ਜੰਮੂ-ਕਸ਼ਮੀਰ ਦੇ ਕਠੂਆ ਖੇਤਰ ਦਾ ਖੈਰ ਮਾਫੀਆ ਪਠਾਨਕੋਟ ਵਿੱਚ ਸਰਗਰਮ ਹੋ ਗਿਆ ਹੈ। ਬੀਤੀ ਦੇਰ ਰਾਤ, ਪਠਾਨਕੋਟ ਦੇ ਕਥਲੌਰ ਵਾਈਲਡਲਾਈਫ ਸੈਂਚੁਰੀ ਵਿੱਚ ਮਾਫੀਆ ਨੂੰ ਖੈਰ ਦੇ ਦਰੱਖਤ ਕੱਟਦੇ ਹੋਏ ਦੇਖਿਆ ਗਿਆ। ਹਾਲਾਂਕਿ, ਸੈਂਚੁਰੀ ਸਟਾਫ ਨੂੰ ਆਉਂਦੇ ਦੇਖ ਕੇ, ਮਾਫੀਆ ਮੈਂਬਰ ਕੱਟੇ ਹੋਏ ਦਰੱਖਤਾਂ ਨਾਲ ਭਰੀ ਇੱਕ ਗੱਡੀ ਛੱਡ ਕੇ ਭੱਜ ਗਏ।
ਸੈਂਚੁਰੀ ਦੇ ਡੀ ਐੱਫ ਓ ਪਰਮਜੀਤ ਸਿੰਘ ਨੇ ਦੱਸਿਆ ਕਿ ਲੰਘੀ ਰਾਤ ਲਗਭੱਗ 2:30 ਵਜੇ, ਬਹਾਦਰਪੁਰ ਦੇ ਕੋਸ਼ਲਿਆ ਪਿੰਡ ਵਿੱਚ ਕਥਲੌਰ ਵਾਈਲਡਲਾਈਫ ਸੈਂਚੁਰੀ ਦੇ ਨੇੜੇ ਖੈਰ ਮਾਫੀਆ ਦੇ ਪੰਜ ਮੈਂਬਰ ਖੈਰ ਦੇ ਦਰੱਖਤ ਕੱਟ ਰਹੇ ਸਨ। ਜਦੋਂ ਸੈਂਚੁਰੀ ਟੀਮ ਪੁੱਜੀ ਤਾਂ ਉਹ ਦਰੱਖਤਾਂ ਨਾਲ ਭਰੀ ਮਹਿੰਦਰਾ ਜੀਪ ਛੱਡ ਕੇ ਭੱਜ ਗਏ। ਅਧਿਕਾਰੀਆਂ ਨੇ ਮੌਕੇ ਤੋਂ ਲਗਭੱਗ 16 ਖੈਰ ਦੇ ਦਰੱਖਤ ਅਤੇ ਦੋ ਲੋਹੇ ਦੇ ਆਰੇ ਬਰਾਮਦ ਕੀਤੇ। ਉਨ੍ਹਾਂ ਨੇ ਤੁਰੰਤ ਨਰੋਟ ਜੈਮਲ ਸਿੰਘ ਪੁਲੀਸ ਸਟੇਸ਼ਨ ਵਿੱਚ ਪੁਲੀਸ ਨੂੰ ਸੂਚਿਤ ਕੀਤਾ। ਪੁਲੀਸ ਨੇ ਅਣਪਛਾਤੇ ਖੈਰ ਮਾਫੀਆ ਮੈਂਬਰਾਂ ਵਿਰੁੱਧ ਕੇਸ ਦਰਜ ਕਰਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
ਸੈਂਚੁਰੀ ਦੇ ਅਧਿਕਾਰੀ ਨੇ ਇਹ ਵੀ ਦੱਸਿਆ ਕਿ ਪਠਾਨਕੋਟ-ਜੰਮੂ ਕਸ਼ਮੀਰ ਸਰਹੱਦ ਦੇ ਨੇੜੇ ਰਹਿਣ ਵਾਲੇ ਵਿਅਕਤੀ ਲੰਬੇ ਸਮੇਂ ਤੋਂ ਇਸ ਖੇਤਰ ਵਿੱਚ ਦਾਖਲ ਹੋ ਕੇ ਪਠਾਨਕੋਟ ਦੇ ਇਕਾਂਤ ਸਥਾਨਾਂ ’ਤੇ ਦਰੱਖਤ ਚੋਰੀ ਕਰ ਰਹੇ ਹਨ। ਮਾਫੀਆ ਮੈਂਬਰਾਂ ਨੇ ਪਹਿਲਾਂ ਵੀ ਪਠਾਨਕੋਟ ਦੇ ਸਰਹੱਦੀ ਖੇਤਰ ਨਰੋਟ ਜੈਮਲ ਸਿੰਘ ਵਿੱਚ ਰੇਂਜ ਅਫਸਰ ਅਤੇ ਹੋਰ ਮੁਲਾਜ਼ਮਾਂ ’ਤੇ ਹਮਲਾ ਕੀਤਾ ਸੀ। ਹਾਲਾਂਕਿ, ਮਾਫੀਆ ਮੈਂਬਰ ਪੁਲੀਸ ਦੀ ਗ੍ਰਿਫ਼ਤ ਤੋਂ ਬਾਹਰ ਹਨ।
