ਹੜ੍ਹ ਪੀੜਤਾਂ ਲਈ ਫਾਜ਼ਿਲਕਾ ਬੀਜ ਲੈ ਕੇ ਗਏ ਕਿਸਾਨ ਸੜਕ ਹਾਦਸੇ ’ਚ ਜ਼ਖਮੀ, ਇੱਕ ਦੀ ਮੌਤ

ਮੁਕਤਸਰ ਲਾਗਲੇ ਪਿੰਡ ਉਦੇਕਰਨ ਕੋਲ ਦੇਰ ਸ਼ਾਮ ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਦੀ ਇੱਕ ਗੱਡੀ ਦਾ ਰੋਡਵੇਜ਼ ਦੀ ਬੱਸ ਨਾਲ ਐਕਸੀਡੈਂਟ ਹੋਣ ਕਰਕੇ ਗੱਡੀ ਦੇ ਚਾਲਕ ਕਿਸਾਨ ਆਗੂ ਦੀ ਮੌਤ ਹੋ ਗਈ ਜਦੋਂ ਕਿ ਦੂਸਰਾ ਕਿਸਾਨ ਆਗੂ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋ ਗਿਆ ਹੈ। ਮ੍ਰਿਤਕ ਦੀ ਪਹਿਚਾਣ ਕੋਟਕਪੂਰਾ ਦੇ ਇਕਾਈ ਪ੍ਰਧਾਨ ਹਰਜੀਤ ਸਿੰਘ (60) ਵਜੋਂ ਹੋਈ ਹੈ ਜਦੋਂ ਕਿ ਜ਼ਖਮੀ ਬਲਵੰਤ ਸਿੰਘ ਇਕਾਈ ਪ੍ਰਧਾਨ ਪਿੰਡ ਨੰਗਲ (ਫਰੀਦਕੋਟ) ਦਾ ਹੈ।

ਪ੍ਰਾਪਤ ਜਾਣਕਾਰੀ ਅਨੁਸਾਰ ਕੋਟਕਪੂਰਾ ਬਲਾਕ ਤੋਂ ਦੋ ਟਰਾਲੀਆਂ ਅਤੇ ਕਈ ਗੱਡੀਆਂ ਵਿੱਚ ਕਿਸਾਨ ਆਗੂ ਕਣਕ ਦਾ ਬੀਜ ਲੈ ਕੇ ਫਾਜ਼ਿਲਕਾ ਖ਼ੇਤਰ ਦੇ ਹੜ੍ਹ ਪੀੜਿਤ ਪਿੰਡਾਂ ਨੂਰ ਸ਼ਾਹ, ਵੱਲੇ ਸ਼ਾਹ ਉਤਾੜ, ਰਾਣਾ, ਗੰਜੂ ਹਸਤਾ ਤੇ ਦੋਨਾ ਸਿਕੰਦਰ ਆਦਿ ਪਿੰਡਾਂ ਵਿੱਚ ਵੰਡ ਕੇ ਕੋਟਕਪੂਰਾ ਪਰਤ ਰਹੇ ਸਨ ਕਿ ਇੱਕ ਪਿਕ ਅੱਪ ਵਾਹਨ ਪਿੰਡ ਉਦੇਕਰਨ ਕੋਲ ਹਾਦਸਾਗ੍ਰਸਤ ਹੋ ਗਿਆ।

ਮ੍ਰਿਤਕ ਕਿਸਾਨ ਦੀ ਦੇਹ ਸਿਵਲ ਹਸਪਤਾਲ ਮੁਕਤਸਰ ਵਿਖੇ ਰੱਖੀ ਗਈ ਹੈ ਜਦੋਂ ਕਿ ਜ਼ਖ਼ਮੀ ਇੱਥੋਂ ਦੇ ਦੀ ਇੱਕ ਨਿੱਜੀ ਹਸਪਤਾਲ ਵਿੱਚ ਇਲਾਜ ਅਧੀਨ ਹੈ। ਜਖਮੀ ਦਾ ਇਲਾਜ ਕਰ ਰਹੇ ਡਾਕਟਰ ਨੇ ਦੱਸਿਆ ਕਿ ਉਸ ਦੀ ਹਾਲਤ ਗੰਭੀਰ ਹੈ।

ਜਥੇਬੰਦੀ ਦੇ ਸੂਬਾ ਸੀਨੀਅਰ ਮੀਤ ਪ੍ਰਧਾਨ ਝੰਡਾ ਸਿੰਘ ਜੇਠੂਕੇ ਤੇ ਸਕੱਤਰ ਸ਼ਿੰਗਾਰਾ ਸਿੰਘ ਮਾਨ ਨੇ ਗਹਿਰੇ ਦੁੱਖ ਦਾ ਪ੍ਰਗਟਾਵਾ ਕਰਦਿਆਂ ਮ੍ਰਿਤਕ ਕਿਸਾਨ ਹਰਜੀਤ ਸਿੰਘ ਦੇ ਪਰਿਵਾਰ ਨੂੰ 10 ਲੱਖ ਦਾ ਮੁਆਵਜ਼ਾ, ਸਾਰਾ ਕਰਜ਼ਾ ਮੁਆਫ਼ ਤੇ ਪਰਿਵਾਰ ਦੇ ਇੱਕ ਜੀਅ ਨੂੰ ਸਰਕਾਰੀ ਨੌਕਰੀ ਦੇਣ ਤੇ ਗੰਭੀਰ ਜ਼ਖਮੀ ਕਿਸਾਨ ਆਗੂ ਬਲਵੰਤ ਸਿੰਘ ਨੰਗਲ ਦਾ ਮੁਕੰਮਲ ਡਾਕਟਰੀ ਇਲਾਜ ਸਰਕਾਰੀ ਖਰਚੇ ਤੇ ਕਰਵਾਉਣ ਦੀ ਮੰਗ ਕੀਤੀ ਹੈ।