ਤੇ ਘੱਟ ਰਹੀ, ਜਿਸ ਕਾਰਨ ਸਵਾਰੀਆਂ ਨੂੰ ਪ੍ਰਾਈਵੇਟ ਬੱਸਾਂ ’ਤੇ ਭੀੜ-ਭੜੱਕੇ ਵਿੱਚ ਸਫ਼ਰ ਕਰਨਾ ਪਿਆ। ਸਰਕਾਰੀ ਬੱਸਾਂ ’ਤੇ ਮੁਫ਼ਤ ਸਫ਼ਰ ਦੀ ਸਹੂਲਤ ਲੈਣ ਵਾਲੀਆਂ ਬੀਬੀਆਂ ਨੂੰ ਅੱਧੀ ਟਿਕਟ ’ਤੇ ਸਫ਼ਰ ਕਰਾਉਣ ਲਈ ਆਮ ਦਿਨਾਂ ਵਿੱਚ ਮਿੰਨਤਾਂ ਕਰਨ ਵਾਲੇ ਨਿੱਜੀ ਟਰਾਂਸਪੋਰਟਰਾਂ ਦੀਆਂ ਬੱਸਾਂ ’ਤੇ ਸਵਾਰੀਆਂ ਦੀ ਭਰਮਾਰ ਰਹੀ ਅਤੇ ਉਨ੍ਹਾਂ ਪੂਰੀ ਟਿਕਟ ’ਤੇ ਹੀ ਔਰਤਾਂ ਨੂੰ ਸਫ਼ਰ ਕਰਵਾਇਆ।

ਐਂਪਲਾਈਜ ਫੈੱਡਰੇਸ਼ਨ (ਚਾਹਲ) ਨੇ ਲਾਠੀਚਾਰਜ ਦੀ ਨਿਖੇਧੀ ਕੀਤੀ

ਭੁੱਚੋ ਮੰਡੀ: ਐਂਪਲਾਈਜ਼ ਫੈੱਡਰੇਸ਼ਨ (ਚਾਹਲ) ਗੁਰੂ ਹਰਿਗੋਬਿੰਦ ਥਰਮਲ ਪਲਾਂਟ ਲਹਿਰਾ ਮੁਹੱਬਤ ਨੇ ਪੀ ਆਰ ਟੀ ਸੀ ਅਤੇ ਪੰਜਾਬ ਰੋਡਵੇਜ਼ ਦੇ ਸੰਘਰਸ਼ ਕਰ ਰਹੇ ਮੁਲਾਜ਼ਮਾਂ ’ਤੇ ਪੰਜਾਬ ਪੁਲੀਸ ਵੱਲੋਂ ਕੀਤੇ ਗਏ ਲਾਠੀਚਾਰਜ ਦੀ ਸਖ਼ਤ ਨਿਖੇਧੀ ਕੀਤੀ ਹੈ। ਫੈੱਡਰੇਸ਼ਨ ਦੇ ਥਰਮਲ ਇਕਾਈ ਦੇ ਪ੍ਰਧਾਨ ਅਤੇ ਸੂਬਾ ਸੀਨੀਅਰ ਮੀਤ ਪ੍ਰਧਾਨ ਬਲਜੀਤ ਸਿੰਘ ਬਰਾੜ ਬੋਦੀ ਵਾਲਾ, ਸੀਨੀਅਰ ਮੀਤ ਪ੍ਰਧਾਨ ਲਖਵੰਤ ਸਿੰਘ ਬਾਂਡੀ, ਜਨਰਲ ਸਕੱਤਰ ਰਜਿੰਦਰ ਸਿੰਘ ਨਿੰਮਾ, ਜੁਆਇੰਟ ਸਕੱਤਰ ਰਘਵੀਰ ਸਿੰਘ ਸੈਣੀ, ਖਜ਼ਾਨਚੀ ਕੇਸ਼ਵ ਰਾਜ ਅਧਿਕਾਰੀ ਅਤੇ ਗੁਰਭੇਜ ਸਿੰਘ ਕਿਹਾ ਕਿ ਪੰਜਾਬ ਸਰਕਾਰ ਹੱਕੀ ਮੰਗਾਂ ਲਈ ਸੰਘਰਸ਼ ਕਰ ਰਹੇ ਮੁਲਾਜ਼ਮਾਂ ਉੱਤੇ ਜਬਰ ਢਾਹ ਰਹੀ ਹੈ ਅਤੇ ਸੂਬਾ ਪ੍ਰਧਾਨ ਬਿਕਰਮਜੀਤ ਸਿੰਘ ਨੂੰ ਮੁਅੱਤਲ ਕਰਨਾ ਬੇਹੱਦ ਮੰਦਭਾਗਾ ਹੈ। ਉਨ੍ਹਾਂ ਕਿਹਾ ਕਿ ਐਂਪਲਾਈਜ਼ ਫੈੱਡਰੇਸ਼ਨ (ਚਾਹਲ) ਸੰਘਰਸ਼ ਕਰ ਰਹੇ ਮੁਲਾਜ਼ਮਾਂ ਦੀ ਹਮਾਇਤ ਕਰਦੀ ਹੈ। ਉਨ੍ਹਾਂ ਸਰਕਾਰ ਤੋਂ ਮੰਗ ਕੀਤੀ ਕਿ ਵਿਭਾਗਾਂ ਦੇ ਕੱਚੇ ਮੁਲਾਜ਼ਮਾਂ ਨੂੰ ਪੱਕਾ ਕੀਤਾ ਜਾਵੇ। -ਪੱਤਰ ਪ੍ਰੇਰਕ