ਮੱਧ ਪ੍ਰਦੇਸ਼ ਦੇ ਟੀਕਮਗੜ੍ਹ ਦੇ ਕੇਂਦਰੀ ਮੰਤਰੀ ਵੀਰੇਂਦਰ ਕੁਮਾਰ ਦੇ ਲੋਕ ਸਭਾ ਹਲਕੇ ਵਿੱਚ ਉਨ੍ਹਾਂ ਦੇ ਘਰ ਨੇੜਿਓਂ 40 ਤੋਂ ਵੱਧ ਵੋਟਰ ਆਈਡੀ ਕਾਰਡ ਸੁੱਟੇ ਗਏ ਮਿਲੇ ਹਨ। ਇੱਥੇ ਅੱਜ ਇੱਕ ਅਧਿਕਾਰੀ ਨੇ ਦੱਸਿਆ ਕਿ ਭਾਜਪਾ ਸੰਸਦ ਮੈਂਬਰ ਦਾ ਰਾਜ ਸਰਕਾਰ ਵੱਲੋਂ ਅਲਾਟ ਕੀਤਾ ਗਿਆ ਨਿਵਾਸ ਸਿਵਲ ਲਾਈਨਜ਼ ਵਿੱਚ ਸਥਿਤ ਹੈ, ਜਿੱਥੇ ਮੰਤਰੀ ਦੇ ਇੱਕ ਸਹਾਇਕ ਨੇ ਮੁੱਖ ਦਸਤਾਵੇਜ਼ ਦੇਖੇ।ਤਹਿਸੀਲਦਾਰ ਸਤੇਂਦਰ ਗੁਰਜਰ ਨੇ ਦੱਸਿਆ ਕਿ ਜਿਉਂ ਹੀ ਜਾਣਕਾਰੀ ਮਿਲੀ, ਇੱਕ ਪੁਲੀਸ ਟੀਮ ਮੌਕੇ ’ਤੇ ਪਹੁੰਚੀ ਅਤੇ 42 ਵੋਟਰ ਆਈਡੀ ਕਾਰਡ ਬਰਾਮਦ ਕੀਤੇ, ਜਿਨ੍ਹਾਂ ’ਤੇ ਸਾਲ 2011-12 ਛਪਿਆ ਹੋਇਆ ਸੀ। ਉਨ੍ਹਾਂ ਦੱਸਿਆ ਕਿ ਸਾਰੇ ਆਈਡੀ ਕਾਰਡ ਚੋਣ ਕਮਿਸ਼ਨ ਦੇ ਸਥਾਨਕ ਦਫ਼ਤਰ ਵਿੱਚ ਜਮ੍ਹਾਂ ਕਰਵਾ ਦਿੱਤੇ ਗਏ ਹਨ। ਗੁਰਜਰ ਨੇ ਕਿਹਾ ਕਿ ਇਹ ਪਤਾ ਲਗਾਉਣ ਲਈ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ ਕਿ ਆਈਡੀ ਕਾਰਡ ਕਿਸ ਦੇ ਹਨ ਅਤੇ ਉਹ ਮੰਤਰੀ ਦੇ ਘਰ ਨੇੜੇ ਕਿਵੇਂ ਆਏ। ਤਹਿਸੀਲਦਾਰ ਨੇ ਕਿਹਾ ਕਿ ਵੀਰੇਂਦਰ ਕੁਮਾਰ ਦੇ ਕਰੀਬੀ ਸਹਿਯੋਗੀ ਵਿਵੇਕ ਚਤੁਰਵੇਦੀ ਨੇ ਉਨ੍ਹਾਂ ਨੂੰ ਫੋਨ ’ਤੇ ਰਿਹਾਇਸ਼ ਦੇ ਨੇੜੇ ਪਏ ਪਛਾਣ ਪੱਤਰਾਂ ਬਾਰੇ ਦੱਸਿਆ।
