ਐੱਨ ਸੀ ਸੀ ਕੈਂਪ ਵਿੱਚ ਹਥਿਆਰਾਂ ਬਾਰੇ ਸਿਖਲਾਈ

ਅੰਬਾਲਾ ਗਰੁੱਪ ਐੱਨਸੀਸੀ ਗਣਤੰਤਰ ਦਿਵਸ ਦਲ ਦੀ ਤਿਆਰੀ ਲਈ 14 ਹਰਿਆਣਾ ਬਟਾਲੀਅਨ ਐੱਨ ਸੀ ਸੀ ਦੇ ਸਾਲਾਨਾ ਸਿਖਲਾਈ ਕੈਂਪ ਦੌਰਾਨ ਹਥਿਆਰ ਸਿਖਲਾਈ ਅਤੇ ਹਥਿਆਰ ਡਰਿੱਲ ਸੈਸ਼ਨ ਕਰਵਾਏ ਗਏ। ਇਹ ਸਿਖਲਾਈ ਸੈਸ਼ਨ ਕਮਾਂਡਿੰਗ ਅਫ਼ਸਰ ਕਰਨਲ ਜਰਨੈਲ ਸਿੰਘ ਅਤੇ ਪ੍ਰਸ਼ਾਸਨਿਕ ਅਧਿਕਾਰੀ ਕਰਨਲ ਜਤਿੰਦਰ ਸਿੰਘ ਦਹੀਆ ਦੀ ਦੇਖ-ਰੇਖ ਹੇਠ ਕਰਵਾਈ ਗਈ। ਯਮੁਨਾ ਇੰਸਟੀਚਿਊਟ ਆਫ ਇੰਜਨੀਅਰਿੰਗ ਐਂਡ ਟੈਕਨੋਲੋਜੀ, ਗਦੌਲੀ ਵਿੱਚ ਲਗਾਏ ਇਸ ਕੈਂਪ ਵਿੱਚ ਵੱਖ-ਵੱਖ ਸਿੱਖਿਆ ਸੰਸਥਾਵਾਂ ਤੋਂ 400 ਤੋਂ ਵੱਧ ਕੈਡੇਟ ਭਾਗ ਲੈ ਰਹੇ ਹਨ। ਕੈਡੇਟਾਂ ਨੂੰ ਹਥਿਆਰਾਂ ਦੀ ਹੈਂਡਲਿੰਗ, ਅਸੈਂਬਲਿੰਗ, ਨਿਸ਼ਾਨੇਬਾਜ਼ੀ, ਫਾਇਰਿੰਗ ਪੁਜ਼ੀਸ਼ਨ ਅਤੇ ਡਰਿੱਲ ਦੀ ਸਟੀਕਤਾ ਬਾਰੇ ਸਿਖਲਾਈ ਦਿੱਤੀ ਗਈ। ਇਨ੍ਹਾਂ ਸੈਸ਼ਨਾਂ ਦਾ ਉਦੇਸ਼ ਕੈਡੇਟਾਂ ਵਿੱਚ ਅਨੁਸ਼ਾਸਨ, ਆਤਮਵਿਸ਼ਵਾਸ ਅਤੇ ਟੀਮ ਭਾਵਨਾ ਦਾ ਵਿਕਾਸ ਕਰਨਾ ਹੈ ਜੋ ਕਿ ਆਉਣ ਵਾਲੇ ਗਣਤੰਤਰ ਦਿਵਸ ਕੈਂਪ ਲਈ ਬਹੁਤ ਜ਼ਰੂਰੀ ਗੁਣ ਹਨ । ਇਸ ਸਿਖਲਾਈ ਦਾ ਸੁਚਾਰੂ ਸੰਚਾਲਨ ਐਸੋਸੀਏਟ ਐੱਨ ਸੀ ਸੀ ਅਧਿਕਾਰੀਆਂ ਲੈਫਟੀਨੈਂਟ ਦੀਪਾ ਰਾਣੀ, ਲੈਫਟੀਨੈਂਟ ਡਿੰਪਲ ਸੈਣੀ, ਲੈਫਟੀਨੈਂਟ ਰਜਿੰਦਰ ਸਾਂਗਵਾਨ, ਲੈਫਟੀਨੈਂਟ ਮਨਦੀਪ, ਫਸਟ ਅਫ਼ਸਰ ਅੰਜੂ ਗੰਭੀਰ ਅਤੇ ਥਰਡ ਅਫ਼ਸਰ ਹਰਨੀਤ (ਹਰਿਆਣਾ ਗਰਲਜ਼ ਬਟਾਲੀਅਨ, ਅੰਬਾਲਾ) ਨੇ ਕੀਤਾ। ਸੂਬੇਦਾਰ ਮੇਜਰ ਜਸਵੰਤ ਸਿੰਘ ਦੀ ਅਗਵਾਈ ਹੇਠ ਸਮਰਪਿਤ ਟੀਮ ਨੇ ਹਥਿਆਰ ਸਿਖਲਾਈ ਅਤੇ ਡਰਿੱਲ ਸੈਸ਼ਨਾਂ ਨੂੰ ਸਫਲਤਾਪੂਰਵਕ ਨੇਪਰੇ ਚਾੜ੍ਹਨ ਵਿੱਚ ਅਹਿਮ ਭੂਮਿਕਾ ਨਿਭਾਈ। ਕਰਨਲ ਜਰਨੈਲ ਸਿੰਘ ਅਤੇ ਕਰਨਲ ਜਤਿੰਦਰ ਸਿੰਘ ਦਹੀਆ ਦੀ ਅਗਵਾਈ ਹੇਠ ਪੂਰੀ ਸਿਖਲਾਈ ਟੀਮ ਦੇ ਯਤਨ ਐੱਨ ਸੀ ਸੀ ਵੱਲੋਂ ਬਣਾਏ ਗਏ ਉੱਚ ਅਨੁਸ਼ਾਸਨ, ਨਿਸ਼ਠਾ ਅਤੇ ਪੇਸ਼ੇਵਾਰਤਾ ਦੇ ਮਿਆਰਾਂ ਨੂੰ ਪ੍ਰਤਿਬਿੰਬਤ ਕਰਦੇ ਹਨ।