ਡੂਮ ਦੇ ਨਹਿਰੀ ਪੁਲ ਲਾਗੇ ਨਹਿਰ ਵਿੱਚ ਡਿੱਗੀ ਕਾਰ, ਕਾਰ ਸਵਾਰ ਲਾਪਤਾ
ਗੋਤਾਖੋਰਾਂ ਦੀਆਂ ਟੀਮਾਂ ਵੱਲੋਂ ਭਾਲ ਜਾਰੀ
ਲੰਘੀ ਰਾਤ ਪਾਇਲ-ਰਾੜਾ ਸਾਹਿਬ ਰੋਡ ’ਤੇ ਡੂਮ ਦੇ ਨਹਿਰੀ ਪੁਲ ਲਾਗੇ ਇੱਕ ਵਰਨਾ ਕਾਰ ਨੰਬਰ ਪੀਬੀ 10 ਡੀਐੱਫ 6116 ਬੇਕਾਬੂ ਹੋ ਕੇ ਨਹਿਰ ਵਿੱਚ ਡਿੱਗ ਜਾਣ ਦਾ ਪਤਾ ਲੱਗਾ ਹੈ।
ਜਾਣਕਾਰੀ ਅਨੁਸਾਰ ਰਾਤ ਕਰੀਬ 9 ਵਜੇ ਇਹ ਕਾਰ ਨਹਿਰ ਵਿੱਚ ਡਿੱਗੀ ਤਾਂ ਉਥੋਂ ਜਾਂਦੇ ਪਿੰਡ ਰਾਣੋਂ ਦੇ ਰਾਹਗੀਰ ਨੂੰ ਜਦੋਂ ਨਹਿਰ ਵਿੱਚ ਕਾਰ ਦੀਆਂ ਲਾਈਟਾਂ ਜਗਦੀਆਂ ਦਿਖਾਈ ਦਿੱਤੀਆਂ ਤਾਂ ਉਸ ਵੱਲੋਂ ਤੁਰੰਤ ਪਿੰਡ ਪਹੁੰਚ ਕੇ ਗੁਰਦੁਆਰਾ ਸਾਹਿਬ ਵਿਖੇ ਅਨਾਊਂਸਮੈਂਟ ਕਰਵਾ ਦਿੱਤੀ। ਜਿਸ ਤੋਂ ਬਾਅਗ ਪਿੰਡ ਵਾਸੀਆਂ ਵੱਲੋ ਘਟਨਾ ਸਥਾਨ ‘ਤੇ ਪਹੁੰਚ ਕੇ ਭਾਰੀ ਜੱਦੋਂ ਜਹਿਦ ਨਾਲ ਕਾਰ ਨੂੰ ਟਰੈਕਟਰਾਂ ਰਾਹੀਂ ਨਹਿਰ ਵਿੱਚੋਂ ਬਾਹਰ ਕੱਢ ਲਿਆਂਦਾ, ਪਰ ਕਾਰ ਸਵਾਰ ਨਹੀਂ ਮਿਲਿਆ, ਜਿਸ ਦੇ ਨਹਿਰ ਦੇ ਕਿਨਾਰੇ ਪਾਣੀ ਨਾਲ ਭਿੱਜੇ ਬੂਟ ਮਿਲੇ ਹਨ।
ਘਟਨਾ ਸਥਾਨ ‘ਤੇ ਮੌਜੂਦ ਕਾਰ ਸਵਾਰ ਦੇ ਪਿਤਾ ਠੇਕੇਦਾਰ ਗੁਰਮੇਲ ਸਿੰਘ ਵਾਸੀ ਪਿੰਡ ਧੌਲ ਮਾਜਰਾ ਥਾਣਾ ਮਲੌਦ ਨੇ ਦੱਸਿਆ ਕਿ ਕਾਰ ’ਚ ਸਵਾਰ ਉਨ੍ਹਾਂ ਦਾ ਸਪੁੱਤਰ ਗੁਰਤਰਨਦੀਪ ਸਿੰਘ (38 ਸਾਲ) ਸੀ ਜੋ ਕਿ ਸ਼ਾਮ 7 ਵਜੇ ਦੇ ਕਰੀਬ ਘਰੋਂ ਕਾਰ ਲੈ ਕੇ ਗਿਆ ਸੀ ਅਤੇ ਕਾਫ਼ੀ ਸਮਾਂ ਵਾਪਿਸ ਨਹੀਂ ਪਰਤਿਆਂ। ਉਸ ਤੋਂ ਬਾਅਦ ਉਨ੍ਹਾਂ ਨੂੂੰ ਇਸ ਘਟਨਾ ਦੀ ਸੂਚਨਾ ਮਿਲੀ, ਤਾਂ ਉਹ ਤੁਰੰਤ ਘਟਨਾ ਸਥਾਨ ’ਤੇ ਪਹੁੰਚ ਗਏ। ਜਿੱਥੇ ਉਨ੍ਹਾਂ ਨੂੰ ਉਨ੍ਹਾਂ ਦੀ ਸਿਰਫ਼ ਕਾਰ ਮਿਲੀ, ਪਰ ਉਨ੍ਹਾਂ ਦਾ ਸਪੁੱਤਰ ਨਹੀਂ ਮਿਲਿਆ।
ਸੂਚਨਾ ਮਿਲਦਿਆਂ ਹੀ ਪਾਇਲ ਪੁਲੀਸ ਵੀ ਘਟਨਾ ਸਥਾਨ ’ਤੇ ਪਹੁੰਚ ਗਈ ਸੀ। ਖਬਰ ਲਿਖੇ ਜਾਣ ਤੱਕ ਸਵੇਰੇ ਤੜਕਸਾਰ ਤੋਂ ਲੈ ਕੇ ਦੇਰ ਸ਼ਾਮ ਤੱਕ ਗੋਤਾਖੋਰਾਂ ਦੀਆਂ ਟੀਮਾਂ ਵੱਲੋਂ ਕਾਰ ਸਵਾਰ ਗੁਰਤਰਨਦੀਪ ਸਿੰਘ ਦੀ ਨਹਿਰ ਵਿੱਚੋਂ ਭਾਲ ਕੀਤੀ ਜਾ ਰਹੀ ਸੀ। ਖਬਰ ਲਿਖੇ ਜਾਣ ਤੱਕ ਲਾਪਤਾ ਵਿਅਕਤੀ ਦੀ ਕੋਈ ਉੱਘ ਸੁੱਘ ਨਹੀਂ ਮਿਲੀ।
